Nshapita wa 44

Dituuyisha tshipepele tshikuate buôwa

YEZU mmuenze mudimu wa bungi dituku dijima, mulongeshe misumba ku muelelu wa mâyi ne pashishe mupeshe bayidi bende diumvuija dia mifuanu pa nkayabu. Dilolo, udi ubambila ne: “Tusabukayi dishiya.”

Lua ku Est, dishiya dia mbuu wa Ngalileya, kudi rejon udibo babikila ne: Dekapole, dîna dienza ne miaku ibidi ya tshiena-Greke: deʹka, udi umvuija “dikumi,” ne poʹlis, udi umvuija “tshimenga.” Nansha mudi bena Yuda bavule basombelemu bushuwa, nshidimukilu wa buena-Greke mmuele miji mu bimenga bia Dekapole. Kadi, mudimu wa Yezu mu rejon eu mmukese mutambe. Nansha mu dikumbula edi, anu mutuabimona pashishe, nebamupumbishe bua kushalamu lupolo lule.

Padi Yezu ubambila bua kusabuka, bayidi badi bamuambula mu buatu. Kadi bantu badi’anu bamanya luendu luabo. Diakamue bamue badi bela abu mâtu pa mâyi bua kuya nabo. Muaba wa kusabukila ki mmule to. Bushuwa, Mbuu wa Ngalileya udi’anu dijiba dinene dia kilometre bu 20 mu bule ne mu butshiama kilometre bu 12 patupu.

Yezu mmupungile, ee, mbiumvuike. Ke bua tshinyi, lupolo luîpi panyima pa diela buâtu pa mâyi, udi udiolola ku tshitaku tshia buatu, uteka mutu pa musamu ne ulala tulu tukole. Bavule ba ku bayidi bende mbiitshi ba buâtu ba dilambu, balobelobe mu Mbuu wa Ngalileya. Nunku, badi badiitshila buâtu.

Kadi, luendu ludi lumueneka lubi. Padi kapepe kakuata lûya luvule pa mutu pa dijiba, kubanda muulu metre matue ku 200 kumukila pa mâyi, ne kapepe kafumfule kapupa mu mikuna idi ku mpenga, pamu’apa bipepele bikole bitu bituuta ne bikebesha mvunda mukole pa dijiba. Ke tshidi tshienzeka mpindieu. Diakamue mambuanka adi adituta ku buâtu, abunyukula ne akeba kubuitshikija. Kadi, Yezu mmutungunuke ne kulala!

Bamanyi ba mâyi ba dilambu aba badi batumika ne dimanya diabu dionso bua kuludika buâtu. Kabiyi mpata, bakaadiku bendeshe mâtu mêba a bipepele bikole. Kadi bua musangu eu, mbashikile menemene. Bua buôwa bua lufu, badi bajula Yezu ku tulu. ‘Mulongeshi, kabiena bikutond’anyi? Tudi tuamba kudiina!’ Ke mudibo bamudidila. ‘Tupandisheku, tudi tusua kufua mu mâyi!’

Padiye ujuka, Yezu udi utumina tshipepele ne mbuu dîyi ne: “Puwa, tuuya!” Anu pinapu, tshipepele tshidi tshilekela kutuuta, mbuu ubatama. Ukudimuka kudi bayidi bende, udi ubebeja ne: ‘Bua tshinyi nudi nutshina mushindu’eu? Kanuena banji kuikala ne ditabuja anyi?’

Padibo bamona muanda eu, bayidi badi bakuatshika buôwa bukole. ‘Eu muntu nnganyi menemene?’ ke mudibo bebejangana, ‘bualu udi utumina too ne tshipepele ne mâyi dîyi, ne bidi bimutumikila.’

Bushuwa, Yezu udi ne bukokeshi bunene! Ebi bidi bitujadikila ne: Mukalenge wetu udi ne bukokeshi pa bintu bifuka, nunku, mu bukokeshi bua Bukalenge buende patumaye ntema yende yonso pa buloba, bantu buonso nebakubibue, nebepudibue ku bipupu bia njiwu bia ku bintu bifuka!

Katupa kîpi kunyima kua dituuyisha tshipepele, Yezu ne bayidi bende badi bafika dishiya ku Est kakuyi udi mujiwuke. Bua mâtu makuabu, imue misangu mmapanduke pawu ku tshipepele etshi tshikole ne mmalukile ku mabo kakuyi bùdì bujiwuke. Mâko 4:35–5:1; Matayo 8:18, 23-27; Luka 8:22-26, NW.

▪ Dekapole ntshinyi, ne udi usanganyibua penyi?

▪ Mbintu kayi bifuka bidi bifikisha ku dituuta dia tshipepele pa Mbuu wa Ngalileya?

▪ Bu mudi mamanya abu a diita kaayi mua kubasungila, ntshinyi tshidi bayidi benza?