Nshapita wa 117

Disumpakana mu budimi

PADI Yezu ujikija kusambila, yeye ne bapostolo bende ba lulamatu 11 badi bimba misambu ya disamuna Yehowa. Pashishe, badi batuluka ku tshibambalu tshia kuulu, bapatuka mu mîdima mifumfule ya butuku, ne balukila ku Betaniya pa kupitshila mu Tshibanda tshia Kedrone. Kadi mu njila, badi bimana pa muaba udibu batambe kunanga, budimi bua Njetsemanyi. Buine ebu budi pa Mukuna wa Olive peshi ku luseke kuawu. Yezu ne bapostolo bende bavua misangu mivule bapetangana muaba eu mu mitshi ya olive.

Ushiya muanda-mukulu ba ku bapostolo​—pamu’apa pabuipi ne tshibuelelu tshia mu budimi—​udi ubatumina dîyi ne: “Sombayi apa pantshidi nya kuaka bua kusambila.” Pine apu udi wangata bakuabu basatu​—Petelo, Yakobo ne Yone—​ne usemena kumpala mu budimi. Yezu udi utuadija kubungama ne kusumpakana bikole. “Anyima wanyi mmubungame bikole, too ne ku lufu mene,” ke mudiye ubambila. “Shalayi apa ne nuikale batuishile mêsu.”

Usemena kumpala kakese, Yezu udi upona panshi, utua mpala mu buloba ne utuadija kusambila ne muoyo umue ne: “Tatu wanyi, pikalaku mushindu, lupanza elu lupitshile kule nanyi. Tshidibi, ki mbu mundi musue, kadi bu muudi musue.” Udi usua kuamba tshinyi? Bua tshinyi udi “mubungame bikole, too ne ku lufu luine”? Ng’wela nyima ku dipangadika diende dia kufua ne kufila tshia-bupikudi anyi?

Nansha kakese! Yezu kêna ulomba bua kuepudibua ku lufu. Lungenyi luine lua kuepuka lufu lua mulambu, bu muakamubela Petelo musangu kampanda, ludi lua muendi kudiye. Tshidibi, udi usumpakana bualu udi utshina se: lufu luafuaye mu katupa kîpi emu​—bu muena tshibawu wa kupetula—​kaluvu kuendeshila dîna dia Tatuende lumu lubi. Udi umvua mpindieu ne: mu mêba makese udi pa kupopedibua pa mutshi bu muntu mubiamubi​—musendeki wa Nzambi! Muanda eu ke udi utamba kumutonda.

Mumane kusambila musangu mule, Yezu udi walukila ne usangana bapostolo aba basatu balale tulu. Mutangile kudi Petelo, udi wamba ne: “Kanuvuaku mua kushala batabale nanyi dîba dimue anyi? Shalayi batuishile mêsu ne nutungunuke ne kusambila, bua kanuvu kubuela mu ditetshibua.” Kadi, ujingulula muvuabu ne kupampakana kukole ne bu mukadibi mêba makole, udi wamba ne: “Muoyo wa muntu udi utamba kujinga bua kuenza bimpe, kadi mubidi wende udi mutekete.” (Muanda mulenga lelu)

Yezu udi uya musangu muibidi ne ulomba bua Nzambi asemeje “lupanza elu” kule nende, luine ludi luleja tshidi Yehowa mumufundile, peshi disua diende pa bidi bimutangila. Padiye walukila, udi usangana kabidi bapostolo aba basatu balale dîba mene divuabu mua kuikala basambila bua kababuedi mu ditetshibua. Padi Yezu wakula nabu, kabena bamanya tshia kumuandamuna.

Ndekelu wa bionso, musangu muisatu, Yezu udi uya, ntanta bu wa dibue dikupa, ne utua binu panshi, pa kuela mbila mikole ne binsonji, udi usambila ne: “Tatu, biwasua, semeja lupanza elu kule nanyi.” Yezu udi umvua bisama bikole bua lumu lubi luikala lufu luende bu muena tshibawu mua kutuadila dîna dia Tatuende. Ee, kupiishibua bu musendeki wa Nzambiz​—eu udi utshipa Nzambi—​ndungenyi kayipu lutondeshi lukena kuanyisha!

Kadi, Yezu udi utungunuka ne kusambila ne: “Ki ntshindi meme musue, kadi tshiwudi wewe musue.” Bu muena butumike, Yezu udi uladika disua diende muinshi mua disua dia Nzambi. Dîba edi, muanjelu kampanda mufume mu diulu udi umumuenekela ne umukolesha ne mêyi makese a dikankamija. Misangu mikuabu, muanjelu udi wambila Yezu ne: Tatuende udi utua mimuemue ya dimuanyisha.

Pine apu, mbujitu kayipu budi pa makaya a Yezu! Muoyo wa kashidi buende yeye muine ne bua bukua-bantu bonso udi utembelela pa tshipiminu. Disumpakana kadiena kuelekeja. Nunku, Yezu udi utungunuka ne kusambila ne lukunukunu, bisululu biende mene bidi bivua bu mamata a mashi adi apona panshi. “Nansha mutu muanda bu nunku wenzeka ku mpukapuka menemene,” ke mudi tshibejibeji tshia The Journal of the American Medical Association tshiumvuija, “tshisululu tshia mashi . . . tshidi mua kupatuka mu nsombelu ya kusumpakana kupite bukole.”

Pashishe, Yezu udi walukila kudi bapostolo bende musangu muisatu ne ubasangana anu balale. Mbabotoloke bua dibungama dikole didibu nadi. “Mu tshikondo bu etshi nuenu nudi nulala ne nuikisha!” ke mudiye utua tshikemu. “Kuajiki! Dîba diakumbanyi! Monayi! Muana wa muntu udi ufidibua mu bianza bia bena mpekatu. Jukayi, Tuyayi. Monayi! Mumfidi kudi baluishi wasemenyi pabuipi.”

Anu patshidiye wakula, Yudase Iskaryote udi usemena, mutua munyima kudi musumba munene muambule bimunyi, miendu ne bia-mvita. Matayo 26:30, 36-47; 16:21-23; Mâko 14:26, 32-43; Luka 22:39-47; Yone 18:1-3; Ebelu 5:7, NW.

▪ Bamane kumbuka mu tshibambalu tshia kuulu, nkuepi kudi Yezu ulombola bapostolo, ne ntshinyi tshidiye wenza kuine aku?

▪ Mu lupolo ludi Yezu usambila, bapostolo badi benza tshinyi?

▪ Bua tshinyi Yezu udi usumpakana, ne mmulombo kayi udiye wenza kudi Nzambi?

▪ Kuandamuka kua bisululu bia Yezu mamata a mashi kudi kuleja tshinyi?