Nshapita wa 48

Diumuka kua Jairuse ne dikumbulula Nazarete

YEZU mmuenze bivule mu dituku edi​—luendu pa mbuu pa kufumina ku Dekapole, diondopa mukaji muena disama dia mashi, ne dibiisha muana wa bakaji wa Jairuse ku lufu. Kadi, dituku ki ndianji kutua ku tshibungubungu. Bidi bimueneka se: anu padiye umuka kua Jairuse, bafofo babidi badi balonda munyima, benda bela lubila ne: “Muana wa Davidi, tufuileku luse!”

Pa kubikila Yezu ne: “Muana wa Davidi,” bantu aba badi bitabuja patoke ne: Yezu mmupianyi wa muoba wa Davidi, nunku yeye ke Masiya mulaya. Kadi, Yezu udi wenza bu udi kayi umvua mbila yabo; pamu’apa bua kuteta dinanukila diabu. Kadi, bantu pabo kabena balekela. Badi balonda Yezu too ne kudiye usombela, ubuela mu nzubu, buobo pa makasa ende, bamulondamu.

Muinemu Yezu udi ubakonka ne: “Nudi nuitabuja ne: ndi mua kuenza buine bualu ebu anyi?”

“Eyowa, Mukalenge,” ke mudibo bandamuna ne dishindika dionso.

Nunku, pa kulenga mêsu abu, Yezu udi wamba ne: “Binuenzekele amu bilondeshile ditabuja dienu.” Diakamue, badi bapeta lumonu! Kadi, Yezu udi ubakandika ne dîyi dikolesha ne: “Nudimuke, kabumanyiki kudi muntu nansha umue.” Kadi, bu mudibo buwule tente ne disanka, badi bapua muoyo dîyi-dituma kudi Yezu ne balonda bualu buende kuonso mu ditunga.

Anu padi bantu aba bumuka, badi batuadila Yezu muntu mukuata kudi demon udi umupangisha kuakula. Yezu udi wipata demon, ne anu pinapu muntu udi utuadija kuakula. Misumba idi ikema bua bishima ebi, bamba ne: “Katshia katuena banji kumona bia nunku mu Izalele.”

Bafarizeyi badi pabo muaba eu. Kabena mua kuvila bishima ebi, kadi bua muoyo mubi ne kupanga kuabu kua ditabuja, badi bambulula mêyi abo a disendeka mpokolo wa bukole budi Yezu wenza nabu bishima, bamba ne: “Udi wipata ba-demon ku bukole bua mfumu wa ba-demon.”

Katupa kîpi panyima pa mianda eyi, Yezu udi upingana ku Nazarete, tshimenga tshidiye mukolele, musangu’eu udi ne bayidi bende. Kukadi bu tshidimu tshijima, uvua mukumbule nsunagoga ne mulongeshemu. Nansha muvua mitshima ya bantu milengibue kudi mêyi ende masheme ku ntuadijilu, bakalenduka pashishe bua dilongesha diende ne bakakeba kumushipa. Pa kubumvuila luse, mpindieu Yezu udi uteta tshiakabidi bua kuambuluisha bena mutumba nende ba kale.

Padi mu miaba mikuabu misumba ipuila kudi Yezu, munemu mbimueneke ne: kabena benza nanku. Nunku, dia Nsabatu, udi uya ku nsunagoga bua kulongesha. Bavule ba ku bamuteleji badi bakatshila. “Nkuepi kudi muntu eu mupetele aa meji ne bukole bua kuenza bishima?” ke mudibo bebeja. “Ki mmuana wa muena mabaya anyi? Mamuende diende ki mMariya, ne bana babo ba balume ki nYakobo, Yozefe, Simone ne Yudase anyi? Ne bana babo ba bakaji, buonso buabu kabena netu anyi? Kadi bionso ebi, muntu eu mmubipetele kuepi?”

‘Yezu udi’anu muena musoko eu bu tuetu,’ ke mudibo bela meji. ‘Tudi bamone mudiye mukole ne tudi bamanye dîku diende. Mmunyi mudiye mua kuikala Masiya?’ Nunku, nansha mudiye mufile bijadiki​—meji ende a bungi ne bishima—​badi’anu bamubenga. Nansha balela bende bine badi balenduka bua bualu buende, bualu mbamumanye bimpe bilondeshile malanda a buena dîku, ke tshidi tshisaka Yezu ku difila nkomenu eu: “Muprofete udi upepejibua anu mu musoko wabu ne munkatshi mua balela bende ne mua ba mu nzubu wende.”

Bushuwa, Yezu mmukemeshibue bua kupanga kuabu kua ditabuja. Nunku, kêna wenzamu bishima, pa kumusha ditenteka babedi bakese bianza ne dibondopa. Matayo 9:27-34; 13:54-58; Mâko 6:1-6; Yeshaya 9:7, NW.

▪ Pa kubikila Yezu ne: “Muana wa Davidi,” bafofo badi baleja ditabuja mu muanda kayi?

▪ Ndiumvuija kayi didi Bafarizeyi bafila pa bidi bitangila bishima bia Yezu?

▪ Bua tshinyi bidi kuleja luse padi Yezu upingana bua kuambuluisha bena mu Nazarete?

▪ Mmunyi mudibo bakidila Yezu mu Nazarete, ne mbua tshinyi?