Nshapita wa 74

Mibelu kudi Marta, ne ngenyi-miludiki pa masambila

PA KUTUNGUNUKA ne buambi buende mu Yudeya, Yezu udi ubuela mu musoko wa Betani. Muine emu ke mudi Marta, Mariya ne muanabu Lazare basombele. Pamu’apa Yezu ukavua mupetangane nabu buonso basatu kumpala mu buambi buende ne ukadi muvue mulunda wabu wa pa muoyo. Kadi mpindieu, Yezu udi uya kua Marta ne udi umuakidila ne musangelu.

Marta mmusue kulambila Yezu bintu bipite buimpe bidiye nabi. Ndumu kayipu bunene lua kukumbudibua ku nzubu kudi Masiya mulaya! Nunku, Marta udi uditua mu dilamba biakudia bia muenya ne mu diakaja bimpe bikuabu bintu bua buenyi ebu bupeteshe Yezu disanka divule ne musangelu.

Ku lukuabu luseke, muanabo ne Marta wa bakaji, Mariya, mmusombe yeye ku makasa a Yezu ne umuteleja. Kunyima kua lupolo, Marta udi usemena ne wambila Yezu ne: “Mfumu, padi muanetu munshiye nkayanyi ne midimu apa, kuena umona bu bualu anyi? Umuambile bua alue kungambuluisha.”

Kadi Yezu udi ubenga kuambila Mariya bualu kampanda. Bishilangane, udi ubela Marta bua katambi kuditatshisha bua bintu bia ku mubidi. “Marta, Marta,” ke mudiye umukudimuna ne dîyi diengeleka, “udi utata, ulubakana [bua bintu bia bungi. Pabi, bintu bikese mbidi bikengedibua, nansha tshimue mene, NW].” Apa Yezu udi uleja ne: kabiena ne dikuatshisha bua kupitshisha dîba divule mu dilamba bintu kabukabu bua didia. Biakudia anu bikese mbikumbane, peshi tshimue mene.

Marta udi ne ngenyi milenga; mmusue kudileja muakididi wa benyi. Kadi, disumpakana diende bua bintu bia ku mubidi didi dimupangisha mua kubabidila mushindu wa kulongeshibua buludi kudi Muana wa Nzambi! Nunku, Yezu udi ukomesha ne: “Mariya mmusungule [difùka dilenga didibo, NW] kabayi mua kumunyenga.”

Kunyima, dîba kampanda, muyidi kansanga udi ulomba Yezu ne: “Mfumu, utulongeshe mua kusambila bu mudi Yowanese mulongeshe balongi bende.” Bidi bimueneka ne: pakafila Yezu disambila dia tshilejilu mu Muyuki wende wa pa Mukuna kukadi tshidimu ne tshitupa, muyidi eu kavuaku nansha. Nunku, Yezu udi wambulula ngenyi-miludiki ikavuaye mufile, kadi utungunuka pa kulonda mufuanu udi uzangika dikengedibua dia kunanukila mu masambila.

“[Nnganyi, NW] wa kunudi, yeye muikale ne nyanende, uya kudiye mundankulu mua butuku ne: ‘Nyananyi, unsombesheku mampa asatu, bualu nyananyi mukuabo mmumvuile buenyi, tshiena ne tshia kumulambila,’ kadi yeye munda mua nzubu umuandamuna ne: ‘Lekela kunsuya; kumbelo nkumana kuinjila, tukadi balale ne bana banyi; tshiena mua kubika bua kukupawu.’ Ndi nnuambila ne: nansha yeye kayi mujuke bua kumupa bia bulunda, neabike nansha bua se: udi unsuya, e kumupaye bidiye ukengela bionso.” (Mukenji Mulenga)

Pa kuenza difuanyikija edi, Yezu kêna usua kuamba ne: anu bu mulunda wa mu muyuki wende, Yehowa Nzambi katu mudiakaje bua kuandamuna ku milombo ya badi bamutendekena nansha. Kadi, udi usua kuleja ne: pikala mulunda ukena mudiakaje bua kupa ufika ku diandamuna ku milombo ya munanunanu, mmushindu kayipu wandamuna Tatuetu wa mu diulu muwule tente ne dinanga! Nunku, Yezu udi utungunuka ne: “Ke pandi nnuambila ne: Tungunukayi ne kulomba, nebanupeshe; tungunukayi ne kukeba, nenupete; tungunukayi ne kukokola, nebanunzuluile. Bualu, yonso udi ulomba badi bamupesha, ne yonso udi ukeba udi upeta, ne yonso udi ukokola nebamunzuluile.” (NW)

Pashishe, Yezu udi utumika ne tshilejilu tshia ba-tatu betu ba pa buloba, bena mpekatu ne bapange bupuangane, wamba ne: “Tatu kayi wa munkatshi muenu, padi muanende umulomba mushipa, yeye umupa nyoka pa mutu pa mushipa? Muana umulomba dikela dia nzolo, yeye umupa kaminyiminyi? Nuenu badi babi, nudi bamanye mua kupesha benu bana bintu bilenga, mmunyi muapanga Tatuenu wa mu diulu kupesha badi bamulomba [spiritu munsantu, NW]!” Ndikankamija kayipu disonsodi didi Yezu ufila bua kunanukila mu masambila! Lukase 10:38–11:13, MMM.

▪ Bua tshinyi Marta udi uditatshisha bua kulambila Yezu bintu bivule?

▪ Mariya udi wenza tshinyi, ne bua tshinyi Yezu udi umuela ka-lumbandi pamutu pa Marta?

▪ Ntshinyi tshidi tshisaka Yezu ku diambulula ngenyi-miludiki yende pa masambila?

▪ Mmufuanu kayi udi Yezu uzangika nawu dikengedibua dia kunanukila mu masambila?