Nshapita wa 69

Lukonko lua bu-tatu

MUNKATSHI mua difesto, dikokangana didi dikola pankatshi pa Yezu ne bamfumu bena Yuda. “Ndi mumanye ne: nudi ndelanganyi ya Abrahame,” ke mudi Yezu witaba, “kadi nudi nukeba mua kunshipa, bualu dîyi dianyi kadiena dilubuluka munkatshi muenu nansha. Bine bintu bimvua mumone kudi Tatu, ndi mbiamba; kadi, nuenu nudi nuenza bintu binuvua bumvue kudi tatuenu.”

Nansha mudiye kayi usunguluja tatuabo, Yezu udi uleja patoke ne: tatuabo mmushilangane ne wende. Bamfumu bena Yuda aba, nansha mudibo kabayi bamanye udi Yezu wamba, badi bandamuna ne: “Tatuetu ng’Abrahame.” Badi bela meji se: badi ne ditabuja dia muomumue ne dia Abrahame, uvua mulunda wa Nzambi.

Kadi, anu bu udi ubatua munu mu mputa, Yezu udi ukudimuna ne: “Binuikala bana ba Abrahame, nuenze midimu ya Abrahame.” Bushuwa, muana wa mu bilamba utu widikija tatuende. “Kadi mpindieu nudi nukeba mua kunshipa,” ke mudi Yezu wamba, “meme muntu wanuambidi bulelela bumvua mumvue kudi Nzambi. Abrahame kakenza nunku to.” Udi usakidila ne: “Nudi nuenza malu a tatuenu.”

Ki mbanji kujingulula udi Yezu wamba. Badi basuminyina ne kuamba mudibo bana ba Abrahame balela mu bilamba: “Katuena balela mu masandi to.” Ne didikokola pa tshiadi bua kuleja mudibo batendeledi balelela bu Abrahame, badi bamba ne: “Tudi ne Tatu umuepele, Nzambi.”

Kadi, Nzambi udi bushuwa Tatuabo anyi? “Bu Nzambi muikale Tatuenu,” ke mudi Yezu ukudimuna, “nuvua mua kunnanga, bualu kudi Nzambi ke kundi mufumine ne mulue apa. Tshiena mulue ku bukokeshi buanyi nansha kakese, kadi Yeye ke udi muntume. Bua tshinyi kanuena nujingulula bindi ngamba?”

Yezu mmutete mua kuleja bamfumu ba bitendelelu aba bipeta bibi bia dimubenga diabo. Kadi, mpindieu udi ubambila patoke ne: “Nudi nufuma kudi tatuenu Diabolo, ne nudi basue kukumbaja majinga a tatuenu.” Diabolo ntatu wa mushindu kayi? Yezu udi umusokolola bu mushipianganyi ne wamba kabidi ne: “Mmuena dishima ne tatu wa dishima.” Nunku Yezu udi ukoma ne: “Eu udi mufume kudi Nzambi udi uteleja mêyi a Nzambi. Ke bua tshinyi kanuena nuteleja, bualu kanuena bafume kudi Nzambi.”

Pa kukuata tshiji bua dibapiisha dia Yezu, bena Yuda badi bandamuna ne: “Patudi tuamba se: udi muena Samariya ne udi ne demon, ki ntuambilamu anyi?” Badi batumika ne muaku “muena Samariya” bua kuleja kapeja ne ditobolola, bualu bena Samariya ntshisamba tshikinyibue kudi bena Yuda.

Kayi uteta mua kuzangika tshipendu tshia dipetu bua dikala muena Samariya, Yezu udi wandamuna ne: “Tshiena ne demon nansha, kadi ndi ngambika Tatuanyi lumu, ne nuenu nudi numpetula.” Utungunuka, Yezu udi wenza dilaya edi dia dikema: “Muntu udi utumikila dîyi dianyi, kakumona lufu nansha kakese.” Bushuwa, Yezu kêna usua kuamba ne: aba buonso badi bamulonda kabakumona kashidi lufu luena-dîna to. Kadi, udi usua kuamba se: kabakupetangana ne kabutu ka kashidi nansha kakese, anyi “lufu luibidi,” lukena kubiishibua.

Kadi, bena Yuda badi bangata mêyi a Yezu mu ngumvuilu wa pa muaku. Nunku, badi bamba ne: “Mpindieu, tuajinguludi ne: udi ne demon. Abrahame wakafua, ne baprofete kabidi, kadi wewe udi wamba ne: ‘Muntu yeye mutumikile dîyi dianyi, kakulabula lufu nansha kakese.’ Wewe udi munene kutamba tatuetu Abrahame wakafua anyi? Baprofete kabidi bakafua. Wewe udi udiangata bu nganyi?”

Mu dikokangana edi dionso, mbimueneke se: Yezu mmusue kushindikila bantu aba ne: yeye udi Masiya mulaya. Kadi, pamutu pa kuandamuna buludi ku lukonko luabu lua kumanya tshidiye, Yezu udi wamba ne: “Bingaditumbisha nkayanyi, butumbi buanyi budi patupu. Tatuanyi ke udi untumbisha, yeye unudi nuamba ne: nNzambi wenu; pinapu kanuyi bamumanye. Kadi, meme ndi mumumanye. Bu meme muambe ne: tshiena mumumanye, mvua ne bua kuikala bu nuenu, muena dishima.”

Utungunuka, Yezu udi ufunkuna tshiakabidi muena lulamatu Abrahame, wamba ne: “Tatuenu Abrahame wakasanka bikole mu ditekemena dia kumona dituku dianyi, wakadimona ne wakasanka.” Eyowa, ne mêsu a ditabuja, Abrahame wakadianjila kumona difika dia Masiya mulaya. Ne dibula ditabuja, bena Yuda badi bandamuna ne: “Kuena nansha muanji kukumbaja bidimu makumi atanu, kadi ukadi mumone Abrahame?”

“Bushuwa menemene ndi nnuambila ne: bangabanga ne Abrahame kufika ku dikalaku, meme nkavuaku,” ke mudi Yezu wandamuna. Bushuwa, Yezu udi wakula bua dikalaku diende kumpala kua kulua muntu pa buloba, pavuaye spiritu wa bukole mu diulu.

Pa kukuata tshiji bua dimanyisha edi dia Yezu dia se: uvua kuoku kumpala kua Abrahame, bena Yuda badi bangula mabue bua kumuasa. Kadi, udi usokoma ne upatuka mu ntempelo, kayi mujiwuke. Yone 8:37-59; Buakabuluibua 3:14; 21:8, NW.

▪ Mmunyi mudi Yezu uleja se: yeye ne baluishi bende badi ne ba-tatu bashilangane?

▪ Pa kubikila Yezu ne: muena Samariya, bena Yuda badi basua kuamba tshinyi?

▪ Bilondeshile mêyi a Yezu, mmu ngumvuilu kayi muabenga balondi bende kumona lufu nansha kakese?