Nshapita wa 95

Malongesha pa dishipa dibaka ne pa dinanga bua bana

YEZU ne bayidi bende badi mu njila batangile ku Yeruzaleme bua kuya kuenza Difesto dia Pasaka wa mu 33 B.B. Badi basabuka Musulu wa Yordane ne balonda njila udi upitshila mu distrike dia Pereya. Yezu uvua mu Pereya emu kutshidi mbingu mikese, kadi pashishe bakamulomba bua kuya mu Yudeya bualu mulunda wende Lazare uvua usama. Musangu au mu Pereya, Yezu wakayukila ne Bafarizeyi pa dishipa dibaka, mpindieu badi bajula tshiakabidi tshine tshilumbu etshi.

Munkatshi mua Bafarizeyi, kudi tusumbu kabukabu tua bafidi ba ngenyi pa dishipa dibaka. Mozese wakamba ne: mukaji neikale mua kubengibua bua “tshintu kampanda tshikena tshiakanyine ku luende luseke.” (NW) Bamue badi batshinka ne: ebi bidi bitangila anu dijimija bu-kamama buende. Kadi bakuabu badi bangata “tshintu kampanda tshikena tshiakanyine” bu tshidi tshikongoloja too ne tulema tupite bukese. Nunku, bua kuteta Yezu, Bafarizeyi badi bakonka ne: “mBianyishibue bua muntu kubengaye mukajiende pa bualu buonso anyi?” Mbashindike se: tshionso tshiamba Yezu netshimubueje mu lutatu ne aba ba ku Bafarizeyi badi ne mmuenenu mushilangane.

Yezu udi wandamuna tshishiki ku lukonko elu, kabiyi pa kutumika ne mmuenenu kampanda wa bantu, apo pa kushindamena pa kipatshila ka ku ntuadijilu ka dibaka. ‘Kanuena babale,’ ke mudiye webeja, ‘muvua Mufuki mubafuke mulume ne mukaji ku ntuadijilu anyi? Uvua muambe ne: Nenku mulume neashiye tatuende ne mamuende, alamate mukajiende, bonso babidi nebenze mubidi umue. Nanku kabatshiena babidi to, bakadi mubidi umue. [Bua kabingila aka, tshidi Nzambi, NW] musange, muntu kena mua kutshipandulula.’

Dilongolola dia ku ntuadijilu dia Nzambi, ke mudi Yezu umvuija, didi ne: bena dibaka badisuike, kadi ki mbapanduluke. Bu bikalabi nanku, ke mudi Bafarizeyi bapindulula, “Bua tshinyi Mozese uvua muele diyi bua mulume apeshe mukaji mukanda wa dishipa nawu dibaka padiye umubenga?”

“Mozese uvua muanyishe bua nuenu kubenga bakaji benu bua muoyo wenu mupape,” ke mudi Yezu wandamuna, “kadi ku ntuadijilu kabivua nanku to.” Eyo, pakajadika Nzambi dîyi-dikulu dilelela bua dibaka mu budimi bua Edena, kavua mupangadije dishipibua dia dibaka.

Yezu udi utungunuka pa kuambila Bafarizeyi ne: “Ndi nnuambila ne: eu yonso udi upidia mukajende, kabiyi bua buendenda [por·neiʹa, mu tshiena-Greke], ne usela mukuabu, udi wenda masandi.” (NW) Ku mêyi aa udi uleja se: por·neiʹa, mmumue ne: dienda masandi dibipe menemene, ke kabingila kamuepele kanyishibue kudi Nzambi bua kushipa dibaka.

Padibo bajingulula ne: dibaka didi ne bua kuikala tshisuikidi tshia kashidi tshidi ne kabingila anu kamue bua kushipibuadi, bayidi badi basakibua ku diamba ne: “Padi bualu bua mulume ne mukaji nanku, ki mbimpe kusela to.” Bushuwa, eu yonso udi upangadija bua kusela udi ne bua kuelangana meji bikole pa muanda eu: tshisuikidi tshia dibaka tshidi tshishala kashidi!

Pashishe, Yezu udi wakula bua bujike. Udi umvuija ne: bamue bana ba balume mbalela batungu, ki mbakumbane mua kusela bualu bitupa biabu bia lelu mbifubidile. Bakuabu mbavuija batungu kudi bantu, bapakula ku tshikisu. Bakuabu pabu mbimanshe dijinga dia kusela ne dia kulabula masanka a dimanyangana bua kudifilabo ne kasuki mu midimu ya Bukalenge bua mu muulu. “Eu yonso udi mua kupesha [bujike] muaba, abupeshe muaba,” ke mudi Yezu ukoma. (NW)

Bantu badi batuadija mpindieu kutuadila Yezu bana babo batekete. Pabi, bayidi badi bakanyina bana ne bateta mua kubiipata, bajinga kabiyi mpata bua Yezu kapungijibu patupu. Kadi, Yezu udi wamba ne: “Lekelayi bana batekete balue kundi; kanutetshi mua kubapumbisha, bualu bukalenge bua Nzambi mbua aba badi bafuanangane nabu. Bushuwa ndi nnuambila, Eu yonso udi kayi wakidila bukalenge bua Nzambi bu muana mutekete kakubuelamu nansha kakese.” (NW)

Mmalongesha kayipu bulenga adi Yezu ufila apa! Bua kuakidila Bukalenge bua Nzambi, tudi ne bua kuidikija didipuekesha ne diteya ditshio bia bana batekete. Kadi, tshilejilu tshia Yezu tshidi tshileja kabidi mudibi bia mushinga, nangananga bua baledi, bua kupitshisha dîba pamue ne bana babo balela. Mpindieu Yezu udi uleja dinanga diende bua bana batekete pa kubambula mu maboko ende ne pa kubabenesha. Matewuse 19:1-15, MMM; Dutelonome 24:1; Luka 16:18; Mâko 10:1-16; Luka 18:15-17.

▪ Mmuenenu kayi mishilangane idi nayi Bafarizeyi pa dishipa dibaka, ne nunku mmunyi mudibo bateta Yezu?

▪ Mmunyi mudi Yezu wandamuna Bafarizeyi badi badienzeja bua kumuteta, ne nkabingila kayi kamuepele kadiye ufila bua dishipa dibaka?

▪ Bua tshinyi bayidi ba Yezu badi bamba ne: ki mbimpe kusela, ne mmubelu kayi udi Yezu ufila?

▪ Mmalongesha kayi adi Yezu utupesha ku bidiye wenzela bana batekete?