Nshapita wa 58

Mampa ne ntuntumuna

MISUMBA minene ivua mipuile kudi Yezu mu Dekapole. Ba bungi badi bafumina kule ne balua mu buloba ebu bualabale mudi Bampangano basombele bua kumuteleja ne kuondopibua ku bulema buabu. Mbatuale bitunga binene, peshi bibondo, bitubo batumika nabi pa tshibidilu bua kuambula biakudia padibo bakosolola maloba a Bampangano.

Kadi, pashishe, Yezu udi ubikila bayidi bende ne ubambila ne: “Bantu aba mbakuate luse, bualu kukadi matuku asatu adibo nanyi, kabayi ne tshiakudia. Meme mubapingaje ku mabo ne nzala, badi baya kupangila mu njila, bamue ba kudibo mbafume kule.”

“Kadi tuetu mu tshipela emu, mampa adi mua kuukutshisha nawo musumba wa bantu bunene nenku netuapete penyi?” ke mudi bayidi bakonka.

Yezu udi ubebeja ne: “Mampa anudi nawo adi bungi munyi?”

“Muanda mutekete,” ke mudibo bandamuna, “kabidi ne tushipa tukese.”

Mumane kuambila bantu bua kusomba panshi, Yezu udi wangata mampa ne mishipa, usambila Nzambi, utshibula, ne utuadija kupesha bayidi bende. Aba pabo badi babanyina bantu, buonso buabu badi badia bukuta. Kunyima, padibu bangula bishadile, badi buwuja bibondo muanda-mutekete, pabi, bantu badi badie mbatue ku 4 000, balume, bakaji ne bana!

Yezu udi mpindieu walukija misumba, ubuela mu buâtu ne bayidi bende, ne usabuka dishiya ku Ouest wa Mbuu wa Ngalileya. Kuneku, Bafarizeyi, musangu eu batua munyima kudi bena mu kasumbu ka malu a Nzambi ka Basaduseyi, badi bakeba mua kuenda Yezu munda pa kumulomba bua abaleje tshimanyinu tshia mu diulu.

Bu mudiye mumanye madikolela abo a kumuenda munda, Yezu udi ubakudimuna ne: “Dilolo, nuenu bamone diulu dikunze, nudi nuamba ne: Kulu nekuikale kuimpe. Mu dinda, padi diulu dikunzubile, nudi nuamba ne: Lelu, mvula nealoke. Nudi bamanye mua kujingulula mudi diulu diandamuka, kadi kanuena bamanye mua kujingulula bimanyinu bia malu a bikondo ebi.” (MMM)

Ku mêyi adiye usakidila, Yezu udi ubabikila tshipungu tshibi ne tshiena masandi, ne ubamanyisha ne: anu muakambilaye Bafarizeyi musangu mushale, kakuena tshikuabu tshimanyinu tshia kubapesha, anu tshimanyinu tshia Yona. Pashishe, badi bumuka, yeye ne bayidi bende babuela mu buâtu ne baya batangile ku Betesaida dishiya dia Mbuu wa Ngalileya ku Nord-Est. Padibu benda baya, bayidi badi bavuluka se: mbapue muoyo bua kuangata mampa, kadi, badi’anu ne mulungu umue.

Ne lungenyi lutuma ku mushindu udiye ufuma ku dikokangana ne Bafarizeyi ne Basaduseyi bena dia Herodese, Yezu udi ubadimuija ne: “Tabalayi, nudimuke bua ntuntumuna wa Bafarizeyi ne ntuntumuna wa Herodese.” Kabiyi mpata, bayidi badi batuma lungenyi ku dipua diabu dia muoyo bua kuangata mampa, nunku, badi batuadija kuelangana tshilumbu mu nshingu. Padiye ujingulula ngumvuilu wabo mubi, Yezu udi wamba ne: “Bua tshinyi nudi nukokangana bua munudi kanuyi ne milungu ya mampa?” (NW)

Kukadi lupolo luîpi, Yezu uvua mupeteshe binunu bia bantu mampa mu tshishima, tshine etshi uvua mutshienze imue misangu kukadi dituku dimue anyi abidi patupu. Bavua ne bua kujingulula se: dipangika dia mampa mena-dîna ki mbualu budi mua kumutonda nansha. “Kanuena bavuluke,” ke mudiye ubavuluija, “pamvua mutshibule mampa atanu bua bantu binunu bitanu, nuanguile bisaka bungi munyi biule ne bipese?”

“Dikumi ne bibidi,” ke mudibo bakudimuna.

“Apo, pamvua mutshibule muanda mutekete bua bantu binunu binayi, nuanguile bisaka bungi munyi biule ne bipese?”

“Muanda mutekete,” ke mudibo bandamuna.

“Kanuena banji kumvua anyi?” ke mudi Yezu webeja. “Mmunyi munudi kanuyi [nujingulula, NW] ne: tshivua ngamba bua mampa? Ndi ngambulula, dimukayi [bua, NW] ntuntumuna wa Bafarizeyi ne Basaduseyi.”

Ke bayidi kushishabu kumvua. Ntuntumuna, buanga budi butuntumuja ne bubandisha mampa, mmuaku uvuabo batumika nawu bua kufunkuna dinyanguka. Nunku mpindieu, bayidi badi bajingulula se: Yezu mmuangate tshimfuanyi, udi ubambila bua badimukile “malongesha a Bafarizeyi ne Basaduseyi,” bualu malongesha abo adi ne buenzeji bunyangi. Markus 8:1-21; Mateus 15:32–16:12, Mukenji Mulenga.

▪ Bua tshinyi bantu badi ne bibondo binene bia kuambuila biakudia?

▪ Yeye mumane kumuka mu Dekapole, nngendu kayi ya mu buâtu idi Yezu wenza?

▪ Nngumvuilu kayi mubi udi bayidi bapeta padi Yezu ufila diumvuija pa ntuntumuna?

▪ Yezu udi usua kumvuija tshinyi padiye wakula bua “ntuntumuna wa Bafarizeyi ne Basaduseyi”?