Nshapita wa 130

Ku Mbuu wa Ngalileya

BAPOSTOLO badi bapingana mpindieu mu Ngalileya, anu muvua Yezu mubatumine dîyi musangu mushale. Kadi, ki mbajadike tshidibu ne bua kuenza muine emu. Lupolo kampanda pashishe, Petelo udi wambila Tomase, Natanaele, Yakobo ne muanabu Yone, pamue ne bapostolo bakuabu babidi ne: “Ndi nya kuloba.” (MMM)

“Tuyaya petu nebe,” (MMM) ke mudi basambombo aba bandamuna.

Butuku bujima, kabena bakuata kantu nansha kamue. Pabi, pakadi panshi patoka, Yezu udi umueneka ku muelelu wa mâyi, kadi bapostolo kabena bajingulula ne: nYezu. Udi wela lubila ne: ‘Bana, nudi ne tshia kudia anyi?’

‘Nansha!’ ke mudibu bandamuna kumukila pa mâyi.

“Elayi kapamba ku luseke lua balume lua buatu, nenupete ndambu,” (NW) ke mudiye wamba. Padibu bela, badi bapanga mua kukoka kapamba kabu bua bungi bua mishipa.

‘mMukalenge!’ ke mudi Yone wela dîyi.

Padiye umvua nunku, Petelo udi udianya muntumpu wende, bualu uvua muvuule bilamba biende ne udiela pa mâyi. Udi wowela mutantshi wa metre bu makumi tshitema too ne ku mpata. Bapostolo bakuabu badi balonda mu buatu bukese, benda bakoka kapamba kuwule tente ne mishipa.

Padibu bafika ku mpata, badi basangana kapia ka makala, mishipa miambikapu, ne mampa mateka ku luseke. “Vuayi ne imue mishipa ya ku inudi bakuate ayo,” (MMM) ke mudi Yezu wamba. Petelo udi ubanda mu buatu, ukoka kapamba ku mpata. Nkuwule ne mishipa minene 153!

“Luayi nudie biakudia bia dinda,” (NW) ke mudi Yezu ubalomba.

Nansha umue wa kudibu kêna ne dikima dia kuebeja ne: “Wewe udi nganyi?” (MMM) bualu buonso buabu mbamanye ne: nYezu. Edi ndimueneka diende dia muanda-mutekete katshia ubiishibua, ne ndisatu kumpala kua bapostolo basangile kasumbu. Mpindieu, udi ubabanyina biakudia ebi bia mu dinda, upesha yonso wa kudibu diampa ne mushipa.

Padibu bajikija kudia, umueneka mutangile ku mishipa mivule idibu bakuate, Yezu udi ukonka Petelo ne: “Simone, muana wa Yone, udi munnange kutamba mine eyi anyi?” (NW) Kabiyi mpata udi usua kumvuija ne: udi mulamate bikole ku midimu ya diloba kupita mudimu umvua mukuibidijile bua kuenza anyi?

“Mukelenge, wewe udi mumanye ne: Ndi mukusue,” ke mudi Petelo wandamuna.

“Udishe bana banyi ba mikoko,” ke mudi Yezu wandamuna.

Tshiakabidi, musangu muibidi, udi ukonka ne: “Simone, muana wa Yone, udi munnange anyi?” (NW)

“Bulelela, Mukelenge, wewe udi mumanye ne: Ndi mukusue,” ke mudi Petelo wandamuna ne muoyo umue.

“Ulame mikoko yanyi [mikese, NW],” ke mudi Yezu umutumina dîyi tshiakabidi.

Pashishe, musangu muisatu, udi webeja ne: “Simone, muana wa Yone, udi munsue anyi?” (NW)

Musangu eu Petelo udi ubungama. Udi pamu’apa udiebeja bikala Yezu ne mpata pa bulamatshi buende. Kuamba ki nkufua, matuku mashale aa pavua Yezu ulumbuluishibua bua muoyo wende, Petelo uvua muvile misangu isatu, wamba mudiye kayi mumumanye. Nunku, Petelo udi wamba ne: “Mukelenge, wewe udi mumanye malu onso; udi mumanye ne: Ndi mukusue.”

“Udishe mikoko yanyi [mikese, NW],” ke mudi Yezu umutumina dîyi musangu muisatu.

Nunku, Yezu udi utumika ne Petelo bua kufikisha bakuabu ku dijingulula mudimu udiye musue bua benze. Mu katupa kîpi emu udi pa kushiya buloba, ne mmusue bua bikale bamanyishi ne basadidi bantunga-mulongo ba aba bakokibua mu tshikumbi tshia Nzambi.

Yezu udi usokolola mpindieu ne: anu muakamusuikabu ne kumushipa bua dikumbaja mudimu mumuomekela kudi Nzambi, bia muomumue Petelo neapetangane pende ne matete amue amue. “[P]awakadi nsongalume,” ke mudi Yezu umuambila, “wakadi udisuika mukaba, wakadi wendakana kuonso kuwakasua; kadi [p]awakulumpa, wewe newolole bianza biebe, mukuabo neakusuike mukaba, neakutuale ku[u]di ku[y]i musue.” Nansha mudi lufu lua difuila ditabuja luindile Petelo, Yezu udi umukankamija ne: “Utungunuke ne kundonda.” (NW)

Padiye ukudimuka, Petelo udi umona Yone ne ukonka ne: “Mukelenge, a[p]u muntu eu ne[e]nze tshinyi?”

“Binasua bua ashale ne muoyo tô ne [p]analua,” ke mudi Yezu wandamuna, “mbualu buebe, anyi? Wewe [utungunuke ne kundonda, NW].” Bavule ba ku bayidi ba Yezu bakangata mêyi aa bu adi umvuija ne: mupostolo Yone kakufua nansha kakese. Kadi, anu muakabiumvuija mupostolo Yone pashishe, Yezu kavua muambe ne: kakufua, apo Yezu wakamba patupu ne: “Binasua bua ashale ne muoyo tô ne [p]analua, mbualu buebe, anyi?”

Yone wakafila kabidi diumvuija edi dia mushinga mukole ku shoo ne: “Yezu uvua muenze kabidi malu makuabo a bungi. [Bu] tuetu baafunde onso ku bumue ku bumue, ndi ngela meji ne: buloba bujima kabu[vu]a mua kuikala ne muaba wa kuteka [mivungu, NW] yonso ivuabo mua kufunda.” (MMM) Yone 21:1-25; Matayo 26:32; 28:7, 10.

▪ Ntshinyi tshidi tshileja ne: bapostolo ki mbamanye tshidibu ne bua kuenza mu Ngalileya?

▪ Mmunyi mudi bapostolo bajingulula Yezu ku Mbuu wa Ngalileya?

▪ Mmisangu bungi munyi idi Yezu mumueneke mpindieu katshia ubiishibua?

▪ Mmunyi mudi Yezu uzangika mudimu udiye musue bua bapostolo kuenzabu?

▪ Mmunyi mudi Yezu uleja mushindu wafua Petelo?

▪ Mmumvuija kayi a Yezu pa bidi bitangila Yone akumvuijabu bibi kudi bayidi bavule?