Nshapita wa 45

Kavua mufuanyine kulua muyidi

MMUANDA kayipu mukuate buôwa anu padi Yezu utua makasa ku mpata! Bantu babidi ba luonji lukole badi bapatuka mu nkita idi ku luseke ne banyema batangile kudiye. Mbakuata kudi ba-demon. Kadi, ntema idi itamba kujalamijibua kudi umue wa kudibo, bualu mmumueneke bu udi ne luonji lukole kupita mukuabu ne udi ukengakana kukadi lupolo lule ku bukokeshi bua ba-demon.

Munkatshi mua bidimu bivule muntu eu mukuate luse mmusombe butaka mu nkita. Kayi mua kuikisha, butuku ne munya, udi’anu wela mbila ne uditapa mputa ne mabue. Bua luonji luende, kakuena udi ne dikima dia kupitshila njila eu. Mbatete kumusuika, kadi udi ukosa nkanu ne utayisha biamu bidibo bamusuika ku makasa. Kakuena muntu udi ne bukole bua kumutekesha.

Padi muntu eu usemena kudi Yezu ne udiela ku makasa ende, ba-demon bàdì bamukokesha badi bamusaka ku diela lubila ne: “Bundi nebe mbunganyi, Yezu, Muana wa Nzambi Mutambe Kutumbuka? Ndi nkutshipisha mu dîna dia Nzambi bua kunkengeshi to.”

“Patuka munda mua muntu eu, spiritu ukena mukezuke we!” Ke mudi Yezu wamba. Kadi pashishe Yezu udi webeja ne: “Dîna diebe nnganyi?”

“Musumba ke dîna dianyi, bualu bavule ba kutudi badimu,” ke mudiye upindulula. Ba-demon badi basanka pa kumona kukengakana kua bantu badibo bakokesha, bimueneka se: batu badisangisha ba bungi munda mua muntu umue. Kadi padibo batuilangana ne Yezu, badi bamusengelela bua kabedibu mu dijimba. Tudi tumona kabidi se: Yezu uvua ne bukokeshi bupitshidile; uvua ne bukole bua kutshimuna nansha ba-demon ba luonji lukole. Ebi bidi kabidi bisokolola se: ba-demon mbamanye bimpe dilumbuluisha dia ndekelu didi Nzambi mubalamine, dia kuedibua mu dijimba pamue ne mfumu’abo, Satana Diabolo.

Pa mukuna udi ku luseke, tshisumbu tshia ngulube mitue ku 2 000 tshidi tshienda tshidia. Nunku, ba-demon badi balomba ne: “Tutume mu ngulube, bua tubuele munda muayi.” Bidi bimueneka se: ba-demon batu bumvua milowo ya tshikisu bua kubuela munda mua bifukibua bia musunyi. Padi Yezu ubatumina dîyi dia kubuela mu ngulube, buonso buayi 2 000 idi isumpakana ne buôwa, ne idinyaka biangatshile ku mutu kua mukuna, idiela mu mbuu ne ifua.

Padibo bamona muanda eu, balami ba ngulube badi baya lubilu kulondela bena mu tshimenga ne bena mu misoko. Pa kumvua lumu elu, bantu badi bapatuka bua kudimuena tshidi tshienzeke. Padibo bafika, badi basangana muntu udibo bapatule ba-demon. Bualu bua dikema, mmusombe ku makasa a Yezu, muvuale bilamba ne lungenyi luende lulongame!

Bamonyi badi babalondela mushindu uvua muntu eu muakajibue. Badi babalondela kabidi mushindu uvua ngulube mipetangane ne lufu. Padi bantu bumvua malu aa, badi bakuatshika buôwa bua bungi, ne balomba Yezu ne disuminyina bua kumuka mu buloba buabu. Yezu udi ubumvuila ne ubuela mu buatu. Muntu uvua mukokesha kudi ba-demon udi usengelela Yezu bua yeye pende aye nabu. Kadi, Yezu udi umuambila ne: “Ndaku kuenu kudi balela bebe, ubalondele bionso bidi Yehowa mukuenzele ne bua luse luvuaye mukufuile.”

Pa tshibidilu, Yezu utu ukandika badiye wondapa bua kuambila muntu mukuabu, bualu ki mmusue bua bantu basuikakaje malu ku miyuki ya mponono nansha. Kadi, dîyi edi dishilangane didiye utuma ndikumbanyine bualu muntu eu mupikula neafile bumanyishi kudi bantu bikala Yezu kayi pamu’apa mua kumonangana nabo. Kabidi, anu ku dikalaku diende, muntu eu neikale tshijadiki tshia se: Yezu udi ne bukole bua kuenzelangana bimpe ne neikale ujikija dishima anyi dikodiakaja dionso dia muyuki bu mudi dijimina dia ngulube.

Pa kulonda dîyi-dituma kudi Yezu, muntu mupikula eu udi upingana. Udi utuadija kumanyisha mu Dekapole malu wonso avua Yezu mumuenzele ne bantu badi bakema anu kukema. Matayo 8:28-34; Mâko 5:1-20; Luka 8:26-39; Buakabuluibua 20:1-3, NW.

▪ Bua tshinyi, pamu’apa, ntema mmitamba kujalamija kudi muntu umue mukuata kudi ba-demon pabo bikaleku babidi?

▪ Ntshinyi tshidi tshileja mudi ba-demon bamanye ne: nebedibue mu dijimba?

▪ Bua tshinyi, anu mudibi bimueneka, ba-demon mbanange kubuela munda mua bantu ne nyama?

▪ Bua tshinyi Yezu udi wambila muntu mupikula mêyi mashilangane pa kumutumina dîyi bua kulondela bakuabu bidi Yehowa mumuenzele?