Nshapita wa 25

Diumvuila muena nsudi luse

PADI Yezu ne bayidi bende banayi bakumbula bimenga bia mu Ngalileya, ngumu ya malu manene adiye wenza idi imuangalaka mu distrike dijima. Dinunganyi pa midimu yende didi difika too ne mu tshimue tshimenga mudi muena nsudi kampanda. Munganga Luka udi umvuija ne: muntu eu uvua “muwule tente ne nsudi.” Patu disama edi dikuate buôwa difika mu tshitupa tshibi ditu dizenga ku kakese ku kakese bitupa bishilangane bia mubidi. Nunku, muena nsudi eu udi mu nsombelu mukuate luse.

Padi Yezu ufika mu tshimenga, muena nsudi eu udi usemena kudiye. Bilondeshile Mikenji ya Nzambi, muena nsudi udi ne bua kudimuijangana pa kuela lubila ne: “Ukena mukezuke, ukena mukezuke!” bua kuepula bakuabu ku njiwu ya dibambulukila dia disama pa kutamba kusemena pabuipi nende. Mpindieu muena nsudi udi upona kumpala kuende, ne utendekena Yezu ne: “Mukalenge, biwasua bushuwa, unkezuleku.”

Nditabuja kayipu didi nadi muntu eu mu Yezu! Ee, mmushindu kayipu udi disama diende ne bua kumumuenesha mukuate luse! Yezu neenze tshinyi? Uvua pebe mua kuikala muenze tshinyi? Musakibue kudi luse, Yezu udi wolola tshianza tshiende ne ulenga muntu, wamba ne: “Ndi musue. Ukezudibue.” Diakamue, nsudi idi ijimina pambidi pende.

Kanuakuanyishaku bua kampanda muena luse lua mushindu’eu ikale mukalenge wenu anyi? Bualu budi Yezu muenzele muena nsudi eu budi butupa dishindika dia se: pakokeshaye bu Mukalenge, mulayi eu wa mu Bible neukumbane: “Neafuile udi mutekete ne udi ukengela dikuatshisha luse, neasungile mioyo ya bapele.” Eyowa, Yezu neakumbaje dijinga dia mu mutshima wende dia kuambuluisha bena tshinyongopelu buonso.

Kumpala mene kua kuondopaye muena nsudi, mudimu wa Yezu ntshiena-bualu tshinene tshia disanka tshidi bena ditunga bakula bikole. Pa kukumbaja mulayi wa Yeshaya, Yezu udi utumina muntu muondopa eu dîyi ne: “Kuambidi muntu bualu ebu.” Pashishe, udi umupa lungenyi-luludiki elu ne: “Uye biebe, udile[j]e kudi muakuidi, ufile biakamba Mose bu tshimanyishilu ku mesu kua bantu bualu bua kulenge[j]ibua kuebe.”

Kadi, bua disanka didiye nadi, muntu eu kêna mua kulama tshishima etshi buende nkayende. Udi uya ne utuadija kumuangalaja lumu miaba yonso, bimueneka se: udi mene utabuluja dijinga ne ntema bia bantu, bipangisha Yezu mua kubuela kabidi patoke mu tshimenga kampanda. Nunku, Yezu udi usomba mu miaba mipengame mudi muntu nansha umue kayi muase, ne bantu badi balua kudiye, bafuma ku nseke yonso bua kumuteleja ne kuondopibua ku masama abu. Luka 5:12-16; Mâko 1:40-45; Matayo 8:2-4, NW; Lewitiki 13:45; 14:10-13; Musambu wa 72:13; Yeshaya 42:1, 2.

▪ Mbuenzeji kayi budi nsudi mua kuikala nabu, ne ndidimuija kayi divua muena nsudi ne bua kuenza?

▪ Mmunyi mudi muena nsudi usengelela Yezu, ne ntshinyi tshitudi mua kulongela ku ngandamuinu wa Yezu?

▪ Mmunyi mudi muntu muondopa upanga kutumikila Yezu, ne ngenzelu eu udi upatula bipeta kayi?