Nshapita wa 13

Malongesha ku matetshibua a Yezu

DIAKAMUE panyima pa batismo wende, spiritu wa Nzambi udi ulombola Yezu too ne mu tshipela tshia Yudeya. Udi ukengela kulepesha meji pa bintu bivule, bualu dîba dia batismo wende “diulu diakunzuluka,” e kupeshibua mushindu wa kusunguluja bintu bia mu diulu. Bushuwa, udi ne bivule bidiye ukengela kueleelapu meji.

Yezu udi ushala mu tshipela matuku a munya 40 ne a butuku 40, kayi udia tshintu nansha tshimue mu tshikondo etshi. Pashishe, dîba didi Yezu umvua nzala mikole, Diabolo udi usemena kudiye bua kumuteta, wamba ne: “Biwikala muana wa Nzambi, ambila mabue aa avue milungu ya mampa.” Kadi, Yezu mmumanye ne: mbibi bua kutumika ne bukole buende bua dienza bishima bua kusankisha majinga ende nkayende. Nunku, udi ubenga kupona mu ditetshibua edi.

Kadi Diabolo ki mmulekele to. Udi uteta ne tshintu tshikuabu. Udi wela Yezu kayanda bua kudinyaka biangatshile pa mutu pa tshibumba tshia ntempelo bua kumona bikala banjelu mua kumuepula ku njiwu. Kadi, Yezu kêna upona mu ditetshibua dia kuenza muanda bu nunku wa kukatshila nansha. Pa kutela Mifundu, Yezu udi uleja ne: mbibi bua kuteta Nzambi mushindu’eu.

Mu ditetshibua disatu, Diabolo udi uleja Yezu makalenge wonso a bulongolodi ebu mu tshishima ne wamba ne: “Nenkupeshe bintu ebi bionso biwadiela panshi ne kukumbaja tshienzedi tshia dintendelela.” Kadi, Yezu udi ubenga tshiakabidi bua kupona mu ditetshibua dia kuenza bibi, usungula bua kushala muena lulamatu kudi Nzambi.

Tudi mua kupetela malongesha ku matetshibua aa a Yezu. Tshilejilu, adi aleja ne: bishilangane ne ngelelu wa meji wa bamue bantu, Diabolo ki ntshikadilu patupu tshia bubi, kadi mmuntu mulelela ukêna-umueka. Ditetshibua dia Yezu didi dileja kabidi ne: mbulamatadi yonso ya pa buloba mbintu bia Diabolo. Bualu, bu yoyi kayiyi yende, mmunyi muvua dipangadija dia Diabolo dia kupesha Kristo mbulamatadi eyi mua kuikala ditetshibua dia bushuwa?

Ela kabidi meji pa muanda eu: Diabolo wakamba muvuaye musue kufuta Yezu bua tshienzedi tshimuepele tshia ditendelela, kumupesha nansha makalenge wonso a bulongolodi ebu. Diabolo udi mua kuteta bushuwa bua kutubueja mu matetshibua mushindu wa muomumue, imue misangu pa kutupetesha mushindu kampanda mulobeshi wa kupeta mabanji a bulongolodi ebu, bukokeshi peshi muanzu munene. Kadi, nebikale kuleja meji kayipu bitualonda tshilejilu tshia Yezu pa kushala bena lulamatu kudi Nzambi nansha ditetshibua badiamba! Matayo 3:16; 4:1-11; Mâko 1:12, 13; Luka 4:1-13, NW.

▪ Mu matuku 40 mapitshisha mu tshipela, mbimueneke se: Yezu uvua ulepesha meji pa bintu kayi?

▪ Mmunyi mudi Diabolo ukeba mua kuponesha Yezu mu matetshibua?

▪ Ntshinyi tshitudi mua kulongela ku matetshibua a Yezu?