Nshapita wa 92

Diondopa bena nsudi dikumi mu luendu lua ndekelu lua Yezu ku Yeruzaleme

YEZU udi upumbisha madikolela a Sanhedrin bua kumushipa pa kumuka mu Yeruzaleme ne kuenza luendu mutangile ku tshimenga tshia Efrayime, tshidi mutantshi bu wa kilometre 24 patupu ku nord-est wa Yeruzaleme. Udi ushala kuineku ne bayidi bende, kule ne baluishi bende.

Kadi, dîba dia Pasaka wa mu 33 B.B. didi disemena, ne Yezu kêna ujingakana bua kuditua tshiakabidi mu njila. Udi upitshila mu Samariya ne ubanda mu Ngalileya. Eu mmusangu wa ndekelu udiye ukumbula rejon eu kumpala kua lufu luende. Mu Ngalileya, yeye ne bayidi bende badi imue misangu badisanga kudi bantu bakuabu badi baya ku Yeruzaleme bua kuenza difesto dia Pasaka. Badi balonda njila udi ukosolola mu distrike dia Pereya, ku est kua Musulu wa Yordane.

Anu batshituadijilaku luendu, padi Yezu ubuela mu musoko kampanda mu Samariya peshi mu Ngalileya, bantu dikumi bálémá kudi nsudi badi bavua kusambakena nende. Disama edi dibiadibi didi didia bitupa bia mubidi wa muntu ku kakese ku kakese​—minu, bana ba nkasa, matshi, diûlu ne mishiku. Bua kuepula bakuabu ku dibambulukila, Mikenji ya Nzambi idi yamba bua muena nsudi ne: “Neikale ne bua kubuikila mimpenya ne kuela lubila ne: ‘Ukena mukezuke, ukena mukezuke!’ Neikale mupange bukezuke matuku wonso adiye ne mputa. . . . Neasombe muditole pa nkayende.”

Bena nsudi aba dikumi badi batumikila mikandu ya mu Mikenji idi itangila bena nsudi ne mbimanyine kule ne muaba udi Yezu. Kadi, badi bela mbila ne mêyi makole ne: “Yezu, Mulongeshi, utufuile luse!”

Ubamuenena pa bule, Yezu udi ubatumina dîyi ne: “Ndayi ne nudileje kudi bakuidi.” Yezu udi wamba nunku bualu Mikenji ya Nzambi idi ipesha bakuidi bukenji bua kumanyisha bantu kukezudibua kua bena nsudi badi buondopibue. Nunku, bine aba badi bapeta dianyisha dia kusomba tshiakabidi ne bena mubidi mupeluke.

Bena nsudi aba dikumi badi beyemena makole a dienza bishima a Yezu. Nunku, badi bambuluja bua kudileja kudi bakuidi, nansha muvuabo kabayi banji kuondopibua. Patshidibo mu njila, ditabuja diabo mu Yezu didi difutshibua. Badi batuadija kumona ne kumvua diakana dia mubidi wabu!

Ku bena nsudi aba bakezula, bantu tshitema badi batungunuka ne njila wabu, kadi mukuabu, muena Samariya, udi upingana bua kukeba Yezu. Mbua tshinyi? Bualu udi ne dianyisha diondoke bua tshidibo bamuenzele. Udi usamuna Nzambi ne dîyi dikole, ne padiye usangana Yezu, udi upona ku makasa ende, umuela tuasakidila.

Bu diandamuna, Yezu udi wamba ne: “Ki mbantu dikumi bavua bakezudibue anyi? Apu bakuabu tshitema badi kuepi? Muntu mukuabu kavuaku mua kupingana bua kuambika Nzambi butumbi anu muntu eu wa ditunga dikuabu?”

Pashishe, udi wambila muena Samariya ne: “Juka, uye biebe; ditabuja diebe diakulengeji.”

Patudi tubala muyuki eu wa kuondopibua kua bena nsudi dikumi kudi Yezu, tudi ne bua kushindamija lungenyi pa dilongesha didi mu lukonko luende elu: “Apu bakuabu tshitema badi kuepi?” Dibenga kuleja dianyisha dia bakuabu tshitema ntshilema tshinene. Tuetu petu, anu bu muena Samariya, netulejeku dianyisha bua bintu bitudi tupeta kudi Nzambi, bine bidi bikongoloja dilaya dijalame dia muoyo wa kashidi mu bulongolodi bupiabupia buakane bua Nzambi anyi? Yone 11:54, 55; Luka 17:11-19; Lewitiki 13:16, 17, 45, 46; Buakabuluibua 21:3, 4, NW.

▪ Mmunyi mudi Yezu upumbisha madikolela menza bua kumushipa?

▪ Nkuepi kudi Yezu uya pashishe, ne udi ne bua kufika kuepi?

▪ Bua tshinyi bena nsudi mbimanyine kule, ne bua tshinyi Yezu udi ubambila bua kudileja kudi bakuidi?

▪ Ndilongesha kayi ditudi ne bua kupetela ku muyuki eu?