Nshapita wa 60

Kadiosha ka butumbi bua Kristo mu Bukalenge buende

PADIYE ufika mu buloba bua Sezaré wa ku Filipoi, Yezu udi ulongesha musumba udi ukongoloja ne bapostolo bende. Udi ubamanyisha muanda eu wa dikema: “Bushuwa ndi nnuambila ne: ku badi bimane apa aba, bamue kabakufua diambedi kabayi banji kumona Muana wa muntu ulua mu bukalenge buende.”

‘Yezu udi usua kuamba tshinyi?’ ke mudi bayidi bende ne bua kudiebeja. Panyima pa lumingu bu lujima, Yezu udi wangata Petelo, Yakobo ne Yone, ubanda nabo ku mukuna mutumbuke. Bidi bu butuku, bualu bayidi badi babungila ne tulu. Padi Yezu munkatshi mua disambila, udi ukudimuka kumpala kuabo. Mpala wende udi utuadija kukenka bu dîba, bilamba biende bibalakana bu butoke.

Pashishe, bimfuanyi bibidi, bidisunguluja bu “Mozese ne Eliya,” bidi bimueneka ne bituadija kuyukila ne Yezu pa ‘diya diende didi ne bua kuenzekela ku Yeruzaleme.’ Kabiyi mpata, diya edi diumvuija lufu lua Yezu lulonda kudi dibiishibua diende. Nunku, diyukidilangana edi didi dijadika ne: lufu luende lua bundu ki ntshintu tshia kuepuka to, bu muvua Petelo ujinga.

Bu mudibo batabulujibua menemene mpindieu, bayidi badi batangila ne bateleja ne kukatshila. Nansha mudibi tshikena-kumona, bidi bimueneka muanda mulelela menemene, bisaka Petelo ku diela pende dîyi, wamba ne: “Mukalenge, mbilenga bituashala kuneku. Biwasua, nengase ntenta isatu, umue buebe wewe, umue bua Mozese ne umue bua Eliya.”

Mêyi a Petelo kaayi manji kujika, ditutu dibalakana didi dibabuikila, ne dîyi difuma mu ditutu didi diamba ne: “Eu udi Muananyi, munangibue wa pa muoyo, undi muanyishe, numuteleje.” Padibo bumvua dîyi, bayidi badi bakuluka mpala mitua panshi. Kadi, Yezu udi ubambila ne: “Jukayi ne kanutshinyi.” Padibo bajukuluka, kabena bamona muntu mukuabu, anu Yezu.

Makelela, padibo batuluka ku mukuna, Yezu udi ubatumina dîyi ne: “Kanuambidi muntu nansha umue tshikena-kumona etshi, too ne pabiishibua Muana wa muntu ku bafue.” Dimueneka dia Eliya mu tshikena-kumona didi dijudija lukonko kampanda mu lungenyi lua bayidi. “Bua tshinyi,” ke mudibo bebeja, “baskribe badi bamba ne: Eliya udi ne bua kulua diambedi?”

“Eliya ukadi mumane kulua,” ke mudi Yezu wamba, “kadi kabakamumanya.” Apa, Yezu udi wakula bua Yone Mubatiji, uvua mukumbaje mudimu wa muomumue ne wa Eliya. Yone mmulongolole njila bua Kristo, anu bu muvua Eliya muenze bua Elisha.

Ndikankamijibua kayipu dikole didi Yezu ne bayidi bende bapetela ku tshikena-kumona etshi! Tshikena-kumona etshi tshidi, mu ngakuilu kampanda, kadiosha ka butumbi bua Kristo mu Bukalenge buende. Bushuwa, bayidi bamonyi “Muana wa muntu ulua mu bukalenge buende,” anu muvua Yezu mulaye kukadi lumingu lumue. Panyima pa lufu lua Yezu, Petelo neafunde muvuabo ‘balue bamonyi ba butumbi bua Kristo pavuabo nende pa mukuna munsantu.’

Bafarizeyi bavua balombe Yezu tshimanyinu tshijadiki tshia mudiye bushuwa eu uvua mulaya mu Mifundu bua kuikala Mukalenge musungula kudi Nzambi. Kabakapeshibua tshimanyinu bu nunku. Bishilangane, bayidi ba pa muoyo ba Yezu badi babitabijila peshi bapeshibua disanka dia kumona dikudimuka dia Yezu, dine didi dijadika bulelela bua milayi idi yakula bua Bukalenge. Ke bua tshinyi Petelo wakafunda pashishe ne: ‘Nunku, tudi ne dîyi dia baprofete ditambe kujadikibua.’ Matayo 16:13-28; Mâko 9:1-13; Luka 9:27-37; 2 Petelo 1:16-19, NW.

▪ Kumpala kua kulabula lufu, mmunyi mudi bamue bamona Kristo ulua mu Bukalenge buende?

▪ Mu tshikena-kumona, Mozese ne Eliya badi bakula ne Yezu pa tshinyi?

▪ Bua tshinyi tshikena-kumona etshi ntshikankamiji tshikole bua bayidi?