Nshapita wa 34

Disungula bapostolo bende

KUDI mpindieu bu tshidimu tshijima ne tshitupa katshia Yone Mubatiji waleja Yezu bu Muan’a mukoko wa Nzambi ne katshia Yezu muine watuadija mudimu wende wa patoke. Kudi mpindieu matuku mavule katshia André, Simone Petelo, Yone ne pamu’apa Yakobo (muanabo ne Yone), kabidi ne Filipe ne Natanaele (udi ubikidibua kabidi Bartelemi), balua bayidi ba Yezu. Pashishe, bakuabu bavule bakadisangisha kudibu bua kulonda Yezu.

Mpindieu, Yezu ukadi pa kusungula bapostolo bende. Bine aba nebikale benzejanganyi nende ba mudimu ba pa muoyo bapeshibua dilongesha-dibidiji dia pa buadi. Kadi, kumpala kua kubasungula, Yezu udi uya ku mukuna ne upitshishaku butuku bujima pa kusambila, bimueneka ne: udi ulomba meji ne dibenesha kudi Nzambi. Padi butuku butshia, udi ubikila bayidi bende ne usungula 12 ba kudibu. Kadi, bu mudibo batungunuka ne kuikala balongi ba Yezu, badi’anu babikidibua kabidi bayidi.

Yezu udi usungula basambombo bena mêna adi kulu eku, aba bavua balue bayidi bende ba kumpala. Matayo, uvua Yezu mubikile ku biro biende bia dilambuisha bitadi, udi usungudibua. Batanu bakuabu badiye usungula ke: Yudase (Udi ubikidibua kabidi Tadé), Yudase Iskariote, Simone muena Kana, Tomase ne Yakobo, muana wa Alfé. Yakobo eu udi ubikidibua kabidi Yakobo Muana, imue misangu bualu mmuîpi ne ng’wa mubidi mukese peshi mmuakunyi ku bidimu kudi mupostolo mukuabu Yakobo.

Bine aba 12 badi ne Yezu kukadi lupolo kampanda, ne mmubamanye bimpe. Kabidi, bamue ba kudibo mbalela bende. Yakobo ne muanabo Yone kabiyi mpata mbana ba mamuende mukuabu wa Yezu. Alfé uvua mua kuikala bushuwa muanabo ne Yozefe, tatu mudiishi wa Yezu. Nunku, mupostolo Yakobo, muana wa Alfé, uvua mua kuikala pende muana wa tatuende mukuabu wa Yezu.

Bushuwa, Yezu kêna ne lutatu bua kuvuluka mêna a bapostolo bende. Kadi, udiku pebe mua kuavuluka anyi? Mbipepele, udi’anu mua kuvuluka ne: kudi babidi badi babikidibua Simone, babidi badi babikidibua Yakobo ne babidi badi babikidibua Yudase, kudi André muanabo ne Simone, ne Yone muanabo ne Yakobo. Mushindu’eu, udi mua kuanji kukuata ku muoyo mêna a bapostolo muanda-mukulu. Ku banayi bakuabu kudi mulambuishi wa bitadi (Matayo), eu wakela mpata pashishe (Tomase), ne eu uvua muinshi mua mutshi pakamubikilabu (Natanaele), pamue ne mulunda wende Filipe.

Anu bu Yezu, bapostolo 11 mbena mu Ngalileya. Natanaele mmuena ku Kana. Filipe, Petelo ne André mbena ku Betesaïda, kadi Petelo ne André bakaya pashishe kusombela mu Kapernaume muvua, anu mudibi bimueneka, Matayo musombele pende. Yakobo ne Yone bavua balobi ne mbimueneke bu bavua basombele pabo mu Kapernaume anyi pabuipi ku mpenge kuende. Mbimueneke se: Yudase Iskariote, eu wakafila Yezu pashishe mu bianza bia baluishi, ke mupostolo umuepele uvua mufumine ku Yudeya. Mâko 3:13-19; Luka 6:12-16.

▪ Mbapostolo kayi bavua mua kuikala balela ba Yezu?

▪ Bapostolo ba Yezu mbanganyi, ne mmunyi muudi mua kuvuluka mêna abo?

▪ Bapostolo mbafumine mu rejon kayi mishilangane?