Nshapita wa 75

Mpokolo wa disanka

YEZU uvua muenze bishima mu mudimu wende mu Ngalileya, ne udi ubienza tshiakabidi mpindieu mu Yudeya. Tshilejilu, udi wipata demon munda mua muntu kampanda, muine uvua umupangisha kuakula. Misumba idi ikatshila, kadi batobolodi badi bajula mpata ya muomumue ne ivua mijula ku Ngalileya: “Udi wipata ba-demon ku bukole bua Belzebube, mfumu wa ba-demon,” ke mudibo bamba. (NW) Bakuabu pabu mbasue bua Yezu afile tshijadiki tshia pa mutu bua kushindika tshidiye, ne badi bakeba kumuteta pa kumulomba tshimanyinu tshia mu diulu.

Pa kujingulula ngenyi yabo, Yezu udi upesha bamutobolodi ba mu Yudeya diandamuna difuane divuaye mupeshe ba mu Ngalileya. Udi ubumvuija ne: bukalenge buonso budi budipandulule, nebupone. “Nunku,” ke mudiye webeja, “pikala Satana pende mudipandulule, mmunyi muashindama bukalenge buende?” Pashishe, udi uleja mudi bamutobolodi bikale mu njiwu pa kuamba ne: “Bingikala ngipata ba-demon ku bukole bua munu wa Nzambi, bushuwa bukalenge bua Nzambi mbumane kufika kunudi.”

Aba badi bamona bishima bia Yezu bavua ne bua kuikala ne ngandamuinu wa muomumue ne aba bakamona Mozese wenza tshishima kampanda kukadi siekele mivule. Bakakema ne: “Mmunu wa Nzambi!” Kabidi, “munu wa Nzambi” ke wakafunda Mêyi Dikumi pa bipeyipeyi bia mabue. Bia muomumue, “munu wa Nzambi”​—spiritu wende munsantu, anyi bukole buenzeji—​ke udi upuijila Yezu bukole bua kuipata ba-demon ne kuondopa babedi. Nunku, Bukalenge bua Nzambi mbufike bushuwa kudi batobolodi aba, bualu Yezu, Mukalenge wa Bukalenge musungula, udi menemene pinapu, munkatshi muabo.

Pashishe, Yezu udi ufila mufuanu bua kuleja se: makokeshi ende a dipata ba-demon ntshijadiki tshia mudiye mupite Satana bukole, anu mudi tshimankinda ulua kutshimuna ne unyenga dibalasa dia muena bia-mvita bivule. Udi wambulula kabidi mufuanu uvuaye mufile mu Ngalileya wa spiritu ukena mukezuke. Spiritu eu udi upatuka munda mua muntu, kadi padi muntu eu upanga kuwuja muaba mushiya patupu ne bintu bilenga, spiritu eu udi upingana ne ba-spiritu bakuabu muanda-mutekete, ne bubi bua muntu eu budi butamba bua kumpala.

Pa kuteleja malongesha aa, mukaji kampanda udi usakibua ku ditua tshikemu ne dîyi dikole mu musumba ne: ‘Difu diakukutuala didi ne disanka ne mabele awakuamua!’ Bu mudi dijinga dia mukaji yonso muena Yuda ndia kuikala mamuende wa muprofete kampanda ne nangananga Masiya, mbiumvuike padi mukaji eu wakula nunku. Mbimueneke bu udi wela meji se: Mariya udi ne bua kuikala muena diakalenga dia pa buadi, bu mudiye mamuende wa Yezu.

Kadi, Yezu udi ululamija ne lukasa luonso mmuenenu wa mukaji eu pa kumuleja mpokolo mulelela wa diakalenga. “Tòo,” ke mudiye wandamuna, “kadi, Bena diakalenga ng’aba badi bumvua dîyi dia Nzambi ne badilama!” Yezu katu muambe nansha kakese mêyi adi aleja se: mamuende Mariya uvua ne bua kuambikibua lumu lua pa bualu. Bishilangane, wakaleja se: diakalenga dia bushuwa didi dipetshibua pa kuikala musadidi muena lulamatu wa Nzambi, apo ki nku malanda kampanda a ku mubidi anyi dienza amue malu manene.

Anu muvuaye muenze mu Ngalileya, Yezu udi ukanyina kabidi bena mu Yudeya badi balomba tshimanyinu tshifume mu diulu. Udi ubambila ne: kabakubapa tshimanyinu tshikuabu pa kumusha tshimanyinu tshia Yona. Yona wakalua tshimanyinu ku dishala diende matuku asatu munda mua mushipa ne ku bumanyishi buende bufila ne dikima, buakatuala tshipeta pa kusaka bena Ninive ku dinyingalala. “Kadi monayi!” ke mudi Yezu wamba, “tshintu tshitambe Yona tshidi apa.” Bia muomumue, Mukalenge mukaji wa ku Sheba wakakatshila bua meji a Solomo. “Kadi monayi!” ke mudi Yezu wamba, “tshintu tshitambe Solomo tshidi muaba eu.”

Yezu udi umvuija ne: padi muntu utemesha muendu, kêna uwuteka mu buina bua mu nzubu peshi mu tshisaka, apo pa tshitekelu tshia muendu bua bantu bamone butoke buawu. Pamu’apa, udi usua kumvuija ne: kulongesha ne kuenza bishima kumpala kua bamue ba ku bamuteleji bena tshitshiu nkufuanangane ne kusokoka butoke bua muendu. Mêsu a babandidi bu nunku ki mmapepele, peshi kaena amona bimpe, nunku kipatshila katekemena ka bishima biende kakena kakumbajibua nansha.

Yezu udi ufuma ku diipata demon munda mua muntu ne ku dipingajila kamama muakulu. Ebi bivua ne bua kusaka bena mêsu mapepele, anyi lumonu lujalame ku ditemba malu aa a tuyayi-tukamone ne kumanyisha lumu luimpe! Kadi, ki ntshidi batobolodi aba benza nansha. Nunku, Yezu udi ukomesha ne: “Nunku, udimuke. Pamu’apa butoke budi munda muebe kabuikadi anu mîdima. Nunku, bikala mubidi webe mujima ukenka, kauyi ne katupa kafikisha kudi mîdima, newikale wonso mu butoke anu bu padi muendu ukutokesha ne nkeke yawu.” Luka 11:14-36; Ekesode 8:18, 19; 31:18; Matayo 12:22, 28, NW.

▪ Padi Yezu wondopa muntu, ngandamuinu wa bamonyi ba muanda eu udi tshinyi?

▪ “Munu wa Nzambi” ntshinyi, ne mmu ngumvuilu kayi mudi Bukalenge bua Nzambi bufike kudi bateleji ba Yezu?

▪ Mpokolo wa diakalenga dia bushuwa ntshinyi?

▪ Mmunyi mudi muntu mua kuikala ne disu dipepele?