Nshapita wa 122

Ditambakajibua kua Pilato ne Herodese

BU MUDI Yezu kayi uteta bua kusokoka se: udi mukalenge kumpala kua Pilato, udi umvuija ne: Bukalenge buende ki ntshiluishi bua Roma. “Bukalenge buanyi kabuena bua mu bulongolodi ebu,” ke mudi Yezu wamba. “Bu bukalenge buanyi buikale bua mu bulongolodi ebu, bantu banyi bavua kuluangana bua tshifidibu kudi bena Yuda. Kadi, tangila, bukalenge buanyi kabuena bufumina ku mpokolo eu.” Nunku, Yezu udi witaba misangu isatu ne: udi ne Bukalenge, tshidibi kabuena ne mpokolo pa buloba.

Kadi, Pilato udi umutshintshimika kabidi ne: “Nunku, bushuwa udi mukalenge?” Mbuena kuamba ne: udi mukalenge nansha mudi Bukalenge buebe kabuyi bua mu bulongolodi ebu anyi?

Yezu udi ufikisha Pilato ku dimanya se: mmufile nkomenu mujalame, pa kuandamuna ne: “Wewe muine udi wamba mundi mukalenge. Ndi muledibue bua bualu ebu, ne ndi mulue mu bukua-bantu bua bualu ebu: bua kufila bumanyishi budi butangila bulelela. Yonso udi ku luseke lua bulelela udi uteleja dîyi dianyi.”

Eyowa, tshipatshila tshine tshia muoyo wa Yezu pa buloba ntshia kufila bumanyishi budi butangila “bulelela,” nangananga bulelela budi butangila Bukalenge buende. Yezu mmudiakaje bua kushala muena lulamatu ku bulelela ebu nansha biobi bimulomba kufuta muoyo wende. Nansha mudi Pilato webeja ne: “Bulelela ntshinyi?” kêna windila diumvuija dikuabu. Bikadiye mumvue mbikumbane bua kukosa tshilumbu.

Pilato udi upingana kudi musumba udi muindile pambelu pa dibalasa. Ne Yezu ku luseke luende, anu mudibi bimueneka, udi wambila bakuidi banene ne aba badibu nabu ne: “Tshiena musangane bualu bubi mu muntu eu.”

Pa kufika munda bua dipangadika edi, misumba idi ituadija kufiatutuka ne: “Udi utomboja bantu pa kulongesha mu Yudeya mujima, kumukila mene ku Ngalileya kuvuaye mutuadijile too ne munemu.”

Disuminyina dia bulembakane dia bena Yuda didi ne bua kukemesha Pilato. Nunku, padi bakuidi banene ne bakulu batungunuka ne kuela mbila, Pilato udi ukudimuka kudi Yezu ne webeja ne: “Kuena umvua malu bungiwu adibu bakubanda nawu anyi?” Kadi, Yezu kêna uteta kuandamuna nansha kakese. Kupolesha kuende kumpala kua matumpi aa a bupumbe kudi kukemesha Pilato.

Padiye umanya ne: Yezu mmuena Ngalileya, Pilato udi upetela pa kudiumusha bujitu buende. Mukokeshi wa Ngalileya, Herodese Antipase (muana wa Herodese Munene), mmuvue mu Yeruzaleme bua Pasaka, nunku Pilato udi umutumina Yezu. Musangu mushale, Herodese uvua mukoseshe Yone Mubatiji mutu, ne pashishe Herodese wakumvua buôwa pakapetaye lumu lua bishima bivua Yezu wenza, utshina se: Yezu kikadi bushuwa Yone mubiishibue ku bafue.

Mpindieu, Herodese udi usanka bikole pa kutekemena bua kumona Yezu. Ki mbualu udi uditatshisha bua diakalenga dia Yezu peshi ujinga kuenza madikolela a bushuwa bua kumanya bikala malu adibo bamufunda nawu malelela anyi a dishima. Bishilangane, udi ujinga anu kumona patupu ne mmutekemene bua kumona Yezu wenza bimue bishima.

Pabi, Yezu udi ubenga kusankisha dijinga dia Herodese. Kabidi, padi Herodese umuebeja, kêna wamba dîyi nansha dimue. Bua dipanga kusankishibua edi, Herodese ne basalayi bamulami badi baseka Yezu. Badi bamuvuadika tshilamba tshidi tshiengelela ne bamutshimbakaja. Pashishe badi bamupingaja kudi Pilato. Bu tshipeta, Herodese ne Pilato, bavua baluishi diambedi, badi bavua balunda bimpe.

Padi Yezu upingana, Pilato udi ubikidisha bakuidi bamfumu, bamfumu ba bena Yuda ne bena ditunga, ubambila ne: “Nudi bantuadile muntu ewu ne: udi utombola bantu, kadi ndi mumulumbuluishe kumpala kuenu, tshiena mumusangane ne bualu nansha bumue bua kumupisha nabu ku bionso binudi numusonguela. Herodese kabidi kena mumusangane ne bualu, ke padiye mutupingajilaye. Nenku nudi bamone se: muntu ewu kena muenze bualu budi buakanyine lufu to. Nemmunyoke, pashishe mmulekele.” (MMM)

Nunku, Pilato wajadiki misangu ibidi mudi Yezu kayi ne bualu. Udi ujinga bikole bua kumulekela, bualu mmujingulule se: bakuidi mbamufile mu bianza biende bua lubabu patupu. Patshidi Pilato mutungunuke ne kuteta mua kulekela Yezu apu, udi mene upeta lumu ludi lumusaka bikole bua kuenza nunku. Padiye mu nkuasa wende wa bunzuji, mukajende udi umutumina mukenji, udi umulomba ne: “Kubuelakanyi mu tshilumbu tshia muntu muakane au, bualu mvua mukenge bikole lelu mu tshilota [tshifume kudi Nzambi, anu mudibi bimueneka] bualu buende.”

Kadi, bu mudiye mushindike bua kuenza nunku, mmunyi mudi Pilato mua kulekela muntu eu ukena ne bualu? Yone 18:36-38; Luka 23:4-16; Matayo 27:12-14, 18, 19; 14:1, 2; Mâko 15:2-5, NW.

▪ Mmunyi mudi Yezu wandamuna ku lukonko ludi lutangila kukokesha kuende?

▪ “Bulelela” buvua Yezu mufidile bumanyishi mu matuku a muoyo wende pa buloba ntshinyi?

▪ Mmunyi mudi Pilato ukosa tshilumbu, ngandamuinu wa bantu udi munyi, ne ntshinyi tshidi Pilato wenza ne Yezu?

▪ Herodese Antipase nnganyi, bua tshinyi udi usanka bikole bua kumona Yezu, ne mmalu kayi adiye umuenzela?

▪ Bua tshinyi Pilato udi ujinga bikole bua kulekela Yezu?