Nshapita wa 68

Makuabu malongesha dituku dia muanda-mutekete

DITUKU dia ndekelu dia Difesto dia Mitàndà, dituku dia muanda-mutekete, ki ndianji kujika nansha. Yezu udi ulongesha mu tshitupa tshia ntempelo tshidibo babikila ne: “Tshibutshilu.” Tshine etshi tshidi tshimueneka tshisanganyibua mu tshitupa tshidi tshibikibua ne: Lubanza lua Bakaji, mudi muteka bieledi bia mfranga mudi bantu bela abo mapa.

Butuku buonso mu tshikondo etshi tshia difesto, tshitupa etshi tshia ntempelo ntshikenkesha kudi bukenke bua pa buabu. Mbatekemu bitekelu bia miendu binene binayi, tshionso tshia kudibi tshidi ne tulongo tunayi tuwuja tente ne manyi. Butoke budi bufuma ku miendu eyi pa kuosha manyi adi mu tulongo 16 mbukumbane menemene bua kukenkesha tshijengu tshia ntanta munene butuku. Mêyi adi Yezu wamba mpindieu adi pamu’apa avuluija bamuteleji kukenkesha eku. “Ndi butoke bua bukua-bantu,” ke mudi Yezu umanyisha. “Eu udi undonda kakuenda mu mîdima nansha kakese, kadi neikale ne butoke bua muoyo.”

Bafarizeyi badi batontolola ne: “Udi ufila bumanyishi buebe nkayebe; bumanyishi buebe ki mbulelela to.”

Bu diandamuna, Yezu udi ubakudimuna ne: “Nansha meme mfila bumanyishi buanyi nkayanyi, bumanyishi buanyi mbulelela, bualu ndi mumanye kundi mufume ne kundi nya. Kadi nuenu kanuena bamanye kundi mufume ne kundi nya.” Udi usakidila ne: “Ndi eu udi ufila bumanyishi budi buntangila meme muine, ne Tatu udi muntume udi ufila pende bumanyishi budi buntangila.”

“Tatuebe udi kuepi?” ke mudi Bafarizeyi bajinga kumanya.

“Kanuena bammanye meme nansha Tatuanyi.” ke mudi Yezu wandamuna. “Bu nuenu bammanye, nuvua kumanya kabidi ne Tatuanyi.” Nansha mudi Bafarizeyi batshijinga kukuata Yezu, kakuena udi umulenga tshianza.

“Ndi nya,” ke mudi Yezu wamba kabidi. “Kundi nya, kanuena mua kuluaku.”

Pakumvua mêyi aa, bena Yuda badi badiebeja ne: “Neadishipe anyi? Bualu udi wamba ne: ‘Kundi nnya, kanuena mua kuluaku?’”

“Nudi ba mu miaba ya panshi,” ke mudi Yezu umvuija. “Meme ndi wa mu miaba ya muulu. Nudi ba mu bukua-bantu ebu; meme tshiena wa mu bukua-bantu ebu.” Pashishe udi usakidila ne: “Binuikala kanuyi nuitaba se: meme ndi yeye, nenufue mu mpekatu yenu.”

Bushuwa, Yezu udi wakula bua dikalaku diende bangabanga ne kulua muntu wa panshi ne bua dikala diende Masiya mulaya, peshi Kristo. Kadi, bena Yuda badi bamuebeja ne dipetu ne: “Udi nganyi?”

Bu mudibo bamupidia, Yezu udi wandamuna ne: “Bua tshinyi ndi mene ngakula nenu?” Nansha nanku, udi usakidila ne: “Yeye udi muntume mmuambi wa bulelela, ne malu mine andi mumvue kudiye, ndi ngajikula mu bukua-bantu.” Yezu udi utungunuka ne: “Panuikala bele Muana wa muntu kuulu, ke panuamanya se: meme ndi yeye, kabidi ne: tshiena ngenza bualu ku bukokeshi buanyi nkayanyi; kadi, anu muvua Tatu mundongeshe ndi njikula malu aa. Ne yeye wakuntuma udi nanyi; ki mmundekele nkayanyi, bualu ndi ngenza misangu yonso malu adi amulengelela.”

Padi Yezu wamba malu aa, bavule badi bamuitabuja. Buobo aba udi ubambila ne: “Binuashala mu dîyi dianyi, nudi bushuwa bayidi banyi, nenumanye bulelela, ne bulelela nebunupikule.”

“Tudi ndelanganyi ya Abrahame,” ke mudi baluishi bende bapunguluja. “ne katshia katutu banji kuikala bapika ba muntu. Mmunyi muudi wamba ne: ‘Nenupikudibue’?”

Nansha muvua bena Yuda batekibue misangu mivule muinshi mua bukokeshi buenyi, kabena bitabaku se: bavua bakunya diminu kudi tshikokesha-nkaya kampanda. Badi babenga bua kubikidibua bapika. Kadi, Yezu udi ushindika ne: bushuwa badi bapika. Mmushindu kayi? “Bulelela ndi nnuambila,” ke mudi Yezu wamba, “muenji wa mpekatu yonso udi mupika wa mpekatu.”

Bu mudibo babenga kuitaba se: badi ku bupika bua mpekatu, bena Yuda badi badibueja mu nsombelu wa njiwu. “Mupika katu ushala mu nzubu kashidi,” ke mudi Yezu umvuija. “Muana mulela utu ushalamu kashidi.” Bu mudi mupika kayi ne bukenji bua kupeta bumpianyi, udi mua kuikala dîba dionso mu njiwu ya kuipatshibua. Anu muana mulela peshi muanyishibue kudi bena dîku ke udi ushalamu “bua kashidi,” mbuena kuamba ne: mu matuku wonso a muoyo wende.

“Nunku, bianupikula Muana,” ke mudi Yezu utungunuka, “nenuikale bushuwa badikadile.” Nunku, bulelela budi bupikula bantu mbulelela budi butangila Muana, Yezu Kristo. Anu mulambo wa muoyo wende wa muntu mupuangane ke udi mua kupikulangana ku mpekatu udi ufikisha ku lufu. Yone 8:12-36, NW.

▪ Mmuaba kayi udi Yezu ulongeshila mu dituku dia muanda-mutekete? Ntshinyi tshidi tshienzeka muaba eu butuku buonso, ne mmushindu kayi udibi mu diumvuangana ne dilongesha dia Yezu?

▪ Pa bidi bitangila kudiye mufumine, Yezu udi wamba tshinyi, ne ebi bidi ne bua kusokolola tshinyi pa tshidiye muikale?

▪ Mmu ngumvuilu kayi mudi bena Yuda bapika, kadi mbulelela kayi buabapikula?