Nshapita wa 121

Kumpala kua Sanhedrin, pashishe kua Pilato

BUTUKU budi busemena ku ditshia. Petelo ukadi muvile Yezu misangu isatu ne bena mu Sanhedrin bajikiji dilumbuluisha diabu dia didingidija ne batangalaki. Kadi, pa lunkelu mu Ditanu mu dinda, badi basangila tshiakabidi, musangu eu badi mu nzubu wabu wa Sanhedrin. Anu mudibi bimueneka, kipatshila kabu nka kumuenesha se: dilumbuluisha dia butuku divua mu diumvuangana ne mikenji. Padi Yezu utuadibua kumpala kuabu, badi bamukonka, anu muvuabu benze butuku ne: “Pawikala Kristo, utuambile.”

“Meme munuambile, kanuakungitaba to,” ke mudi Yezu wandamuna, “meme munuele lukonko, kanuakungandamuna to.” Kadi, ne dikima dionso Yezu udi ufunkuna kudiye mufume, wamba ne: “Biangatshile ku mpindiewu, Muana wa muntu [neikale musombe ku tshianza tshia balume tshia Nzambi, NW].”

“Nenku udi Muana wa [Nzambi, NW],” ke mudibu bajinga kumanya buonso buabu.

“Nuenu nkayenu nudi nuamba ne: ndi yeye,” (NW) ke mudi Yezu wandamuna.

Bua bantu aba badi ne lungenyi lua kumushipa, diandamuna edi ndikumbane. Badi badiangata bu kusendeka Nzambi. “Tshituakengela kabidi bajadiki ntshinyi?” ke mudibu bebeja. “Tuetu nkayetu tudi badiumvuile mukana muende.” Nunku, badi basuika Yezu, baya nende, ne bamufila mu bianza bia nguvernere muena Roma, Ponsio Pilato.

Yudase, mutungidi wa Yezu, uvuaku ne kulumbuluisha kuonso kuvua mu matshi ende. Padiye umona se: bafundidi Yezu tshibawu, udi umvua kanyinganyinga. Nunku, udi uya kudi bakuidi bamfumu ne bakulu bua kubapingajila bitshiele 30 bia tshiamu tshitoke, umvuija ne: “Ndi muenze bibi, mufile mashi adi kaayi ne bualu.”

“Bidi bituenzela tshinyi? Ntshikutangile!” (NW) Ke mudibu bandamuna kabayiku baleja luse. Nunku, Yudase udi ukupa bitshiele bia tshiamu tshitoke mu ntempelo, umuka ne uteta mua kudiowa. Pabi, ditamba didi Yudase musuike muonji, anu mudibi bimueneka, didi diapuka, mubidi wende upona pa mabue adi muinshi, ne utayikilapu.

Bakuidi bamfumu ki mbamanye tshia kuenza ne bitshiele ebi bia tshiamu tshitoke. “Ki mbiakanyine bua kubiela mu tshibutshilu tshia tshijila,” ke mudibu bakomesha, “bualu bidi mushinga wa mashi.” (NW) Nunku, bamane kuela tshipangu, badi basumba budimi bua mufumbi wa ngesu ne mfranga eyi bua kujiikamu benyi. Nunku budimi ebu budi bubikidibua pashishe ne: “Budimi bua Mashi.”

Bitshidi mu dindadinda padi Yezu utuadibua ku dibalasa dia nguvernere. Kadi, bena Yuda badi bavue kumufila badi babenga bua kubuela bualu badi bela meji se: dipetangana mpala ne mpala ne Bampangano dia mushindu’eu nedibapishe bukoya. Nunku, bua kubatokesha munda, Pilato udi upatuka pambelu. “Bualu bunudi bafundile muntu ewu mbualu kayi?” ke mudiye webeja.

“Bu yeye kayi muenze bualu bubi, katuvua mua kumufila kuudi to,” ke mudibu bandamuna.

Ne dijinga dia kuepuka dibuelakana mu tshilumbu etshi, Pilato udi wandamuna ne: “Muangatayi nuenu bine ne numulumbuluishe bilondeshile mikenji yenu.” (NW)

Pa kusokolola mukadibu bapangadije bua kumushipa, bena Yuda badi bamba ne: “Tuetu katuena ne bukenji bua kushipa muntu to.” Bushuwa, buobu bashipe Yezu munkatshi mua Difesto dia Pasaka, diyoyo dikole nedikale mua kujuka munkatshi mua bantu, bualu bavule badi bangata Yezu ne mushinga mukole. Kadi, buobu mua kufikisha bena Roma ku dimushipa bua kabingila ka tshididi, ebi nebibepule bua bantu kababupuidi bujitu.

Nunku, bamfumu ba malu a Nzambi badi babubika dilumbuluisha diabu dia kumpala dikavuabu bapiishe Yezu bu musendeki wa Nzambi, badi mpindieu bamusuikila malu kabukabu. Badi bamutumpila malu asatu: “Tudi basangane muntu ewu [1] utombola bena ditunga dietu, [2] ukandika bantu bua kabalambudi Kezare [bitadi, NW] ne [3] udiamba mudiye Kristo [mukalenge, NW].”

Ditumpi dia se: Yezu wambi mudiye mukalenge ke didi dikoka ntema ya Pilato. Nunku, udi ubuela tshiakabidi mu dibalasa, ubikila Yezu, ne umuebeja ne: “Udi [mukalenge, NW] wa bena Yuda anyi?” Mu mêyi makuabu: udi mushipe mikenji pa kudiamba muudi mukalenge uluisha Kezare anyi?

Yezu mmusue kumanya malu akadi Pilato mumvue pa bidi bimutangila, nunku udi webeja ne: “Udi udiambila bualu ebu nkayebe anyi bakuabu mbakuambile [pa bidi bintangila, NW]?”

Pilato udi utonda mudiye mupange bionso bidi bimutangila ne ujinga kumanya malu adi menzeke. Udi wandamuna ne: “Meme ndi muena Yuda anyi? Bena ditunga dienu ne bakuidi bamfumu se mbadi bakufile mu bianza bianyi? Tshiudi muenze ntshinyi?”

Yezu kêna uteta mua kuepela bujitu bua tshilumbu etshi, tshine tshidi tshitangila bukalenge. Diandamuna didi Yezu ufila mpindieu didi kabiyi mpata dikemesha Pilato. Lukase 22:66–23:3; Matewuse 27:1-11; Markuse 15:1; Yowanese 18:28-35; Malu Menza 1:16-20, MMM.

▪ Sanhedrin udi usangila tshiakabidi mu dinda bua kipatshila kayi?

▪ Mmushindu kayi udi Yudase ufua, ne ntshinyi tshidibu benza ne bitshiele bia tshiamu tshitoke 30?

▪ Pamutu pa buobu bine kumushipa, bua tshinyi bena Yuda badi bajinga bua bena Roma bashipe Yezu?

▪ Mmalu kayi adi bena Yuda bafunda nawu Yezu?