Nshapita wa 90

Ditekemena dia dibiishibua

NDEKELU wa bionso, Yezu udi ufika ku mpenga kua Betaniya, musoko udi mutantshi wa kilometre bu isatu kumukila ku Yeruzaleme. Matuku makese patupu akadi mapite katshia Lazare wafua ne wajiikibua. Bana babo ba bakaji, Mariya ne Marta batshidi badila, ne bantu bavule mbalue ku nzubu wabu bua kubasamba.

Padibo badila apu, muntu kampanda udi umanyisha Marta ne: Yezu udi mu njila. Nunku udi uya lukasa bua kusambakena nende, bimueneka bu uvua kayi muambile muanabo wa bakaji. Ufika kudi Yezu, Marta udi wambulula miaku idibo ne bua kuikala bambe misangu mivule, yeye ne muanabo wa bakaji, mu matuku anayi mashale ne: “Mukelenge, bu wewe muikale kunoko, muan’etu kakadi kufua.”

Kadi Marta udi uleja ditekemena, pa kuamba mu mushindu mububika ne: Yezu utshidi’anu mua kuenza tshintu kampanda bua muanabo wa balume. ‘Ndi mumanye ne: tshionso tshiwalomba Nzambi, Nzambi neakupetshi.’

“Muanenu neabike kabidi,” ke mudi Yezu umulaya.

Ngumvuilu wa Marta udi se: Yezu udi wakula bua dibiishibua ditshilualua dia aba bapiana buloba, dine divua Abrahame ne basadidi bakuabu ba Nzambi bindile pabo. Nunku udi ukudimuna ne: “Ndi mumanye ne, Yeye neabike [ku dibiishibua, NW] dituku dia kunshikidilu.”

Kadi, Yezu udi ufila ditekemena dipeteshi dia disulakana anu mpindieu, ukudimuna ne: “Ndi dibiishibua ne muoyo.” (NW) Udi uvuluija Marta ne: Nzambi mmumupeshe bukokeshi pa lufu, wamba ne: “Eu udi wenza midimu ya ditabuja mu meme, nansha yeye mufue, neapingane ku muoyo; ne eu yonso udi ne muoyo ne wenza midimu ya ditabuja mu meme kakufua nansha kakese.” (NW)

Yezu kêna usua kumanyisha Marta ne: bena lulamatu badi ne muoyo mu tshikondo tshiende kabakufua nansha kakese. Tòo, kadi udi’anu usua kumumvuija ne: dienza midimu ya ditabuja mu yeye Didi mua kufikisha ku muoyo wa kashidi. Muoyo wa mushindu’eu neupianyibue kudi bantu bavule bu tshipeta tshia dibiishibua ku lufu mu dituku dia ndekelu. Kadi bakuabu badi bena lulamatu nebapanduke ku nshikidilu wa ndongoluelu eu wa malu pa buloba, ne bua bine aba mêyi a Yezu neikale malelela mu ngumvuilu wa ku dîna. Kabakufua nansha kakese! Mumane kuamba mêyi aa a kukatshila, Yezu udi webeja Marta ne: “Udi witaba bualu ebu anyi?” (NW)

“Eyowa, Mukalenge,” ke mudiye wandamuna. “Ndi muitabuje ne: udi Kristo Muana wa Nzambi, Eu udi ulua mu bukua-bantu.” (NW)

Pashishe, Marta udi upingana lukasa bua kubikila muanabo wa bakaji, umuambila pa nkayende ne: “Muyishi wakulua, udi ukubikila.” Diakamue Mariya udi umuka ku nzubu. Padi bakuabu bamumona uya, badi bamulonda, batshinka ne: udi uya ku lukita lua tshivulukilu.

Padiye ufika padi Yezu, Mariya udi upona ku makasa ende ne kudila. “Mukelenge, bu wewe muikale kunoko, muan’etu kakadi kufua,” ke mudiye wamba. Yezu udi ubungama bikole padiye umona Mariya ne misumba ya badi bamulonda benda badila. Udi webeja ne: “Nuakumujika kudi kunyi?”

“Mukelenge, lua umone,” ke mudibo bandamuna.

Yezu pende udi utuadija kupuekesha binsonji, bifikisha bena Yuda ku diamba ne: “Monayi, nkunanga kayipu kuvuaye mumunange!” (NW)

Bamue badi bavuluka ne: kukadi ngondo mikese dîba dia Difesto dia Mitàndà, Yezu uvua muondope nsongalume kampanda mulela mpofo, ne badi bakonka ne: “Muntu eu wakatab[ej]a mesu a wakadi mufofo, kakamanya mua kusungila muntu’eu, [bua] kafu bi[e]nd[e], munyi?” Yone 5:21; 6:40; 9:1-7; 11:17-37.

▪ Ndekelu wa bionso ndîba kayi didi Yezu ufika pabuipi ne Betaniya, ne mmuanda kayi udiye ututakena nawu kuine eku?

▪ Ditabuja dia Marta mu dibiishibua ndiashila pa tshishimikidi kayi?

▪ Mmunyi mudi Yezu ubungamijibua kudi lufu lua Lazare?