Nshapita wa 116

Dilongolola bapostolo bua diya diende

DIDIA dia tshivulukilu diajiki, kadi Yezu ne bapostolo bende batshidi mu tshibambalu tshia kuulu. Nansha mukadi Yezu pa kuya mu katupa kîpi emu, utshidi ne malu mavule a kuamba. “Mitshima yenu kayipampakanyi,” ke mudiye ubakankamija. “Nuenze midimu ya ditabuja Nzambi.” Kadi udi usakidila ne: “Nuenze kabidi midimu ya dingitabuja meme.”

“Mu nzubu wa Tatuanyi mudi bisombedi bia bungi,” ke mudi Yezu utungunuka. “Ndi nya kunulongoluela muaba . . . bua kundi nsanganyibua nuenu penu nuikaleku. Ne kundi nya nudi bamanye njila waku.” Bapostolo kabena bajingulula se: Yezu udi wakula bua diya diende mu diulu, nunku Tomase udi ukonka ne: “Mukalenge, katuena bamanye kuudi uya. Mmunyi mutuamanya njila?”

“Ndi njila ne bulelela ne muoyo,” ke mudi Yezu wandamuna. Eyowa, anu muntu udi umuitaba ne widikija nsombelu wende ke udi mua kubuela mu nzubu wa mu diulu wa Tatu, anu mudi Yezu wamba ne: “Muntu nansha umue kêna ufika kudi Tatu kabiyi ku butuangaji buanyi.”

“Mukalenge, tuleja Tatu,” ke mudi Filipe ulomba, “ne abi mbikumbane buetu.” Anu mudibi bimueneka, Filipe udi ujinga bua Yezu abaleje tshimuenekelu tshia patoke tshia Nzambi, anu muvuabi bilejibue ku kale mu bikena-kumona kudi Mozese, Eliya ne Yeshaya. Kadi, bushuwa, bapostolo badi ne tshintu kampanda tshilenga kupita bikena-kumona bia mushindu’eu, anu mudi Yezu umvuija ne: “Ndi nenu kukadi lupolo lule lutambe, ne katshia, wewe Filipe, kuena muanji kummanya? Eu udi mummone mmumone kabidi Tatu.”

Bu mudi Yezu uleja tshishiki ngikadilu ya bumuntu bua Tatuende, kusomba nende ne kumujoja, bidi’anu bu kumona Tatu bushuwa. Nansha nanku, Tatu mmutambe Muana, anu mudi Yezu witaba ne: “Malu andi nnuambila tshiena ngamba ku bukole buanyi nkayanyi.” Yezu udi wambika Tatuende wa mu diulu lumu lukumbanyine bua malongesha ende.

Mmushindu kayipu udi bapostolo ne bua kukankamijibua bu mudibu bumvua Yezu ubambila mpindieu ne: “Eu udi wenza midimu ya dingitabuja meme, muine au neenze pende midimu indi ngenza; neenze mene midimu minene kupita eyi”! Yezu kêna usua kuamba ne: bamulondi nebatumike ne makole a dienza bishima mapitshidile ende. Tòo, kadi udi usua kumvuija se: nebakumbaje mudimu wa buambi munkatshi mua tshikondo tshile, mu teritware mutambe kualabala, ne bantu bungi bupitshidile.

Panyima pa diya diende Yezu kakulekelela bayidi bende to. “Tshionso tshinualomba mu dîna dianyi,” ke mudiye ulaya, “nentshienze.” Pashishe, udi wamba ne: “Nendombe kudi Tatu ne yeye neanupeshe muambuluishi mukuabu bua ikale nenu kashidi, spiritu wa bulelela.” Pashishe, yeye mumane kubanda mu diulu, Yezu udi upongoluela bayidi bende spiritu munsantu, muambuluishi mukuabu eu.

Diya dia Yezu dikadi pabuipi, anu mudiye wamba ne: “Panyima pa lupolo luîpi, bukua-bantu kabuakummona kabidi nansha kakese.” Yezu nealue tshifukibua tshia mu nyuma tshidi muntu pa buloba kayi mua kumona. Kadi Yezu udi ulaya tshiakabidi bapostolo bende ba lulamatu ne: “Nenummone, bualu ndi ne muoyo ne nenuikale penu ne muoyo.” Eyowa, Yezu kakubamuenekela patupu mu mubidi wa musunya panyima pa dibiishibua diende, apo, padi tshikondo tshijadika tshikumbana, neababiishe bua basombe nende mu diulu bu bifukibua bia mu nyuma.

Yezu udi ufila mpindieu dîyi-diakaji edi dipepele ne: “Eu udi ne mêyi-matuma ànyì ne uatumikila, muine au ke udi unnanga. Ne eu udi unnanga neanangibue kudi Tatuanyi ne meme nemmunange ne nendileje patoke kudiye.”

Umvua mêyi aa mupostolo Yudase, eu udi ubikidibua kabidi ne: Tadeya, udi umukosa ku mêyi ne: “Mukalenge, ntshinyi tshienzeki bua wewe kupangadija bua kudileja patoke kutudi ne kabiyi kudi bukua-bantu bonso?”

“Bikala muntu munnange,” ke mudi Yezu wandamuna, “neatumikile muaku wanyi, ne Tatuanyi neamunange . . . Eu udi kayi unnanga kêna utumikila miaku yanyi.” Bishilangane ne bamulondi bena butumike, bena bulongolodi ebu kabena bangata malongesha a Kristo ne mushinga. Nunku kêna udisokolola kudibu.

Mu dikumbaja mudimu wende wa pa buloba, Yezu uvua mulongeshe bapostolo bende malu mavule. Mmunyi muaavulukabu wonso, nangananga pa kumona mudibu, katshia too ne mpindieu, bapanga bujinguludi bua mavule a ku wowo? Diakalenga, Yezu udi ulaya ne: “Muambuluishi, spiritu munsantu, watumibua kudi Tatu mu dîna dianyi, muine au neanulongeshe malu wonso ne neanuvuluije malu wonso amvua munuambile.”

Bua kubakankamija tshiakabidi, Yezu udi wamba ne: “Ndi nnushila ditalala, ndi nnupesha ditalala dianyi. . . . Mitshima yenu kayipampakanyi!” Bushuwa, Yezu udi ubashiya, kadi udi umvuija ne: “Bu nuenu bannange, nuvua mua kusanka bu mundi nnya kudi Tatu, bualu Tatu mmuntambe meme bunene.”

Lupolo ludi Yezu ne bua kushala kabidi nabu lukadi luipidile. “Tshiakuakula kabidi nenu musangu mule,” ke mudiye wamba, “bualu mfumu wa bulongolodi ebu udi ulua. Ne kêna ne bukokeshi kundi.” Satana Diabolo, eu uvua ne bukole bua kubuela munda mua Yudase ne kumuteka ku bukokeshi buende, ke mukokeshi wa bulongolodi ebu. Kadi Yezu kêna ne butekete bua mpekatu budi Satana mua kubabidila bua kumupambuisha kule ne disadila Nzambi.

Dishala mu bulunda bua pa muoyo

Panyima pa didia dia tshivulukilu, Yezu wakankamiji bapostolo bende pa kuyukidilangana nabu mu bulunda bua pa muoyo. Pamu’apa mundankulu mmumane kupita. Nunku, Yezu udi ubalomba ne: “Jukayi, tumukayi apa.” Kadi, kumpala kua buobu kumuka, Yezu, musakibue kudi dinanga, udi utungunuka ne kuakula, ufila mufuanu muenzeji.

“Meme ndi mvinyo mulelela, ne Tatuanyi ntshidime,” ke mudiye utuadija. Tshidime Munene, Yehowa Nzambi, wakajiika mvinyo eu wa mu tshimfuanyi pakelaye Yezu manyi a spiritu munsantu dîba dia batismo wende mu muvu wa bimuma mu 29 B.B. Kadi Yezu udi utungunuka bua kuleja mudi mvinyo eu kayi umufuanyikija anu yeye nkayende, pa kuamba ne: “ditamba dionso munda muanyi didi kadiyi dikuama mamuma yeye udi udiumusha, ne edi dionso didi dikuama mamuma yeye udi udikezula, bua dikuame mamuma mavule. . . . Bu mudi ditamba kadiyi mua kudikuamina mamuma pikaladi kadiyi dishala munda mua mvinyo, bia muomumue nuenu penu kanuena mua kuakuama, binuikala kanuyi nushala mu buobumue nanyi. Meme ndi mvinyo, nuenu nudi matamba.”

Dia Pentekoste, matuku 51 pashishe, bapostolo ne bakuabu bayidi badi bavua matamba a mvinyo padibu babapongoluela spiritu munsantu. Ndekelu wa bionso, bantu 144 000 badi bavua matamba a mvinyo mukuami wa mamuma wa mu tshimfuanyi. Popamue ne muonji wa mvinyo, Yezu Kristo, bine aba badi benza mvinyo wa mu tshimfuanyi udi ukuama mamuma a Bukalenge bua Nzambi.

Yezu udi umvuija muanda wa nshindamenu mu dikuama dia mamuma ne: “Eu udi ushala mu buobumue nanyi, ne meme mu buobumue nende, muine au udi ukuama mamuma mavule; bualu nuenu kanuyi bashale munda muanyi kanuena mua kuenza bualu nansha bumue.” Pabi, biapangila muntu bua kukuama mamuma, Yezu udi wamba ne: “udi wedibua pambelu bu ditamba ne dine edi didi diuma; pashishe bantu badi bangula matamba au ne baakupa mu kapia ne adi wosheka.” Ku luseke lukuabu, Yezu udi ulaya ne: “Binuashala mu buobumue nanyi ne mêyi anyi biashalawu munda muenu, nulombe tshionso tshinudi basue ne tshine atshi netshienzeke bualu buenu.”

Pashishe, Yezu udi wambila bapostolo ne: “Tatuanyi udi utumbishibua ku muanda eu: nutungunuke ne kukuama mamuma mavule ne nuenu bine nudileje bayidi banyi.” Mamuma adi Nzambi ujinga bua matamba kukuamawu ndimuenesha bikadilu bifuanangane ne bia Kristo, nangananga dinanga. Kabidi, bu muvua Kristo mumanyishi wa Bukalenge bua Nzambi, mamuma majingibue aa adi akongoloja kabidi mudimu wa dienza bayidi anu bu muwenzeleye.

“Nushale mu dinanga dianyi,” ke mudi Yezu ubasengelela mpindieu. Kadi, mmunyi mudi bapostolo bende mua kuenza nunku? “Binuatumikila mêyi-matuma anyi,” ke mudiye wamba, “nenushale mu dinanga dianyi.” Utungunuka, Yezu udi umvuija ne: “Dîyi-dituma dianyi ndiedi: nunangangane anu bu mumvua mununange. Muntu nansha umue kêna ne dinanga dinene dipite edi: muntu kampanda afile anyima wende bua balunda bende.”

Mêba makese pashishe, Yezu neafile tshilejilu tshia dinanga edi dikena kuelekeja pa kufila muoyo wende bua bapostolo, kabidi ne bua bakuabu bonso benza midimu ya dimuitabuja. Tshilejilu tshiende netshikale ne bua kusaka bamulondi ku dilejangana dinanga dia didilambula. Dinanga edi nedibasunguluje, anu muambile Yezu ne: “Ku muanda eu bonso nebamanye munudi bayidi banyi: binuikala ne dinanga munkatshi muenu.”

Usunguluja aba badi balunda bende, Yezu udi umvuija ne: “Nudi balunda banyi binuikala nuenza tshindi nnutumina dîyi bua kuenza. Tshiena nnubikila kabidi bapika, bualu mupika katu umanya tshidi mfumuende wenza. Kadi ndi munubikile balunda, bualu malu onso amvua mumvue kudi Tatuanyi ndi munumanyisheu.”

Mmalanda kayipu aa a mpatshi​—kuikala balunda ba Yezu ba pa muoyo! Kadi bua kushala dîba dionso mu malanda aa, bamulondi badi ne bua ‘kutungunuka ne kukuama mamuma.’ Bikalabu benza nunku, Yezu udi wamba ne: “tshionso tshinualomba kudi Tatu mu dîna dianyi, yeye neanupetshio.” Bushuwa, ndifutu kayipu edi bulenga didi dipetshibua pa kukuama mamuma a Bukalenge! Mumane kusengelela bapostolo tshiakabidi bua ‘kunangangana,’ Yezu udi ubumvuija ne: bena bulongolodi ebu nebabakine. Kadi, udi ubakankamija ne: “Bianukina bena bulongolodi ebu, nudi bamanye ne: bavua bankine kumpala kua buobu kunukina.” Pashishe, Yezu udi usokolola bua tshinyi bena bulongolodi ebu badi bakina bamulondi, wamba ne: “Bu munudi kanuyi ba ku bena bulongolodi, kadi bu munganusungudi ku bena bulongolodi ebu, bua muanda eu bena bulongolodi ebu badi banukina.”

Pa kumvuija kakuabu kabingila ka dikinyibua diabu kudi bena bulongolodi ebu, Yezu udi utungunuka ne: “Nebanuenzele malu au onso anu bua dîna dianyi, bualu ki mbamanye yeye [Yehowa Nzambi] wakantuma.” Midimu ya bishima ya Yezu idi bushuwa ipiisha aba badi bamukina, anu mudiye umvuija ne: “Bu meme tshiyi muenze munkatshi muabu midimu eyi ivua muntu mukuabu kayi muenze, kabavua kuikala ne mpekatu; kadi mpindieu bamanyi kummona ne kunkina, pamue ne Tatuanyi.” Nunku, anu mudi Yezu wamba, mufundu wakumbanyi: “Bakankina kapayi bualu.”

Anu muenzeleye musangu kampanda, Yezu udi ubakankamija tshiakabidi pa kulaya bua kutuma muambuluishi, spiritu munsantu, muine udi bukole buenzeji bua Nzambi. “Muine au neafile bumanyishi budi buntangila; ne nuenu penu, nenuikale ne bua kufila bumanyishi.”

Mibelu mikuabu ya dilayangana

Yezu ne bapostolo bakadi pa kumbuka mu tshibambalu tshia kuulu. “Nganuambidi malu aa bua kanulenduki,” ke mudiye utungunuka. Pashishe, udi ubapa didimuija edi dia dikema ne: “Bantu nebanuipate mu nsunagoga. Bushuwa, dîba didi dilua dikala yonso wanushipa wela meji se: mmuenzele Nzambi mudimu wa tshijila.”

Anu mudibi bimueneka, didimuija edi ndipampakaje bapostolo bikole. Nansha muvua Yezu muambe ne: bena bulongolodi ebu nebabakine, kavua mubasokoluele buludi se: nebashipibue. “Tshivua munuambile [buine ebu] diambedi,” ke mudi Yezu umvuija, “bualu mvua nenu.” Nunku, mmunyipu mudibi bilenga bu mudiye ubavuadika bia-mvita pa kubapesha mamanyisha aa kumpala kua diya diende.

“Kadi mpindieu,” ke mudi Yezu utungunuka, “ndi nya kudi eu wakantuma, nansha umue wa kunudi kena unkonka ne: ‘Udi uya penyi?’” Lupolo lukadi lunenge dilolo adi, bavua balombe bua kumanya kuvuaye uya, kadi mpindieu, mêyi adiye mubambile mmababungamije bikole, ne mbapange nansha mua kumukonka kabidi pa bualu ebu. Anu mudi Yezu wamba ne: “Mitshima yenu mmiuule tente ne dibungama bualu nganuambidi malu aa.” Bapostolo ki mbabungame amu bualu wabambidi se: nebakame makengeshibua makole ne nebabashipe, apo kabidi bualu Mfumuabu ukadi pa kubashiya.

Nunku, Yezu udi umvuija ne: “Bua diakalenga dienu meme ndi nya. Bualu meme tshiyi muye, muambuluishi kakuvua kunudi nansha kakese; kadi bingaya, nennutumineye.” Bu mudiye muntu wa mubidi wa musunyi, Yezu udi mua kuikala anu muaba umue musangu umue, kadi padiye ufika mu diulu, udi mua kutuma muambuluishi, spiritu munsantu wa Nzambi, kudi bamulondi nansha bikale muaba kayi pa buloba. Nunku, kuya kua Yezu nekubatuadile disanka.

‘Spiritu munsantu,’ ke mudi Yezu wamba, ‘neapeshe bukua-bantu bijadiki bituishishi pa bidi bitangila mpekatu ne pa bidi bitangila buakane ne pa bidi bitangila dilumbuluisha.’ Mpekatu wa bena bulongolodi ebu, dipanga kuenza midimu ya ditabuja mu Muana wa Nzambi, neatandudibue. Kabidi, bijadiki bituishishi bia buakane bua Yezu nebifidibue ku dibanda diende kudi Tatuende. Bia muomumue, dipangila dia Satana ne bulongolodi buende bubi bua kutundubija muoyo mutoke wa Yezu ntshijadiki tshituishishi tshia se: mukokeshi wa bulongolodi ebu ukadi mulumbuluisha ne mufundila tshibawu.

“Ntshidi ne malu mavule a kunuambila,” ke mudi Yezu utungunuka, “kadi kanuena bakumbane mua kuumvua mpindieu.” Nunku, Yezu udi ulaya ne: papongololaye spiritu munsantu, udi mene bukole buenzeji bua Nzambi, neabafikishe ku dipeta bujinguludi pa malu aa, bilondeshile makokeshi abu a kumvua.

Bapostolo badi nangananga bapangila kujingulula se: Yezu neafue ne pashishe neabamuenekele panyima pa dibiishibua diende. Nunku badi bakonkangana ne: “Mêyi aa adi umvuija tshinyi padiye utuambila ne: ‘Mu lupolo luîpi emu kanuakummona kabidi, ne kabidi: mu lupolo luîpi emu nenummone,’ ne: ‘bualu ndi nya kudi Tatu’?”

Yezu mmumanye se: badi bajinga kumuebeja, nunku udi umvuija ne: “Bushuwa menemene ndi nnuambila ne: nenudile ne nuele miyenga, kadi bena bulongolodi ebu nebasanke; nenubungame, kadi kubungama kuenu nekuandamuke disanka.” Ku shoo mu munya, mu mapingaja, padibu bashipa Yezu, bamfumu ba bitendelelu bia bulongolodi ebu badi basanka, kadi bayidi badi babungama. Kadi, dibungama diabu didi diandamuka disanka padi Yezu ubiishibua! Disanka diabu didi dinenga padiye ubapuijila bukole dia Pentekoste bua kuikalabu bantemu bende pa kubapongoluela spiritu munsantu wa Nzambi!

Pa kufuanyikija nsombelu wa bapostolo ne wa mukaji padiye umvua bisama bua kulela, Yezu udi wamba ne: “Mukaji, padiye pa kulela, udi mu dibungama, bualu dîba diende diakumbanyi.” Kadi Yezu udi umvuija ne: padiye ulela muanende kêna uvuluka kabidi dikenga diende, pashishe udi ukolesha bapostolo bende ku muoyo, wamba ne: “Nunku nuenu penu, nudi bushuwa ne dibungama mpindieu; kadi nennumone kabidi [pandi mbiishibua] ne mitshima yenu neyisanke, ne muntu nansha umue kakunumusha disanka dienu.”

Katshia too ne ku dîba edi, bapostolo kabavua banji kuenza mulombu mu dîna dia Yezu. Kadi mpindieu udi wamba ne: “Binualomba tshintu kampanda kudi Tatu yeye neanupetshio mu dîna dianyi. . . . Bualu Tatu yeye muine mmununange, bualu nuakannanga meme ne nuakitabuja se: mvua mupatuke bu muleji-mpala wa Tatu. Ngakafumina kudi Tatu ne ngakalua mu bukua-bantu. Pashishe, ndi ngumbuka mu bukua-bantu ne nya kudi Tatu.”

Miaku ya Yezu idi dikankamija dikole bua bapostolo. “Ku mêyi aa tudi tuitaba se: udi mufumine kudi Nzambi,” ke mudibu bamba. “Nudi nuitaba mpindieu anyi?” ke mudi Yezu webeja. “Monayi! Dîba didi dilua, bushuwa, ndimane kukumbana dianutangalajabu muntu yonso ku nzubu wende ne dinuanshiya nkayanyi.” Nansha mudi muanda eu umueneka kawuyi kuitabijibua, ke tshidi mene tshienzeka butuku kabuyi buanji kutshia!

“Nganuambidi malu aa bua nuikale ne ditalala ku butuangaji buanyi.” Yezu udi ukomesha ne: “Mu bulongolodi ebu nudi nupetangana ne dikenga, kadi nukoleshe muoyo! Ngatshimunyi bulongolodi ebu.” Yezu wakatshimuna bulongolodi ebu pa kukumbaja ne lulamatu disua dia Nzambi nansha muvua Satana ne bantu bende bateta muabu muonso bua kunyanga muoyo mutoke wa Yezu.

Disambila dia nkomenu mu tshibambalu tshia kuulu

Musakibue kudi dinanga diondoke bua bapostolo bende, Yezu mmubalongolole bua diya diende dikadi pabuipi. Mpindieu, mumane kubapesha mibelu ne mubakankamije lupolo lule, udi ubandisha mêsu pa kutangila mu diulu ne wenza milombo kudi Tatuende ne: “Tumbisha Muanebe, bua Muanebe akutumbishe, bu muudi mumupeshe bukokeshi pa mubidi wonso, bua pa bidi bitangila bungi buonso nkong buwudi mumupeshe, yeye amone mua kubapesha muoyo wa kashidi.”

Ntshiena-bualu kayipu tshidi tshiombesha mitshima tshidi Yezu utela mpindieu​—Muoyo wa kashidi! Bu mudiye mupeshibue “bukokeshi pa bantu bonso,” Yezu udi mua kupuijila bukua-bantu bufundila lufu masanka mafume ku mulambu wende wa tshia-bupikudi. Tshidibi, anu bantu badi Tatuende wanyisha ke badiye wambika “muoyo wa kashidi.” Pa kusulakaja tshiena-bualu etshi tshia muoyo wa kashidi, Yezu udi utungunuka ne disambila diende nunku:

“Etshi tshidi tshiumvuija muoyo wa kashidi: buobo bapete dimanya diebe wewe, Nzambi umuepele mulelela, ne dia eu uwakatuma, Yezu Kristo.” Eyowa, lupandu ndusuikakaja ku dipeta dimanya dia Nzambi ne dia Muanende. Kadi, bidi bikengela bivule kupita kuikala anu ne dimanya mu mutu.

Bidi bikengela kumanya Nzambi ne Muanende mu buondoke ne kudia nabu malanda masheme. Bidi bikengela kabidi kuikala ne ngelelu wa meji bu wabu ne mmuenenu pa malu anu bu buobu bine. Kupita bionso, muntu udi ne bua kuluangana bua kuidikija bikadilu biabu bikena kuelekeja mu malanda ende ne bakuabu.

Yezu udi usambila pashishe ne: “Ndi mukutumbishe pa buloba, ngajikiji mudimu uuvua mumpeshe bua kuenza.” Mumane kukumbaja mudimu uvuabu bamupeshe katshia too ne ku dîba edi ne bu mudiye ne dieyemena se: nealubuluke anu bilenga mu matuku atshilualua, udi wenza mulombo eu: “Tatu, untumbishe ku luseke luebe ne butumbi bumvua nabu ku luseke luebe bangabanga ne bukua-bantu kabuyi buanji kuikalaku.” Eyowa, Yezu udi ulomba mpindieu bua kupingajibua mu butumbi bua mu diulu bua diambedi ku diambuluisha dia dibiishibua.

Pa kumvuija mu tshikoso mudimu wende munene pa buloba, Yezu udi wamba ne: “Ndi mumanyishe dîna diebe patoke kudi bantu bauvua mumpeshe ku bena mu bulongolodi ebu. Bavua bebe, ne wewe wakabampesha, ne bakutumikila dîyi diebe.” Yezu uvua mutumike ne dîna dia Nzambi, Yehowa, mu mudimu wende wa buambi ne muleje nshindumuinu wadi mujalame, kadi uvua muenze bivule kupita pa kumanyisha dîna dia Nzambi patoke kudi bapostolo bende. Uvua kabidi mualabaje dimanya diabu ne dianyisha diabu dia Yehowa, dia bumuntu buende, ne dia malongolola ende.

Wambika Yehowa lumu bu Eu udi ku mutu kuende, Eu udiye usadila ku bulombodi buende, Yezu udi witaba ne didipuekesha ne: “Mêyi auvua mumpeshe ndi mubapeshewu, mbaapete ne mbafike bushuwa ku dimanya ne: ndi mupatuke bu muena-mpala webe, ne bitabi se: wewe ke wakantuma.”

Pa kusunguluja bayidi bende ne bakuabu mu bukua-bantu, Yezu udi usambila pashishe ne: “Ndi ngenza dilomba, ki mbua bena bulongolodi ebu, apo bua aba bawampeshi . . . Pamvua nabu mvua mbakulupila . . . , ne mvua mbalama, ne wa kudibu nansha umue ki mmubutudibue, pa kumbusha muana wa kabutu,” mbuena kuamba ne: Yudase Iskaryote. Dîba edi mene, Yudase udi wenda ukumbaja tshidimudimu tshia bundu, bua kufila Yezu kudi baluishi. Nunku, kayi mua kumanya, Yudase udi wenda ukumbaja Mifundu.

“Bena bulongolodi ebu bakubakina,” ke mudi Yezu utungunuka ne kusambila. “Ndi nkulomba, ki mbua ubumushe mu bena bulongolodi ebu, kadi, bua ubakube bualu bua mubi. Ki mba ku bena bulongolodi ebu anu bu mundi tshiyi wa ku bena bulongolodi ebu.” Balondi ba Yezu badi mu bulongolodi ebu, nsangilu wa bantu mulongolola udi Satana ukokesha, kadi badi bashala ne badi ne bua kushala misangu yonso batapuluke ne bulongolodi ebu ne malu mabi abu.

“Ubakezule ku diambuluisha dia bulelela,” ke mudi Yezu utungunuka, “dîyi diebe didi bulelela.” Apa Yezu udi ubikila Mifundu ya tshiena-Ebelu mifundisha ku spiritu ivuaye utela ku musangu ku musangu ne: “bulelela.” Kadi malu avuaye mulongeshe bayidi bende ne aa afundilebo pashishe ku spiritu bu Mifundu ya tshiena-Greke ya bena nkristo, idi payi “bulelela.” Bulelela ebu budi mua kukezula muntu, kushintulula nsombelu wende menemene, ne kumuvuija muntu mutapuluke ku bulongolodi ebu.

Yezu udi usambila mpindieu, “ki ng’anu bua bine aba, apo kabidi bua aba bamuitabuja ku diambuluisha dia dîyi diabu.” Nunku, Yezu udi usambila bua aba bikala bamulondi bela manyi ne bua bayidi bakuabu basangishibua, mu matuku atshilualua, mu “tshisumbu tshimue tshia mikoko.” Ntshinyi tshidiye ulomba bua buonso abu?

“Bua buonso bikale tshintu tshimue, bu muudi wewe, Tatu, mu buobumue nanyi ne meme mu buobumue nebe, . . . bua bikale tshintu tshimue anu bu mutudi tshintu tshimue.” Yezu ne Tatu kabena muntu umue wa ku dîna, apo badi mu diumvuangana mu malu wonso. Yezu udi usambila bua se: bamulondi bikale pabu mu buobumue bua mushindu’eu, bua “bukua-bantu bumanye ne: wewe ng’wakantuma ne wakabananga anu bu muwakannanga meme.”

Bua aba bavua ne bua kulua bamulondi bela manyi, Yezu udi ubenzela mpindieu mulombo kampanda kudi Tatuende wa mu diulu. Ngulomba tshinyi? “Bua muaba undi buobo bikale kabidi nanyi, bua bamone butumbi buanyi buwakampesha, bualu uvua munnange kumpala kua diashibua dia bukua-bantu,” mbuena kuamba ne: kumpala kua Adama ne Eva kulelabu ndelanganyi. Tshikondo tshile kumpala kua muanda eu, Nzambi uvua munange Muanende umuepele, eu wakalua Yezu Kristo.

Ukomesha disambila diende, Yezu udi uzangika tshiakabidi ne: “Ndi mubamanyishe dîna diebe ne nembamanyishedi kabidi, bua dinanga diwuvua munnange dikale munda muabu, ne meme ngikale mu buobumue nabu.” Bua bapostolo, kulonga dîna dia Nzambi kuvua kumvuija kufika ku dimanya, muntu ne muntu, dinanga dia Nzambi. Yone 14:1–17:26; 13:27, 35, 36; 10:16; Luka 22:3, 4, NW; Ekesode 24:10; 1 Bakelenge 19:9-13; Yeshaya 6:1-5; Galatia 6:16; Misambu 35:19; 69:4; Nsumuinu 8:22, 30.

▪ Yezu udi uya penyi, ne ndiandamuna kayi didi Tomase upeta pa bidi bitangila njila wa kuine aku?

▪ Ku dilomba diende, anu mudibi bimueneka, ntshinyi tshidi Filipe ujinga bua Yezu afile?

▪ Bua tshinyi eu udi mumone Yezu mmumone kabidi Tatu?

▪ Mmunyi muenza balondi ba Yezu midimu minene mipite ivuaye muenze?

▪ Mmu ngumvuilu kayi mudi Satana kayi mukuate Yezu ku bukokeshi buende?

▪ Yehowa wakakuna mvinyo wa mu tshimfuanyi dîba kayi, ne ndîba kayi ne mmunyi muakalua bakuabu tshitupa tshia mvinyo eu?

▪ Ndekelu wa bionso, mvinyo wa mu tshimfuanyi udi ne matamba bungi munyi?

▪ Mmamuma a mushindu kayi adi Nzambi musue bua matamba kukuamawu?

▪ Mmunyi mutudi mua kuikala balunda ba Yezu?

▪ Bua tshinyi bena bulongolodi ebu badi bakina balondi ba Yezu?

▪ Ndidimuija kayi difila kudi Yezu didi dipampakaja bapostolo bende?

▪ Bua tshinyi bapostolo badi bapanga kuebeja Yezu pa bidi bitangila kudiye uya?

▪ Ntshinyi tshidi bapostolo nangananga bapanga kujingulula?

▪ Mmufuanu kayi udi Yezu utumika nawu bua kuleja se: dibungama dia bapostolo nediandamuke disanka?

▪ Ntshinyi tshidi Yezu wamba ne: bapostolo nebenze mu katupa kîpi emu?

▪ Mmunyi mudi Yezu mutshimune bulongolodi ebu?

▪ Mmu ngumvuilu kayi mudi Yezu mupeshibue “bukokeshi pa mubidi wonso”?

▪ Kupeta dimanya dia Nzambi ne Muanende kudi kumvuija tshinyi?

▪ Yezu mmumanyishe dîna dia Nzambi patoke mu mishindu kayi?

▪ “Bulelela” ntshinyi, ne mmunyi mudibu “bukezula” muena nkristo?

▪ Mmu ngumvuilu kayi mudi Nzambi, Muanende, ne batendeledi balelela buonso tshintu tshimue?

▪ “Diashibua dia bukua-bantu” diakenzeka dîba kayi?