Nshapita wa 79

Ditunga dijimine, kadi ki mmu kabujima

KATUPA kîpi padi Yezu ujikija kuakula ne bantu bavua bunguile kumpala kua nzubu wa Mufarizeyi kampanda, bamue bantu badi bamulondela ‘bua bena Ngalileya bavua [nguvernere wa Roma, Ponsio] Pilato musambakaje mashi abo ne a milambo yabu.’ Bena Ngalileya aba imue misangu ng’aba bakashipabo dîba divua bena Yuda binunu bivule batontolola Pilato bua ditumika diende ne mfranga ya ntempelo bua kuibakisha munkoloji wa dituala mâyi mu Yeruzaleme. Bantu badi balondela Yezu muanda eu badi pamu’apa basua kumvuija ne: bena Ngalileya aba mbapetangane ne diakabi edi bua bienzedi bibi biabu nkayabu.

Kadi, Yezu udi ululamija mmuenenu wabu, pa kuebeja ne: “Nudi nuela meji ne: bena Ngalileya badibo bashipe abo mbapite bena Ngalileya bakuabo bonso ku bubi anyi? Ndi nnuambila ne: ki mmomo to,” ke mudi Yezu wandamuna. Pashishe, udi upeshelapu bena Yuda didimuija edi: “Nuenu kanuyi [banyingalale, NW], nenubutuke bonso mushindu wa muomumue.”

Utungunuka, Yezu udi uvuluija mukuabu muanda mukuate buôwa muenzekele muinamu, imue misangu musuikakaja anu ku luibaku lua muine munkoloji au. Udi webeja ne: “Bantu dikumi ne muanda mukulu bavua kaleya ka Silowe kupukile pambidi abo, nudi nuela meji ne: bavua bobo ne bubi bupite bua bantu bonso badi basomba mu Yeruzaleme anyi?” Tòo, bantu aba kabakafua bua bubi buabo nansha, ke mudi Yezu umvuija. Bishilangane, ‘bikondo ne mianda kabiyi bipangadija’ ke bidi bituala pa tshibidilu malu makuate buôwa a mushindu’eu. Nansha nanku, Yezu udi ufidilapu didimuija edi: “Kadi nuenu [kanuyi banyingalale, NW] nenubutuke bonso muomumue.”

Pashishe, Yezu udi utungunuka pa kufila mufuanu mukumbanyine: “Muntu kampanda uvua mukune mutshi wa [mfigi, NW] mu budimi buende bua mvinyo. Kuvuaye kukeba bimuma ku mutshi awu, nanshaye kubisangana. Kuambilaye mudimi wa mvinyo ne: ‘Bidimu mbimane kukumbana bisatu bindi mvua kukeba bimuma ku mutshi wa [mfigi, NW] ewu, tshiyi mbisangana. Uukose; tshidiwo watuila buloba nenku ntshinyi?’ Awu kumuandamuna ne: ‘Mukalenge, anji kuulekela kabidi tshidimu etshi, nganji kumbula kuinshi kuawu, ngele bufuke. Pamue apa udi mua kuvua kukuama bimuma, tshianana neuukose.’”

Bidimu bipite pa bisatu, Yezu uvua mutete mua kudima ditabuja munkatshi mua ditunga dia bena Yuda. Kadi, amu bayidi nkama mikese ke badi mua kubadibua bu mamuma a mudimu wende mukole. Mpindieu, mu tshidimu etshi tshinayi tshia mudimu wende, udi uvudija madikolela ende, mu ngakuilu wa mu tshimfuanyi, udi umbula ne wela bufuke kuinshi kua mutshi wa mfigi wa bena Yuda, pa kufila bumanyishi ne pa kulongesha ne tshisumi mu Yudeya ne mu Pereya. Kadi, udi ukuata mudimu wa patupu! Ditunga didi dibenga kunyingalala, nunku diditeka mu nsombelu wa kabutu. Amu bashadile bungi bukese ba ditunga edi ke badi bandamuna bilenga.

Katupa kîpi pashishe, Yezu udi ulongesha mu nsunagoga kampanda dia Nsabatu. Udi umonamu mukaji kampanda wenda mukobame kukadi bidimu 18, bua disubishibua kudi demon. Ne dîyi dia luse, Yezu udi umuambila ne: “Mukaji, udi mupikudibue ku butekete buebe.” (NW) Pine apo, udi umutenteka bianza, ne diakamue, udi wololoka ne utuadija kutumbisha Nzambi.

Kadi, muludiki wa nsunagoga udi ufika munda. “Kudi matuku asambombo adi bantu ne bua kukuata mudimu,” ke mudiye utontolola, “nuvue kudiondapisha matuku awu, kadi ki [ndituku dia nsabatu, NW] to.” Nunku, muludiki eu udi witaba mudi Yezu ne bukokeshi bua kuondopangana, kadi udi upiisha bantu badi balua bua kuondopibua dia Nsabatu!

“Badingidiji ba malu nue!” ke mudi Yezu upindulula. “Muntu yonso wa kunudi eku kena mua kusulula ngombe wende, nansha mpunda wende mu tshikumbi dituku dia [nsabatu, NW] bua kuya kumunuisha mayi anyi? Kadi [mukaji eu, muana wa Abrahame, NW], uvua Satana musuike bidimu dikumi ne muanda mukulu, kabivua bimpe bua kumusulula nkanu yende eyi dituku dia [nsabatu, NW] anyi?”

Pa kumvua mêyi aa, baluishi ba Yezu badi batuadija kumvua bundu. Kadi musumba udi usanka bua malu wonso malenga adiwo umona Yezu wenza. Bu diandamuna, Yezu udi wambulula mifuanu ibidi ya milayi idi yakula bua Bukalenge bua Nzambi, mine ivuaye mulonde pavuaye mu buatu pa Mbuu wa Ngalileya kukadi tshidimu tshijima. Lukase 13:1-21, MMM; Muambi 9:11; Matayo 13:31-33.

▪ Mmianda kayi mikuate buôwa idi mitela apa, ne ndilongesha kayi didi Yezu upatuilaku?

▪ Ndiumvuija kayi didi mua kufidibua pa mutshi wa mfigi ukena ukuama mamuma ne pa madikolela a kuwufukisha bua kukuamawu?

▪ Mmunyi mudi muludiki wa nsunagoga witaba ne: Yezu udi ne bukokeshi bua kuondopangana, kadi mmunyi mudi Yezu utandula budingidiji bua muntu eu?