Nshapita wa 120

Mivilu mu lubanza

BAMANE kushiya Yezu mu budimi bua Njetsemanyi ne banyeme ne buôwa pamue ne bapostolo bakuabu, Petelo ne Yone badi biimana mu kunyema kuabu. Pamu’apa, badi bafika muaba udi Yezu padibu baya nende kua Ana. Padi Ana umutuma kudi Muakuidi Munene Kayifase, Petelo ne Yone badi balonda pa bule, anu mudibi bimueneka, bikale batshina bua kubueja muoyo wabu mu njiwu, eku baditatshisha bua kumanya tshienzekela Mfumuabu.

Padibu bafika ku lupangu lualabale lua Kayifase, Yone udi ufika ku dibuela mu lubanza, bualu mmumanyike kudi muakuidi munene. Petelo udi yeye ushala muimane pambelu ku tshiibi. Kadi, katupa kîpi pashishe, Yone udi upingana ne wakula ne mulami wa tshiibi, nsongakaji musadidi, ne muine eu udi wanyisha bua Petelo kubuela.

Bu mudiku mashika, bena mudimu ne tupita tua muakuidi munene badi batemesha kapia ka makala. Petelo udi udisanga kudibu bua kuota kapia mu dindila dikosa dia tshilumbu tshia Yezu. Muaba au, mu dinkenke dia kapia, mukaji mulami wa tshiibi úvuá mubueje Petelo udi umutuishila mêsu bilenga. “Wewe kabidi, nuvua ne Yezu muena Ngalileya,” ke mudiye utua tshikemu.

Pa kulubakana bua mudibu bamumanye, Petelo udi uvila kumpala kuabu buonso ne: ki mmumanye Yezu nansha kakese. ‘Tshiena mumumanye, tshiena ngumvua tshiudi musue kuamba to.’

Wamba mêyi aa, Petelo udi upatuka pabuipi ne tshibuelelu tshia lupangu. Kuine aku, nsongakaji mukuabu udi umutuishila mêsu ne wambila kabidi aba badi bimanepu ne: “Muntu wawa bavua ne Yezu wa mu Nazarete.” Petelo udi uvila tshiakabidi, uditshipa ne: “Tshiena mumanye awu muntu to.”

Petelo udi ushala mu lubanza, wenza muende muonso bua kabamumanyi. Pamu’apa ke dîba didi mubidi umuvuayila padi tshitala tshisama mu bufikuluke bua lunkelu. Mu lupolo elu, dilumbuluishibua dia Yezu nditungunuke ne didi dienzekela, anu mudibi bimueneka, mu tshimue tshitupa tshia nzubu wa pa mutu pa lubanza. Kabiyi mpata, Petelo ne bantu bakuabu badi bindile muinshi badi bamona diya ne dipingana bia bajadiki bashilashilangane badi babikidibua bua kutuishisha.

Dîba bu dijima ndikumbane katshia Petelo wamanyika bu umue wa ku binende ba Yezu. Mpindieu, bamue ba ku aba badi bimane pine apu badi basemena kudiye ne bamba ne: “Bulelela, ne wewe kabidi udi wa kudibo, bualu ngakuilu webe udi ukupisha.” Umue wa ku kasumbu aka mmulela wa Malkuse, eu uvua Petelo mukose ditshio. “Tshivua mukumone nende mu [budimi, NW] anyi?” ke mudiye wamba.

“Tshiena mumanye muntu awu to,” ke mudi Petelo ujadika ne bukole buonso. Bushuwa, udi uteta mua kubitabijija mudibu batupakana buonso pa kudiela milawu ne pa kuditshipa, mmuomumue ne: ujinga bua diakabi dimuvuile bikalaye kayi wamba bulelela.

Anu padi Petelo wenza muvilu eu muisatu, tshitala tshidi tshisama. Dine dîba adi, Yezu uvua mupatuke, anu mudibi bimueneka, pa tshisasa tshidi pa mutu pa lubanza, udi ukudimuka ne umutangila. Diakamue, Petelo udi uvuluka mêyi avua Yezu mumuambile kukadi mêba makese patupu mu tshibambalu tshia kuulu ne: “Tshitala katshiyi tshianji kusama misangu ibidi, wewe newikale mumvile misangu isatu.” Ne mutshima musunsuke bua bujitu bua mpekatu wende, Petelo udi upatuka ne wela muadi mukole.

Mmunyi mudi bualu bu nunku mua kumuenzekela? Panyima pa dileja dieyemena mu bukole buende bua mu nyuma, mmunyi mudi Petelo mua kuvila Mfumuende misangu isatu mu lupolo luîpi nunku? Kabiyi mpata, malu mmamujikile mushindu ukena mutekemena. Bulelela budi bukonyangajibua, ne Yezu udi wangatshibua bu muena tshibawu wa patupu. Tshidi tshiakane tshidi tshimueneshibua tshibi, mubinge wangatshibua bu mupiile. Nunku, bua bifimpakaji bia nsombelu au mukole, Petelo wakatenkakana. Diakamue, bukole buende bua dilama lulamatu buakaselemuka; ditshina muntu diakamuzembeja, e kumubuejabi mu dibungama dikole. Bualu bua mushindu’eu kabutuenzekedi nansha kakese! Matewuse 26:57, 58, 69-75; Markuse 14:30, 53, 54, 66-72; Lukase 22:54-62; Yowanese 18:15-18, 25-27, MMM.

▪ Mmunyi mudi Petelo ne Yone bafika ku dibuela mu lubanza lua muakuidi munene?

▪ Mutantshi udi Petelo ne Yone mu lubanza, ntshinyi tshidi tshienzeka mu nzubu?

▪ Mmisangu bungi munyi idi tshitala tshisama, ne mmisangu bungi munyi idi Petelo uvila mudiye kayi mumanye Yezu?

▪ Kudiela milawu ne kuditshipa kua Petelo bidi biumvuija tshinyi?

▪ Ntshinyi tshidi tshisaka Petelo ku divila mudiye kayi mumanye Yezu?