Nshapita wa 129

Mamueneka makuabu

BAYIDI batshidi balubakana ne lungenyi. Kabena bajingulula diumvuija dia dishala dia lukita munda mutupu, ne kabena bitaba bumanyishi bua bakaji. Ku shoo mu Dia lumingu, Kleopase ne muyidi mukuabu badi bumuka mu Yeruzaleme baya batangile ku Emause, udi mutantshi wa kilometre mitue ku 11.

Mu njila, bu mudibu benda bayukila pa mianda ya munda-munya, muenyi kampanda udi udisanga kudibu. “Binudi nuenda nuambilangana nanku mbinganyi?” ke mudiye webeja.

Ne mpala ya dibungama, bayidi badi biimana, ne Kleopase udi wandamuna ne: “Udi musombe bu muenyi pa nkayebe mu Yeruzaleme bua wewe kupanga malu adi menzekemu matuku aa anyi?” (NW) Udi ukonka ne: “Mmalu kayi au?” (NW)

“[Malu adi atangila, NW] Yezu wa mu Nazarete,” ke mudibu bandamuna. “Bakuidi betu bamfumu ne bamfumu betu bavua bamufile bua kumufundilabo tshibawu tshia lufu ne kumupopela pa mutshi. Tuvua batekemene se: Yeye ngwapikula I[zal]ele.”

Kleopase ne muinende badi bumvuija mianda ya dikema ya munda-munya​—bumanyishi pa dimona dikena pa ngumvuilu wa bantu dia banjelu ne disangana dia lukita munda mutupu—​kadi pashishe badi batonda mudibu mu dilubakana pa bidi bitangila diumvuija dia malu aa. Muenyi eu udi ubakanyina ne: “Bantu babule lungenyi, ba lujoko ku ditaba bionso bivua [baprofete, NW] banumanyishe! Kristo kavua ne bua kumvua bisama ebi bua kubuelaye mu [butumbi buende, NW] anyi?” Pashishe udi ubumvuija mvese ya mu mifundu ya tshijila idi yakula bua Kristo.

Ndekelu wa bionso badi bafika pabuipi ne Emause, ne muenyi eu udi wenza bu udi anu utungunuka. Bu mudibu bajinga kumvua malu makuabu mavule, bayidi badi bamusengelela ne: “Shala netu, bualu bikadi ku dilolo.” (NW) Nunku udi ushala nabu bua kudia biakudia. Padiye wenza disambila, utshibula diampa ne ubapeshadi, badi bajingulula ne: bushuwa nYezu muvuale mubidi wa musunyi. Kadi udi ujimina pashishe.

Mpindieu, badi bajingulula bua tshinyi muenyi eu uvua mumanye malu a bungi! “Pavuaye uyukila netu mu njila,” ke mudibu badiebeja, “utumvuija [Mifundu, NW], muoyo wetu wa munda kauvuapu utema anyi?” Kabayi bajingakana, badi bajuka ne bapingana ne lukasa luonso ku Yeruzaleme, kudibu basangana bapostolo ne aba bavua basangile nabu. Kleopase ne muinende kabayi nansha banji kuamba dîyi, bakuabu aba ne musangelu badi babamanyisha ne: “Bushuwa, [Mukalenge mmubiishibue, NW] ku lufu; mmumuenekele Simone!” Pashishe, bubidi buabu badi balonda mushindu uvua Yezu mubamuenekele pabu. Misangu yenji inayi mpindieu idiye mumuenekele bayidi bende bashilangane munda-munya.

Yezu udi umueneka mu tshimpitshimpi bua musangu muitanu. Nansha mudi biibi binjila bualu bayidi badi ne buôwa bua bena Yuda, udi ubuela, wimana munkatshi muabu, ne wamba ne: “Ditalala dikale nenu!” (NW) Bayidi badi bapapa, bela meji ne: mbamone [spiritu, NW]. Nunku, umvuija mudiye kayi [nyuma, NW], Yezu udi wamba ne: “Nudi nupampakana bua tshinyi? Bua tshinyi nudi ne mpata mu [mitshima, NW] yenu? Tangilayi bianza bianyi ne makasa anyi; mmeme! Ndengayi, nujadike ne: [spiritu kêna ne musunyi, NW] ne mifuba bu munudi bammone nabio.” Kadi, batshidi anu belakana bua kuitaba.

Bua kubambuluisha bua kujingululabu se: yeye udi Yezu bushuwa, udi ukonka ne: “Nudi ne tshintu tshia kudia apa anyi?” Yeye mumane kuangata tshitupa tshia mushipa mukanga mu mafuta ne mutshidie, udi wamba ne: “Miaku imvua munuambile pantshivua nenu [kumpala kua lufu luanyi] ivua ne: Bionso bivuabo bafunde bualu buanyi mu [mikenji ya, NW] Mozese, mu [Baprofete, NW] ne mu Misambo, bidi ne bua kukumbana.”

Utungunuka bienze bu udi ulombola dilonga dia Bible, udi ulongesha ne: “Mbafunde ne: Kristo neumvue bisama, abike ku bafue dituku disatu; kabidi ne: mu [d]îna diende, nebamanyishe bisamba bionso, biangatshile mu Yeruzaleme, [dinyingalala bua dibuikidila dia mpekatu, NW]. Nuenu nudi bajadiki ba bionso ebi.”

Bua tumue tubingila, Tomase kenaku mu dipetangana edi dia mushinga mukole mu Dia lumingu dilolo. Nunku mu matuku adi alonda, ne disanka dionso bakuabu badi bamuambila ne: ‘Tuvua bamone Mukalenge!’

“Meme tshiyi mumone bibangu bia [misonso, NW] mu bianza biende,” ke mudi Tomase utontolola, “tshiyi mutue munu mu [bibangu bia misonso, NW], tshiyi mulenge ne tshianza tshianyi mu lubadi luende, tshiakuitaba to.”

Ee, matuku muanda-mukulu pashishe, bayidi mbasangile tshiakabidi mu nzubu. Musangu eu, Tomase udi nabu. Nansha mudi biibi binjila, Yezu udi wimana tshiakabidi munkatshi muabu ne wamba ne: “Ditalala dikale nenu!” (NW) Pashishe, ukudimuka kudi Tomase, udi umulomba ne: “Ela munu emu, tangila bianza bianyi; tuma tshianza, undenge mu lubadi. Lekela mpata yebe, itaba.”

“Mukalenge wanyi ne Nzambi wanyi!” (NW) ke mudi Tomase utua tshikemu.

“Udi witaba bualu udi mu[m]mone?” ke mudi Yezu webeja. “Ba diakalenga mbadi bitaba kabayi bamone.” Lukase 24:11, 13-48; Yowanese 20:19-29, MMM.

▪ Nnkonko kayi idi muenyi kampanda wela bayidi babidi mu njila wa ku Emause?

▪ Muenyi eu udi wamba tshinyi tshidi tshisaka mitshima ya bayidi ku ditema munda muabu?

▪ Mmunyi mudi bayidi bajingulula [dîna dia] muenyi?

▪ Padi Kleopase ne muinende bapingana ku Yeruzaleme, ndumu kayi lua musangelu ludibu bumvua?

▪ Mmu nsombelu kayi mudi Yezu umuenekela bayidi bende musangu muitanu, ne ntshinyi tshidi tshienzeka dîba adi?

▪ Ntshinyi tshidi tshienzeka matuku muanda-mukulu panyima pa dimueneka ditanu dia Yezu, ne ndekelu wa bionso, mmunyi mudi Tomase utuishibua se: Yezu udi ne muoyo?