Nshapita wa 70

Diondopa muntu mulela mufofo

PADI bena Yuda bateta mua kuasa Yezu mabue, kêna upatuka mu Yeruzaleme nansha. Ku shoo, dia Nsabatu, yeye ne bayidi bende mu dinyunguluka mu tshimenga, badi bamona muntu kampanda mufofo katshia ku diledibua diende. Bayidi badi bebeja Yezu ne: “Rabbi, nnganyi uvua muenze mpekatu, mmuntu eu anyi peshi mbaledi bende, bua kuledibuaye mufofo nunku?”

Pamu’apa, bayidi badi bitaba, anu bu bamue ba-rabbi ne: muntu udi mua kuenza mpekatu mutshikale mu lukùtù lua mamuende. Kadi, Yezu udi wandamuna ne: “Muntu eu peshi baledi bende, kakuena udi muenze mpekatu, kadi biakenzeka nunku bua midimu ya Nzambi ilejibue patoke mu muanda udi umutangila.” Bufofo bua muntu eu ki mbufume ku tshilema kampanda tshisunguluke peshi mpekatu muenza kudi baledi bende anyi yeye muine. Mpekatu wa muntu wa kumpala, Adama, ke wakapangisha bantu buonso bupuangane, ne nunku bakumbanyine kupeta bulema bua mishindu yonso, bu mudi bufofo ebu bua ku tshileledi. Mpindieu, bulema bua muntu eu budi bupetesha Yezu mushindu wa kuleja patoke midimu ya Nzambi.

Yezu udi uleja mushinga wa kuenza midimu bu nunku ne lukasa luonso. “Tudi ne bua kuenza midimu ya eu udi muntume patutshidi mu munya,” ke mudiye wamba. “Butuku budi bulua budi muntu nansha umue kayi mua kuenza mudimu. Bu muntshidi mu bukua-bantu, ndi butoke bua bukua-bantu.” Mu katupa kîpi, lufu lua Yezu nelumubueje mu mîdima ya lukita muikalaye kayi mua kuenza kabidi mudimu kayi wonso. Kadi bua mpindieu, udi mpokolo wa butoke kudi bukua-bantu.

Mumane kuamba miaku eyi, Yezu udi utua luta panshi, usopa bitotshi ne mata ende. Pashishe, udi ubilaba pa mesu a mufofo ne wamba ne: “Nda kuowa mâyi ku dijiba dia Siloame.” Muntu udi utumikila dîyi. Ne padiye wenza nunku, udi umona! Ndisanka kayipu didiye nadi mu kupingana kuende, bu mudiye umona bua musangu wa kumpala katshia bamulela!

Bena mutumba ne bakuabu badi bamumanye badi bakatshila. “Muine eu ki mmuntu uvua usomba ulomba ka pa luse anyi?” ke mudibo bebeja. “Udi’anu nyeye” ke mudi bamue bandamuna. Kadi bakuabo kabena mua kuitaba: “Nansha kakese, kadi mmumufuane.” Pin’apu, muntu udi wamba ne: “Meme ndi yeye.”

“Kadi mêsu ebe atabadi mushindu kayi?” ke mudi bantu bebeja bua kumanya.

“Muntu udibo babikila ne: Yezu, wenji bitotshi, kubindaba pa mêsu, pashishe kungambila ne: ‘Nda ku Siloame, wowe mâyi.’ Ke meme kuya, kuowa mâyi ne kupeta lumonu.”

“Muine muntu au udi penyi?” ke mudibo bamuebeja.

“Tshiena mumanye” ke mudiye wandamuna.

Mpindieu, bantu badi baya ne muntu eu uvua mufofo kudi bamfumu babo ba bitendelelu, Bafarizeyi. Buobo pabo badi batuadija kumuebeja mushindu udiye mupete lumonu. “Wandabi bitotshi pa mêsu, meme kuowa mâyi ne kupeta lumonu,” ke mudi muntu umvuija.

Bushuwa, Bafarizeyi bavua ne bua kusanka pamue ne mulombi wa ka pa luse eu udi muondopibue! Kadi, pamutu pa kusanka, badi bapiisha Yezu. “Eu ki mmuntu mufume kudi Nzambi to,” ke mudibo bamba. Bua tshinyi badi bamba nunku? “Bualu kêna unemeka Nsabatu.” Pabi, bamue Bafarizeyi badi badiebeja ne: “Mmunyi mudi muntu muena mpekatu mua kuenza bishima bia mushindu’eu?” Nunku, ditapuluka diakabuela munkatshi muabo.

Ke bualu kayi badi bakonka muntu eu ne: “Udi pebe wamba tshinyi buende, pa kumona mudiye mukutabeja mêsu?”

“Mmuprofete,” ke mudiye wandamuna.

Bafarizeyi badi babenga bua kuitaba dîyi diende. Mbatuishibue se: kudi ne bua kuikala muanda kampanda musokoka udi Yezu ne muntu eu bumvuangane bua kudinga bantu. Bua kumana mpata yonso, badi babikidisha baledi ba mulombi wa ka pa luse bua kubakonka. Yone 8:59; 9:1-18, NW.

▪ Ntshinyi tshidi tshiledi tshia bufofo bua muntu eu, ne ntshinyi tshidi katshiyi muji wabu?

▪ Butuku budi muntu nansha umue kayi mua kuenza mudimu ntshinyi?

▪ Padi muntu wondopibua, ngandamuinu wa aba badi bamumanye udi tshinyi?

▪ Mmunyi mudi Bafarizeyi badiabulula pa bidi bitangila kuondopibua kua muntu eu?