Nshapita wa 115

Matandu adi ajuka

KUTSHIDI lupolo luîpi mu dilolo adi, Yezu uvua mufile dilongesha dilenga ku mudimu mupuekele pa kuowesha bapostolo bende makasa. Pashishe, uvua mubanjije Tshivulukilu tshia lufu luende lukavua pabuipi. Mpindieu, bualu kampanda bua dikema budi buenzeka, bua dikema nangananga pa kumona bitshidi bifuma ku dienzeka. Bapostolo bende badi bajula matandu makole ne kipatshila ka kumanya eu wa kudibu udi umueneka mutambe bakuabu! Anu mudibi bimueneka, mmatandu a kale, ne atshidi matungunuke.

Vulukayi se: panyima pa dikudimuka mpala dia Yezu pa mukuna, bapostolo bakatandangana bua kushindika eu uvua mutambe bunene munkatshi muabu. Kabidi, Yakobo ne Yone bakalomba mianzu minene mu Bukalenge, e kujudijabu difuilakana dikuabu munkatshi mua bapostolo. Mpindieu, mu butuku ebu bua ndekelu budiye ushala nabu, mmushindu kayipu udi Yezu ne bua kuikala mubungamijibue pa kubamona batandangana tshiakabidi. Udi wenza tshinyi?

Pamutu pa kukanyina bapostolo bua bienzedi biabu, ne lutulu Yezu udi welangana nabu meji tshiakabidi: “Bakalenge ba matunga badi babatumina dîyi ne diambu, ne aba badi ne bukokeshi ku mutu kuabu badi babikidibua ne: Benzedianganyi ba bimpe. Kadi nuenu, kanuena ne bua kuikala bantu ba mushindu’au. . . . Bualu, nnganyi udi mutambe bunene, eu udi mudiadije ku mesa peshi udi usadila? Ki ng’eu udi mudiadije ku mesa anyi?” Pashishe, ubavuluija tshilejilu tshiende yeye muine, udi wamba ne: “Pabi, meme ndi munkatshi muenu bu eu udi usadila.” (NW)

Nansha mudibu bena ntupakanyi ne tulemalema, bapostolo mbashale ne Yezu dîba dionso mu mateta ende. Ke padiye wamba ne: “Ndi ndia nenu tshiovo, anu muvua Tatuanyi mudie nanyi tshiovo, bua bukalenge.” Tshiovo etshi tshidi Yezu udia pa nkayende ne bamulondi ba lulamatu tshidi tshibasanga kudiye bua babanyangane nende bukokeshi bua bukalenge buende. Amu bungi bujadika bua bantu 144 000 ke badi, ndekelu wa bionso, banyishibua mu tshiovo etshi bua Bukalenge.

Nansha mudi bapostolo bapeshibue ditekemena edi dia dikema dia kuabanyangana bukokeshi bua Bukalenge ne Kristo, batshidi bena butekete mu nyuma. “Buonso buenu nenulenduke bualu buanyi mu butuku ebu,” ke mudi Yezu wamba. Nansha mudiye wambila Petelo ne: uvua musambile bualu buende, Yezu udi umusengelela ne: “Diakamue pawudi walukila, ukankamije bana benu.”

“Bana bakese,” ke mudi Yezu umvuija, “ntshidi nenu lupolo luîpi. Nenunkebe; ne anu mumvua muambile bena Yuda ne: ‘kundi nya kanuena mua kuluaku,’ ndi nnuambila penu mpindieu. Ndi nnupesha dîyi-dituma dipiadipia, bua nunangangane, anu bu mundi mununange, nuenu penu nunangangane. Ku muanda eu buonso nebamanye se: nudi bayidi banyi, binuikala ne dinanga munkatshi muenu.”

“Mukalenge, nkuepi kuudi uya?” ke mudi Petelo webeja.

“Kundi nya kuena mua kundondaku mpindieu,” ke mudi Yezu wandamuna, “kadi neundonde pashishe.”

“Mukalenge, bua tshinyi tshiena mua kukulonda mpindieu?” ke mudi Petelo ukonka. “Nemfile anyima wanyi bualu buebe.”

“Neufile anyima webe bualu buanyi?” ke mudi Yezu webeja. “Bushuwa ndi nkuambila ne: Wewe lelu’eu, ee, butuku ebu mene, kumpala kua tshitala kusamatshi misangu ibidi, newikale mumane kumvila misangu isatu.”

“Nansha bikale bua meme kufua nebe,” ke mudi Petelo utontolola, “nansha kakese meme tshiakukuvila.” Bu mudi bapostolo bakuabu bamba pabu mêyi a muomumue, Petelo udi udikokola ne: “Nansha bialenduka bakuabu buonso bualu buebe, meme tshiakulenduka nansha kakese!”

Utuma lungenyi ku tshikondo tshiakatumaye bapostolo mu dinyunguluka dia bumanyishi mu Ngalileya kabayi ne kabuta ka mfranga peshi kabombi ka biakudia, Yezu udi webeja ne: “Kanuakakengela tshintu nansha tshimue, ki mmuomu’anyi?”

“Tòo!” Ke mudibu bandamuna.

“Kadi mpindieu, eu udi ne kabuta ka mfranga akangate, bia muomumue ne kabombi ka biakudia kabidi,” ke mudiye wamba, “ne eu udi kayi ne muele wa nkanza apanyishe tshilamba tshiende tshia pa mutu ne asumbe umue. Bualu ndi nnuambila ne: budibu bafunde budi ne bua kunkumbanyina, mbuebu: ‘Wakabadibua pamue ne bapetudi ba mikenji.’ Bualu buine budi buntangila budi buenda bupeta dikumbana diabu.”

Yezu udi ufunkuna dîba dikalaye muedibue ku mutshi pamue ne benji ba bibi, anyi bapetudi ba mikenji. Udi uleja kabidi ne: bamulondi nebakame pashishe makengeshibua a tshikisu. “Mukalenge, tangila! miele ya nkanza ibidi idi apa,” ke mudibu bamba.

“Mbikumbane,” ke mudiye wandamuna. Anu mutuabimona, kuikala ne miele ya nkanza nekuambuluishe Yezu bua kufilaye dilongesha dikuabu dia mushinga mukole. Matayo 26:31-35; Mâko 14:27-31; Luka 22:24-38; Yone 13:31-38; Buakabuluibua 14:1-3, NW.

▪ Bua tshinyi matandu a bapostolo adi atamba kukemesha?

▪ Mmunyi mudi Yezu wandamuna ku matandu aa?

▪ Ntshinyi tshidi tshikumbajibua ku tshiovo tshidi Yezu udia ne bayidi bende?

▪ Ndîyi-dituma dipiadipia kayi didi Yezu ufila, ne didi ne mushinga kayi?

▪ Mmunyi mudi Petelo uleja didieyemena dinekesha, ne ntshinyi tshidi Yezu wamba?

▪ Bua tshinyi ngenyi-miludiki ya Yezu pa diangata kabuta ka mfranga ne kabombi ka biakudia mmishilangane ne eyi ivuaye mufile diambedi?