Nshapita wa 1

Mikenji mifume mu diulu

MU KABUJIMA kende, Bible mmukenji mufume mu diulu bushuwa, mututumina kudi Tatuetu wa mu diulu bua tuetu kulongeshibua. Kadi, kukadi bidimu bitue ku 2 000, mikenji ibidi ya pa buayi yakamanyishibua ku butuangaji bua muanjelu kampanda “udi wimana kumpala kua Nzambi, pabuipi nende.” Dîna diende nGabriele. Tukonkononayi tshivua tshimusake bua kulua pa buloba ne kuenzapu makumbula abidi a mushinga mukole.

Tudi mu tshidimu 3 K.B.B. Mu tukunakuna tua Yudeya, imue misangu kabiyi kule ne Yeruzaleme, muvua muakuidi kampanda wa Yehowa, udi ubikidibua ne: Zekariya. Muntu eu ne mukajende, Elizabete, bakaadi bakulakaje. Kadi kabena ne bana to. Zekariya udi mu ntempelo wa Nzambi ku Yeruzaleme, bualu ntshiende tshikondo tshia kukumbaja tshiende tshitupa tshia mudimu bu muakuidi. Diakamue, Gabriele udi umueneka ku dia balume dia tshilambuilu tshia musenga wa kamonya.

Zekariya udi umvua buôwa bua bungi. Kadi Gabriele udi umubatamija, wamba ne: “Kuikadi ne buôwa to, Zekariya, bualu bumvu bimpe musengelelu webe, mukajebe Elizabete neakulelele muana wa balume, ne udi ne bua kumuinyika dîna ne: Yone.” Gabriele udi utungunuka ne kumanyisha ne: Yone “neikale munene kumpala kua Yehowa” ne “neakajile Yehowa tshisamba tshilongolola.”

Kadi Zekariya kêna witaba mêyi ende to. Bidi bimueneka bu bidi kabiyi mua kuenzeka bua yeye ne Elizabete kupeta muana ku bukulakaje buabu. Pa nanku, Gabriele udi umuambila ne: “Wewe neupuwe ne neupange kuakula too ne ku dituku diakumbana malu aa, bualu kuena muitabe mêyi anyi.”

Mu mutantshi eu, buonso badi bindile pambelu badi badiebeja bua tshinyi Zekariya udi unenga mu ntempelo. Ndekelu wa bionso padiye upatuka, bu mudiye kayi mua kuakula ne ubaleja anu ne bianza, badi bafika ku dijingulula ne: mmumone tshintu kampanda tshipite bantu bukole.

Padi Zekariya ufika ku ndekelu kua matuku ende a mudimu mu ntempelo, udi upingana kuende. Panyima pa matuku makese, bivua mu anjelu mumumanyishe bidi bikumbana bushuwa​—Elizabete udi wimita! Mu bule bua tshikondo tshidiye muindile bua kulela muanende, Elizabete udi usomba pa nkayende kuende munkatshi mua ngondo itanu.

Kupita matuku, Gabriele udi umueneka tshiakabidi. Udi wakula ne nganyi? Ne nsongakaji ukena musedibue udi ubikidibua ne: Mariya, udi musombele ku tshimenga tshia Nazarete. Mmukenji kayi udiye umanyisha musangu eu? Teleja! “Udi muanyishibue bimpe ku mesu kua Nzambi,” ke mudi Gabriele wambila Mariya. “Tangila! Wewe newimite, ulele muana wa balume, umuinyike ne: Yezu.” Gabriele udi usakidila ne: “Yeye neikale munene, ne nebamubikile ne: Muana wa Mutambe-Kutumbuka;  . . . ne neakokeshe bu mukalenge pa nzubu wa Yakoba tshiendelele, ne bukalenge buende kabuakuikala ne ndekelu.”

Tudi mua kushindika se: Gabriele udi wanyisha lumu ludibu bamuambike lua kusambuluja mikenji eyi. Pa kutungunuka ne kubala malu adi atangila Yone ne Yezu, netujingulule biakane bua tshinyi mikenji eyi mifume mu diulu idi ne mushinga mukole. 2 Timote 3:16; Luka 1:5-33, NW.

▪ Mmikenji kayi ibidi ya mushinga mukole idi mifume mu diulu?

▪ Nnganyi udi usambuluja mikenji eyi, ne mbanganyi badibo bayimanyisha?

▪ Bua tshinyi ki mbipepele bua kuitaba mikenji eyi ibidi?