Nshapita wa 36

Ditabuja dinene dia mfumu wa basalayi

PADI Yezu wenza Muyuki wende wa pa Mukuna, ukavua muenze bu tshiabibidi tshia buambi buende bua patoke. Ebi bidi biumvuija se: nkumushadile anu bu tshidimu tshimue ne ngondo tshitema bua kujikija mudimu wende pa buloba.

Yezu udi ubuela mpindieu mu tshimenga tshia Kapernaume, mudiye mutambe kushindamena ne midimu yende. Muin’emu bakulu ba bena Yuda badi basemena kudiye ne mulombo kampanda. Mbatumibue kudi mfumu kampanda wa basalayi wa biluilu bia bena Roma, Mumpangano, muntu wa mashi mashilangane ne bena Yuda.

Musadidi munanga wa mfumu wa basalayi eu udi pabuipi ne kufua bua disama dikole, nunku mmusue bua Yezu wondope musadidi wende eu. Bena Yuda badi basengelela Yezu bikole mu dîna dia mfumu wa basalayi: “Mmukumbanyine bua wewe kumuenzelabu,” ke mudibo bamba, “bualu mmunange ditunga dietu ne yeye nkayende mmutuibakile nsunagoga.”

Kayi mua kuelakana, Yezu udi uya ne bantu aba. Kadi, pakadibo pa kufika, mfumu wa basalayi udi utuma balunda bende bua kumanyisha ne: “Mukalenge, kuditatshishi to, bualu tshiena mukumbanyine bua wewe kubuela muinshi mua musonge wa nzubu wanyi. Ke bualu kayi ndi mudimone tshiyi mukumbanyine mua kulua kuudi.”

Nkudipuekesha kayipu kudi mfumu wa basalayi udi muibidile kutumina bakuabu dîyi! Kadi, pamu’apa udi kabidi welangana meji bua Yezu, bualu mmumanye mudi bilele bikandika bena Yuda bua kubuelakana ne bakena bena Yuda. Nansha Petelo wakamba ne: “Nudi bamanye ne: mbikandika bikole bua muena Yuda kumvuanganaye ne muenyi nansha bua kubuela ku nzubu kuende.” (Mukenji Mulenga)

Imue misangu, ne dijinga dia kuepula Yezu ku disambuka tshilele etshi ne kuvua kutatshishibua, mfumu wa basalayi udi utuma balunda bende bua kumulombela ne: “Wambe dîyi, ne musadidi wanyi asangale. Bualu ndi panyi muntu muteka kuinshi kua bukokeshi bua mukuabu, muikale ne basalayi kuinshi kuanyi, ne ndi ngambila umue ne: ‘Yaku!’ ne udi uya, ne kudi mukuabu: ‘Luaku!’ ne udi ulua, ne kudi mupika wanyi: ‘Enza etshi!’ ne utshienza.”

Bushuwa, padi Yezu umvua nunku, udi ukema bikole. “Ndi nnuambila bulelela,” ke mudiye wamba, “tshiena musangane ditabuja bunene nunku kudi muntu nansha umue mu Izalele.” Yeye mumane kuondopa musadidi wa mfumu wa basalayi, Yezu udi ubabidila muanda eu bua kumanyisha ne: bena ditabuja bakena bena Yuda nebapete disanka dia kulabula mabenesha adibo bimansha kudi bena Yuda babule ditabuja.

“Bavule,” ke mudi Yezu wamba, “nebafumine ku bitupa bia ku Est ne ku bitupa bia ku Ouest ne nebadiadije ku mesa ne Abrahame, Izaka ne Yakoba mu bukalenge bua mu muulu; kadi bana ba bukalenge nebedibue pambelu mu mîdima. Ke pikala miadi ne kuketa kuabo kua menu.”

“Bana ba bukalenge . . . bedibue pambelu mu mîdima” mbena Yuda ba ku tshileledi badi babenga kubabidila mushindu udi mubapesha buobo diambedi bua kulua bakokeshi pamue ne Kristo. Abrahame, Izaka ne Yakoba badi baleja ndongoluelu wa Bukalenge bua Nzambi. Nunku, Yezu udi umanyisha mushindu wakidilabo bantu ba matunga a bende bua kudiadijabo ku mesa a mu diulu, mu ngakuilu kampanda, “mu bukalenge bua mu muulu.” Luka 7:1-10; Matayo 8:5-13, NW; Bienzedi 10:28.

▪ Bua tshinyi bena Yuda badi basengelela Yezu mu dîna dia mfumu wa basalayi Mumpangano?

▪ Ntshinyi tshidi mua kumvuija bua tshinyi mfumu wa basalayi ki mmubikile Yezu bua kubuela mu nzubu muende?

▪ Yezu udi usua kumvuija tshinyi ku mêyi ende a nkomenu?