Nshapita wa 61

Diondopibua dia nsongalume mukokesha kudi demon

PADI Yezu, Petelo, Yakobo ne Yone kukuabu, imue misangu ku lusongo kampanda lua Mukuna wa Hermone, bayidi bakuabu badi babuelakana mu bualu. Mu dialukila diende, Yezu udi umona diakamue ne: kudi bualu. Musumba wa bantu mmunyungulule bayidi bende, ne baskribe badi bakokangana nabu ku mêyi. Padibo bamona Yezu, bantu badi bakema bikole ne badi banyema lubilu bua kumuakidila. “Nudi nuelangana nabu mpata pa tshinyi?” ke mudi Yezu webeja.

Upita kumpala kua musumba, muntu kampanda udi utua binu kumpala kua Yezu ne umvuija ne: “[Mulongeshi, NW], ndi muvue ne muananyi kuudi muikale ne spiritu wa bumama. Muaba wonso udiye umukuatshila, udi umututa panshi, muana upatula ntutu, ututakaja meno, utandabala. Meme kulomba kudi balongi bebe bua kumuipata, bobo kupangila.”

Bidi bimueneka se: baskribe badi baseka bayidi bualu bapangi kuondopa nsongalume, basendeka pamu’apa madikolela abu. Anu pa dîba edi didi kapia kamba kutuka bayidi mukana, Yezu udi ufikilapu: “O tshipungu tshibule ditabuja,” ke mudiye wamba, “nentungunuke kuikala nenu musangu bule kayi? Nengambule bujitu buenu musangu bule kayi?” (NW)

Yezu udi umueneka wamba miaku eyi bua yonso udipu, kadi, kabiyi mpata udi uyilamika nangananga baskribe, bualu ke badi bakebele bayidi bende lutatu. Pashishe, Yezu udi wakula bua nsongalume, wamba ne: “Muntuadilayi.” Kadi, padi nsongalume wenda usemena kudi Yezu, demon udi umukokesha udi umunyaka panshi ne umupaluisha bia tshikisu. Nsongalume udi ubunguluka panshi ne upatula ntutu ku mishiku.

“Bidi bimuenzekela nunku [katshia, NW] ku dîba kayi?” ke mudi Yezu webeja.

Tatu udi wandamuna ne: “Biangatshile ku buana buende; misangu mivule [demon] ukadi mumuele mu kapia ne mu mayi bua kumushipa.” Pashishe tatu eu udi usengelela ne: “Bu wewe mua kumuenzelaku bimpe, utuambuluishe, utufuile luse.”

Kukadi pamu’apa bidimu bivule, tatu eu utu ukeba diambuluisha. Mpindieu, bua kupangila kua bayidi ba Yezu, kujimija kuende kua ditekemena nkunene. Ushindamena pa mêyi a muntu eu a dilomba dikole, Yezu udi wamba bua kumukolesha ku muoyo ne: “Miaku eyi: ‘Bu wewe mua’! Bushuwa, bintu bionso bidi mua kuenzekela muena ditabuja.” (NW)

“Ndi ne ditabuja!” ke mudi tatu wela lubila ne lukasa luonso, kadi umusengelela ne: “Ngambuluisha mu muanda undi nkengela ditabuja!” (NW)

Padiye umona ne: musumba udi unyema mutangile kudibo, Yezu udi ukanyina demon ne: “Wewe spiritu wa bumama ne wa mapapa, ndi nkutumina diyi, patuka munda muende, kupinganyimu kabidi.” Mu kupatuka kua demon, udi welesha kabidi nsongalume mbila ne umupaluisha bikole. Pashishe nsongalume udi ushala mulale kayi unyunga, bisaka bavule ku diamba ne: “Wafu!” Kadi, Yezu udi ukuata nsongalume ku tshianza, ne wimana kulu.

Musangu uvua bayidi batumibue bua kufila bumanyishi, bavua bipate ba-demon. Nunku mpindieu, padibo babuela mu nzubu kampanda, badi bebeja Yezu pa nkayabu ne: “Bua tshinyi tuapangi kumuipata?” (NW)

Bua kuleja se: bivua bua kupanga kuabo kua ditabuja, Yezu udi wandamuna ne: “Wa mushindu ewu kêna mua kupatuka kabiyi ku disambila.” (NW) Bidi bimueneka se: bivua bikengela didilongolola bua kuipata demon eu wa bukole bua pa buabu. Bivua bikengela ditabuja dikole ne kusambila Nzambi bua afile bukole buvua bukengedibua.

Pashishe, Yezu udi usakidila ne: “Bulelela, ndi nnuambila ne, Binuikala ne ditabu[j]a bunene bua lutete lua mutada, nenuambile mukuna eu ne, Umukaku, ya kuaka, neumuke; kakuena bualu budi mua kunukolela.” Mbukole kayipu budi ditabuja mua kuikala nabu!

Bipumbishi ne ntatu bidi bijingakaja malubuluka mu mudimu wa Yehowa bidi mua kumueneka kabiyi kusambuka ne bikole mua kumbusha anu bu mukuna munene muena-dîna. Pabi, Yezu udi uleja ne: bituadima ditabuja mu mitshima yetu, bituikala tudimiamina mâyi ne tudisaka ku didiunda, nedikole too ne ku diboba ne neditupeteshe bukole bua kutshimuna bipumbishi ne ntatu bia mushindu’eu bidi bifuanangane ne mukuna. Markus 9:14-29; Mateus 17:19, 20; Lukas 9:37-43, Mukenji Mulenga.

▪ Padi Yezu ufumina ku Mukuna wa Hermone, mmuanda kayi udiye usangana?

▪ Ndikolesha ku muoyo kayi didi Yezu upesha tatuende wa nsongalume mukokesha kudi demon?

▪ Bua tshinyi bayidi kabavua ne bukole bua kuipata demon?

▪ Bilondeshile mêyi a Yezu, bukole bua ditabuja budi mua kufikisha ku dienza tshinyi?