Nshapita wa 131

Mamueneka a ndekelu, ne Pentekoste wa mu 33 B.B.

UMUE musangu, Yezu udi upangadija bua bapostolo bende buonso 11 baye kupetangana nende ku mukuna mu Ngalileya. Anu mudibi bimueneka, bayidi bakuabu mbumvue lumu lua disangila edi, ne bantu bapite pa 500 badi bunguila. Mmpuilu kayipu eu wa disanka padi Yezu umueneka ne utuadija kubalongesha!

Bu bumue bua ku malu, Yezu udi umvuija musumba eu munene ne: Nzambi mmumupeshe bukokeshi buonso mu diulu ne pa buloba. “Nunku, ndayi,” ke mudiye ubasengelela, “ne nuvuije bantu ba mu matunga wonso bayidi, nubatambuishe mu dîna dia Tatu, dia Muana ne dia spiritu munsantu, nubalongeshe mua kutumikila malu wonso amvua munutumine dîyi.”

Anjibi kutshinka! Balume, bakaji ne bana, buonso buabu mbapeshibue bukenji bua muomumue bua kudifila mu mudimu wa divuija bayidi. Baluishi nebatete mua kuimanyika mudimu wabu wa difila bumanyishi ne wa dilongesha, kadi Yezu udi ubakankamija ne: “Monayi! Meme ndi nenu matuku onso too ne ku nkomenu wa ndongoluelu wa malu.” Yezu udi ushala ne bayidi bende ku diambuluisha dia spiritu munsantu, bua kubambuluisha bua bakumbaje mudimu wabu.

Bu wonso masanga, Yezu mmudileje ne muoyo kudi bayidi bende mu lupolo lua matuku 40 panyima pa dibiishibua diende. Dîba dia mamueneka aa, udi ubalongesha pa bidi bitangila Bukalenge bua Nzambi, ne uzangika majitu mabuomekela bu bayidi bende. Dimue dîba udi mene umuenekela Yakobo, muanabu wa mamuende, uvua kumpala mubule ditabuja, ne umutuishisha ne: Yeye bushuwa udi Kristo.

Patshidi bapostolo mu Ngalileya, anu mudibi bimueneka, Yezu udi ubatumina dîyi bua kupingana ku Yeruzaleme. Padiye usangila nabu kuine eku, udi ubambila ne: “Kanuyi kule ne Yeruzaleme, kadi nutungunuke ne kuindila tshivua Tatu mulaye, tshinuvua bumvue ngakula bualu buatshi; bualu bushuwa Yone wakatambuisha ne mâyi, kadi nuenu nenutambuishibue mu spiritu munsantu matuku makese panyima.”

Pashishe Yezu udi upetangana tshiakabidi ne bapostolo bende ne ubalombola pambelu pa tshimenga too ne mu Betaniya, pa mupulumuku ku Est kua Mukuna wa Olive. Bia kukema, nansha mudiye mubambile malu mavule pa bidi bitangila diya diende mu diulu mu katupa kîpi emu, batshidi amu bitaba ne: Bukalenge buende nebutekibue pa buloba. Nunku, badi bakonka ne: “Mukalenge, udi ujadikulula bukalenge bua Izalele pa dîba edi anyi?”

Pamutu pa kuteta mua kululamija ngenyi yabu mikonyangale, Yezu udi wandamuna patupu ne: “Ki mbanupe bua kumanya bikondo ne bitshia bidi Tatu muteke ku bukokeshi buende.” Pashishe, wela tshiakabidi kashonyi pa mudimu udibu ne bua kuenza, udi wamba ne: “Nenupete bukole panufikila spiritu munsantu, ne nenuikale bantemu banyi mu Yeruzaleme, mu Yudeya mujima ne mu Samariya, too ne mu bitupa bia kulekule bia buloba.”

Patshidibu bamutangile, Yezu udi utuadija kujuka mutangile mu diulu, ne pashishe ditutu didi dimujika ku mêsu abu. Yeye mumane kuvuula mubidi wa musunyi, udi ubanda mu diulu bu spiritu. Patshidi bapostolo 11 batungunuke ne kutangila mu diulu, bantu 2 bavuale bilamba bitoke badi bamueneka ku luseke luabu. Banjelu aba bavuale mubidi wa musunyi badi bakonka ne: “Bena Ngalileya, tshinudi bashale batangile mu diulu nanku ntshinyi? Yezu udibo banuangate ubanda mu diulu ewu, neapingane kabidi mushindu wa muomumue unudi bamumone uya mu diulu ewu.” (MMM)

Mushindu udi Yezu ufuma ku diumuka pa buloba ng’eu wa kakuyi diela mpungi patoke ne bamulondi ba lulamatu nkayabu ke babandidi ba dibanda diende. Nunku, neapingane mushindu wa muomumue​—kakuyi diela mpungi patoke ne bamulondi ba lulamatu nkayabu ke bajingulula ne: ukadi mupingane ne dikalaku diende mu bukole bua Bukalenge dikadi dituadije.

Mpindieu, bapostolo badi bapueka Mukuna wa Olive, bakosolola mu Tshibanda tshia Kedron, ne babuela tshiakabidi mu Yeruzaleme. Pa kutumikila dîyi-dituma dia Yezu, badi bashala muine emu. Panyima pa matuku dikumi, dia Difesto dia bena Yuda dia Pentekoste wa mu 33 B.B., padi bayidi batue ku 120 basangile mu tshibambalu kampanda tshia kuulu mu Yeruzaleme, tshiona tshifuane tshia tshipepele tshikole tshituta tshidi tshiuwula nzubu mujima mu tshita ne mu tshita. Ndimi mifuane ya kapia idi imueneka, ne ku lumue ku lumue idi ikila pa aba badiku, ne bayidi buonso badi batuadija kuakula mu miakulu mishilashilangane. Anu muvua Yezu mulaye, etshi nkupongolodibua kua spiritu munsantu! Matayo 28:16-20; Luka 24:49-52; 1 Kolinto 15:5-7; Bienzedi 1:3-15; 2:1-4, NW.

▪ Mbanganyi badi Yezu upesha ngenyi-miludiki ya ndekelu pa mukuna mu Ngalileya, ne mine ngenyi-miludiki eyi idi yamba munyi?

▪ Mmunyi mudi Yezu ukankamija bayidi bende, ne mmunyi muashalaye nabu?

▪ Yezu mmumuenekele bayidi bende panyima pa dibiishibua diende lupolo bule kayi, ne mmalu kayi adiye ubalongesha?

▪ Nnganyi uvua kayi muyidi kumpala kua lufu lua Yezu, anu mudibi bimueneka, udi Yezu umuenekela?

▪ Mmisangu kayi ibidi ya ndekelu idi Yezu upetangana ne bapostolo bende, ne mmalu kayi adi enzeka bine bikondo ebi?

▪ Mmu ngumvuilu kayi muapingana Yezu mushindu wa muomumue ne udiye uya?

▪ Ntshinyi tshidi tshienzeka dia Pentekoste wa mu 33 B.B.?