Nshapita wa 65

Luendu mu musokoko ku Yeruzaleme

BIDI tshitshia tshia bimuma mu 32 B.B., Difesto dia Mitàndà dikadi pabuipi. Yezu mmutambe kujamina ne mudimu wende mu Ngalileya katshia ku Pasaka wa 31 B.B., pakakeba bena Yuda mua kumushipa. Bidi bimueneka se: Yezu uvua mukumbule Yeruzaleme anu bua kuikalaku mu mafesto asatu a ku tshidimu tshionso a bena Yuda.

Mpindieu, bana babo ne Yezu badi bamusaka ne: “Sabukila apa ne uye mu Yudeya.” Yeruzaleme ke tshimenga tshitambe bunene tshia Yudeya ne muaba wa dipuila bua kutendelela bua ditunga dijima. Bana babo badi ne ngelelu wa meji eu: “Muntu kêna wenza bualu mu musokoko padiye ukeba bua kumanyika patoke.”

Nansha mudi Yakobo, Simone, Yozefe ne Yudase kabayi bitaba se: mukuluabo wa balume, Yezu, udi bushuwa Masiya, mbasue bua aye kuleja makokeshi ende a dienza bishima kudi aba buonso badi basangile mu difesto. Kadi, Yezu mmumanye njiwu idiku. “Bulongolodi ebu kabuena ne kabingila ka kunukina,” ke mudiye wamba, “kadi budi bunkina meme, bualu ndi mfila bumanyishi pa bidi bibutangila ne: midimu yabu mmibi.” Nunku, Yezu udi wambila bana babo ne: “Nuenu, ndayi mu difesto; meme tshiena nganji kuya mu difesto adi to.”

Difesto dia Mitàndà didi dinenga matuku muanda-mutekete. Mu dituku dia muandamukulu didi dituishibua ku ndekelu ne tshibilu tshia tuyayi tukamone. Difesto edi, didi dikomesha tshidimu tshia midimu ya madimi, ntshikondo tshia disanka dipite bunene ne tshia diela tuasakidila. Matuku mavule panyima pa bana babo bamane kuya bua kuenza difesto pamue ne musumba munene wa bena luendu, Yezu ne bayidi bende badi baya mu musokoko, kabayi badileja bua babamone. Badi balonda njila udi upitshila mu Samariya, bepuka eu udi bavule bendela pabuipi ne Musulu wa Yordane.

Bu muikala Yezu ne binende mua kukengela pa kutuudila mu musoko kampanda wa mu Samariya, udi utuma bantu ne mukenji bua badianjile kumulongoluela muaba wa kulala. Kadi, bantu badi babenga kuenza tshintu nansha tshimue bua Yezu padibo bumvua ne: udi uya mutangile ku Yeruzaleme. Ne kunyengabala, Yakobo ne Yone badi bebeja ne: “Mukalenge, udi musue tuambile kapia kapueke kafumina mu diulu ne kababutule anyi?” Yezu udi ubakanyina bua difila lungenyi lua mushindu’eu, ne badi batungunuka batangile ku musoko mukuabu.

Mu njila, muskribe kampanda udi wambila Yezu ne: “Mulongeshi, nenkulonde kuonso kuwaya.”

“Nyama ya mikenge idi ne mitubu yayi ne nyunyu ya muulu idi ne masua ayi,” ke mudi Yezu wandamuna, “kadi Muana wa muntu kêna ne pa kuladika mutu wende.” Yezu udi umvuija ne: muskribe neapetangane ne nsombelu wa ntatu bialuaye mumulondi Wende. Ne bidi bimueneka bu udi usua kumvuija ne: muskribe eu mmuditambishi munene bua kuanyishaye nsombelu bu nunku.

Yezu udi wambila muntu mukuabu ne: “Vuaku mundondi wanyi.”

“Anyisha nganji kuya kujiika tatuanyi,” ke mudi muntu wandamuna.

“Lekela bafue bajiike bafue babo,” ke mudi Yezu umukudimuna, “kadi wewe, ndaku kumanyisha bukalenge bua Nzambi.” Bidi bimueneka ne: tatuende wa muntu eu kavua muanji kufua to, bualu bu biobi nanku, muanende wa balume kavua mua kuikala bushuwa muaba eu bua kuteleja Yezu nansha. Muana eu udi umueneka ulomba bua kuindila too ne tshikondo tshia lufu lua tatuende. Ki mmudilongolole bua kuteka Bukalenge bua Nzambi pa muaba wa kumpala mu nsombelu wende to.

Padibo batua tshiakabidi makasa mu njila batangile ku Yeruzaleme, muntu mukuabu udi wambila Yezu ne: “Mukalenge, nenkulonde; kadi diambedi anyisha nnye kulaya bena mu nzubu wanyi.”

Bu diandamuna, Yezu udi wamba ne: “Muntu yonso ukadi mukuate tshianza ku ditempu dia kudima nadi ne utangila bintu bidi kunyima, ki mmukumbanyine bukalenge bua Nzambi to.” Aba balua bayidi ba Yezu badi ne bua kujalamija mêsu abu pa mudimu wa Bukalenge. Anu mudi tshidime mua kuela muîmbu mukonyangale bikalaye kayi mutungunuke ne kutangila kumpala, nunku eu udi utangila kunyima ku bulongolodi ebu bua malu bukulakaje, udi mua kupambuka bushuwa njila udi ufikisha ku muoyo wa kashidi. Yone 7:2-10; Luka 9:51-62; Matayo 8:19-22, NW.

▪ Bana babo ne Yezu mbanganyi, ne mmuenenu kayi adibo nende pa bidi bimutangila?

▪ Bua tshinyi bena Samariya kabena badileja bakididi ba benyi, ne ntshinyi tshidi Yakobo ne Yone bajinga kuenza?

▪ Mmayukidilangana kayi asatu adi Yezu wenza mu njila, ne mmunyi mudiye uzangika dikengedibua dia kukuna ngikadilu wa didipangisha amue masanka mu mudimu?