Nshapita wa 57

Luse bua banyongapadi

YEYE mumane kutandula budinangi bua Bafarizeyi badi batumika bibi ne bilele bia kabukulu, Yezu udi umuka ne bayidi bende. Nudi mua kuvuluka se: lupolo luîpi kumpala, kabavua bapete mua kuikisha mu muaba mupengame bualu misumba ivua milue kubajikila. Mpindieu, udi uya ne bayidi bende mu maloba a ku Tyre ne Sidona, mutantshi wa kilometre mivule ku Nord. Bidi bimueneka se: ke luendu lumuepele ludi Yezu wenza ne bayidi bende pa kusambuka mikalu ya Izalele.

Padibo bapeta nzubu wa kutuudila, Yezu udi umanyisha se: ki mmusue muntu nansha umue amanye muaba udibo. Kadi, nansha mu buloba ebu bukena bua bena Izalele, kêna mua kupanga kumanyika. Mukaji kampanda muena Greke mulela munemu mu Fenisi wa Syria, udi umumona ne utuadija kumusengelela ne: “Mukalenge, Muana wa Davidi, mfuileku luse! Muananyi wa bakaji udi utatshishibua bikole kudi ba-demon.” Kadi, Yezu kêna umukudimuna muaku.

Ndekelu wa bionso, bayidi bende badi bambila Yezu ne: “Mupingaje; bualu udi utungunuka ne kuela mbila munyima muetu.” Umvuija kabingila kadiye mupuwile, Yezu udi wamba ne: “Tshiakatumibua kudi mukuabu nansha umue, apo kudi mikoko mijimine ya nzubu wa Izalele.”

Nansha nanku, mukaji kêna ulekela. Udi usemena kudi Yezu ne winamina kumpala kuende. Udi umusengelela ne: “Mukalenge, ngambuluishaku!”

Mmushindu kayipu udi mutshima wa Yezu ne bua kuikala mulengibue ku dilomba edi dia muoyo mujima dia mukaji! Pabi, udi ufunkuna tshiakabidi bujitu buende bua kumpala, ebu bua kusadila tshisamba tshia Nzambi tshia Izalele. Pinapo, bimueneka bu bua kuteta ditabuja diende, udi ukoka ntema pa mmuenenu wa bena Yuda wa didikokola bu batambe bantu ba matunga menyi, wamba ne: “Ki mbiakane bua kuangata mampa a bana ne kuelela tubua tutekete nansha.”

Ku nshindumuinu wa dîyi diende dia luse ne ku luidi lua mpala wende, Yezu udi bushuwa udisokolola bu muena luse luengeleki bua aba badi kabayi bena Yuda. Udi mene ulengeja difuanyikija Bampangano ne mbua pa kuamba mudibo “tubua tutekete,” peshi tuana tua mbua. Pamutu pa kufika munda, mukaji udi wambulula ngakuilu wa Yezu pa mmuenenu wa didikokola dia dishima dia bena Yuda ne wamba ne bupuekele buonso ne: “Eyowa, Mukalenge; kadi bushuwa tubua tutekete tutu tudia patu bisunsukila bidi bipona ku mesa a bamfumu baatu.”

“O mukaji we, ditabuja diebe ndinene,” ke mudi Yezu wandamuna. “Bikuenzekele anu muudi ujinga.” Ke tshidi tshienzeka! Padiye upingana kuende, udi usangana muanende wa bakaji pa bulalu, muondopibue menemene.

Kumukila ku buloba budi pabuipi ne Sidona, Yezu ne bayidi bende badi bakosolola ditunga, batangile ku mutu kua Musulu wa Yordane. Anu mudibi bimueneka, badi basabuka Yordane pa dilobo kampanda, ku mutu kua Mbuu wa Ngalileya ne babuela mu buloba bua Dekapole, ku Est wa mbuu. Kuineku, badi babanda ku mukuna, kadi misumba idi ivua kututakena nabo ne ituadila Yezu batebuki babo, bilemende, bafofo, tumama ne bavule bena mabedi makuabu ne balema. Badi babakupa ku makasa menemene a Yezu, ne udi ubondopa. Bantu badi bakatshila pa kumona tumama tuakula, batebuki benda biakane, ne bafofo bamona; ne batuadija kusamuna Nzambi wa Izalele.

Yezu udi utamba kujalamija ntema pa muntu kampanda muena mapapa udi wakula ne lutatu. Bena mapapa batu pa tshibidilu balubakana lukasa, nangananga mu musumba wa bantu. Yezu mmutuishe pamu’apa mêsu pa muntu eu udi ulubakana mushindu wa pa buawu. Nunku, pa kumumvuila luse, Yezu udi ushiya musumba ne uya nende ku luseke. Padibo nkayabo, Yezu udi uleja tshikadiye pa kumuenzela. Udi wela minu mu matshi a muntu eu ne, mumane kumutuila mate, udi ulenga ludimi luende. Pashishe, utangila mu diulu, Yezu udi witshija mioyo bikole ne, wamba ne: “Jibuka!” Diakamue, muntu udi upetulula makokeshi a kumvua ne kuakula bimpe.

Misumba idi ileja dianyisha bua mushindu udi Yezu muondope bantu ba bungi. Badi bamba ne: “Wenji malu wonso bilenga. Wapeteshi too ne bena mapapa lumvu ne wakuishi tumama.” Matayo 15:21-31; Mâko 7:24-37, NW.

▪ Bua tshinyi Yezu kêna wondapa diakamue muana wa mukaji muena Greke?

▪ Pashishe, Yezu udi uya penyi ne bayidi bende?

▪ Ntshinyi tshidi Yezu ne luse luonso wenzela muena mapapa udi ne lutatu lukole bua kuakula?