Nshapita wa 123

“Monayi! Ke muntu eu!”

MUKEMESHIBUE bua ngikadilu wa Yezu ne mutuishibue mudiye kayi ne bualu, Pilato udi uteta mushindu mukuabu bua kumulekela. “Bilondeshile tshibidilu tshienu,” ke mudiye wambila misumba, “ntu nnulekela muntu umue mu tshibilu tshia [Pasaka, NW].”

Barabase, mushipianganyi mumanyike, mmukuatshibue pende bu muena lukanu, nunku Pilato udi webeja ne: “Unudi basue bua meme kunu[lek]ela nnganyi? Barabase peshi Yezu udibo bamba ne: Kristo?”

Bamana kuitabijija kudi bakuidi bamfumu bakavua babatombole, bantu badi balomba bua balekele Barabase, kadi bashipe Yezu. Kayi upuekesha maboko, Pilato udi wandamuna, pa kukonka tshiakabidi ne: “Ku babidi aba, unudi basue nnukopuele nnganyi?”

“Barabase,” ke mudibu bela tshibingu.

“Kadi ngenze tshinyi ne Yezu ewu udibo babikila Kristo?” ke mudi Pilato webeja mumane kushikila.

Pa kuela tshibingu ne dîyi anu dimue, badi bandamuna ne: ‘Bamupopele pa mutshi!’ ‘Umupopele pa mutshi! Umupopele pa mutshi!’

Bu mudiye mumanye se: badi balomba lufu lua muntu ukena ne bualu, Pilato udi usuminyina ne: “Mbubi kayi budi muntu eu muenze? Tshiena mumusangane ne bualu bua kumufundila tshibawu tshia lufu to. Nemmunyoke, pashishe mmulekele.”

Nansha mudiye wenza madikolela, musumba mumane kujukila kuulu, ku busonsodi bua bamfumu ba bitendelelu, udi anu wela tshibingu ne: “Bamupopele pa mutshi!” Bamana kuiba lungenyi kudi bakuidi, misumba idi ijinga mashi. Ebi bidi bielesha meji, bualu, kudi mpindieu matuku atanu patupu, bamue ba kudibu bavua pamu’apa munkatshi mua aba bavua basekelele Yezu mu dibuela diende mu Yeruzaleme bu Mukalenge! Mu lupolo elu luonso, bikala bayidi ba Yezu muaba eu, mbashale anu bapuwe ne kabayi badileja.

Padi Pilato umona se: madikolela ende kaena apatula tshipeta tshia nsongo, kadi bishilangane, diyoyo didi’anu dijuka, udi wangata mâyi ne wowa bianza kumpala kua musumba, wamba ne: “Mashi a muntu eu kaena pambidi panyi. Ntshienu tshilumbu!” (NW) Utula mêyi aa, bantu badi bandamuna ne: “Mashi ende ikale pambidi petu ne pa bana betu.” (NW)

Nunku, mu diumvuangana ne malomba abu​—bua dijinga dia kusankisha musumba pamutu pa kuenza tshidiye mumanye ne: ntshiakane—​Pilato udi ulekela Barabase. Udi wangata Yezu, umukopuesha bilamba ne umukumisha. Kabivua bu mututu utubu bela bantu pa tshibidilu to. Tshibejibeji tshia The Journal of the American Medical Association tshidi tshiumvuija ngelelu wa mututu kudi bena Roma:

“Pa tshibidilu, tshia kupianda natshi tshivua mfimbu muîpi (flagrum anyi flagellum) muenza ne mikaba ya biseba ya bule bushilangane, miluka bipia anyi kayiyi miluka, belaku tubulu tukese tua tshiamu anyi tupeyipeyi tua mifuba ya mukoko tusakisha pa kushiya ntanta kampanda. . . . Pavua basalayi bena Roma bapianda balamakaje ne bukole buonso pa nyima pa muena tshibawu, tubulu tua tshiamu tuvua tujula bijûji binene, eku mikaba ya biseba ne mifuba ya mukoko bibuela mu dikoba ne mu misunyi idi muinshi. Pa kutungunuka ne dinyasula, dituanya dia mfimbu divua disunsula misunyi too ne pa mifuba, ne milengu ya misunyi ipueka mashi ivua imueneka.”

Panyima pa disubisha edi ne mututu, badi batuala Yezu mu dibalasa dia nguvernere, ne babikila musumba wonso wa basalayi. Muine emu basalayi badi bamusubisha tshiakabidi pa kuluka tshikata tshia meba ne bamuasatshi ku mutu. Badi bamuteka tshituta mu tshianza tshia balume, ne bamuvuadika tshilamba tshikunzubile, tshia buena tshidi bena bukalenge bavuala. Pashishe, badi bamuamba ne kuseka ne: “Muoyo au, wewe Mukalenge wa bena Yuda!” (NW) Badi kabidi bamutuila mata ne bamutapa mapi mu mpala. Banyenga tshituta tshikolakane mu tshianza, ne bamututa natshi ku mutu, batamba kubueja mu dikoba dia mutu meba masongoloke a “tshikata” tshiende tshia dimufuisha bundu.

Budinemeki ne muoyo mukole bidi Yezu wakama nabi disubishibua edi bidi bilenga mutshima wa Pilato, bimusaka ku dienza makuabu madikolela bua kumusungila. ‘Ke meme ewu nnupatuilaye pambelo bua numanye ne: tshiena mumusangane ne bualu bubi to,’ ke mudiye wambila misumba. Pamu’apa Pilato udi utshinka ne: biamonabu mudibu banyawule Yezu, nebatuyishe mitshima yabu. Padi Yezu wimana kumpala kua musumba eu wa bena mitshima mipape, muvuale tshikata tshia meba ne tshilamba tshia pa mutu tshikunzubile, mpala mukunze ne mashi uleja busami, Pilato udi wamba ne: “Monayi! Ke muntu eu!” (NW)

Nansha mudiye mutapa ne munyuka, muine udi muimane eu mmuntu wa pa buende menemene mu miyuki yonso ya bantu, bushuwa, muntu mutambe bunene wa katshia ne katshia! Eyowa, Yezu mmuleje didinemeka ne dipolesha binenke bidi mene tshimanyinu tshia bunene budi nansha Pilato muine ne bua kuitaba, bualu mêyi ende adi amueneka aleja kanemu ne luse popamue. Yowanese 18:39–19:5; Matewuse 27:15-17, 20-30; Markuse 15:6-19; Lukase 23:18-25, MMM.

▪ Mmushindu kayi udi Pilato uteta bua kulekesha Yezu?

▪ Mmunyi mudi Pilato uteta mua kudiumusha bujitu pambidi?

▪ Dipianda mfimbu divua dienzeka mushindu kayi?

▪ Bamane kumututa ne mfimbu, mmunyi mudi Yezu utshimbakajibua?

▪ Mmadikolela kayi makuabu adi Pilato wenza bua kulekela Yezu?