Nshapita wa 66

Mu Difesto dia Mitàndà

MUNKATSHI mua bidimu bitue ku bisatu panyima pa batismo wende, Yezu mmuende lumu bikole. Bantu binunu bivule mbamone bishima biende, ne miyuki ya midimu yende mmimuangalake mu ditunga dijima. Mpindieu, bu mudi bantu basangile bua Difesto dia Mitanda mu Yeruzaleme, badi batuadija kumukeba. Badi badiebeja ne: “Muntu au udi kuepi?”

Bantu badi bakokangana bualu bua Yezu. Bamue badi bamba ne: “Mmuntu muimpe.” Bakuabu ne: “Ki mmuntu muimpe to, kadi mmupambuishi wa musumba wa bantu.” Kudi manunganyi mavule a mushindu’eu mu matuku a ntuadijilu wa difesto. Kadi, kakuena udi ne dikima dia kuakuila Yezu patoke, bua ditshina dia kusombuela kua bamfumu ba bitendelelu bena Yuda.

Dituku dia pankatshi dia difesto, Yezu udi ufika. Udi ubanda ku ntempelo kudiye ukemesha bantu bua ndongeshilu wende wa mpatshi. Bu mudi Yezu kayi mulonge nansha kakese mu bilongelu bia ba-rabbi, bena Yuda badi badiebeja ne: “Mmunyi mudi muntu eu mumanye mikanda, pende kayi mulonge mu bilongelu?”

“Bindi ndongesha ki mbianyi to,” ke mudi Yezu umvuija, “kadi mbia eu udi muntume. Biajinga muntu kuenza disua Diende, neamanye pa bidi bitangila dilongesha bikaladi dia kudi Nzambi peshi bingikala ngakula ku bukokeshi buanyi nkayanyi.” Dilongesha dia Yezu ndisuikakane bikole ku mikenji ya Nzambi. Nunku, bivua ne bua kumueneka kudi buonso se: uvua ukeba butumbi bua Nzambi, apo ki mbuende yeye muine to. “Mozese wakanupesha Mikenji, ki mmudibi anyi?” ke mudi Yezu webeja. Pa kubakanyina, udi wamba ne: “Nansha umue wa kunudi kêna utumikila Mikenji.”

“Bua tshinyi nudi nukeba bua kunshipa?” ke mudi Yezu webeja pashishe.

Bamue bantu mu musumba eu, imue misangu bakumbudi badi batantshile difesto, ki mbamanye madikolela adi enjibua bua kumushipa. Buabu buobu kuteta mua kushipa mulongeshi wa dilambu wa mushindu’eu mmuanda udi kauyi mua kuvuilangana mu meji. Nunku badi batshinka ne: ngelelu wa meji wa Yezu ng’wa matshimbu. “Udi ne demon,” ke mudibo bamba. “Nnganyi udi ukeba mua kukushipa?”

Nansha mudi musumba kauyi mua kubijingulula bamfumu ba bitendelelu bena Yuda badi ne lungenyi lua kushipesha Yezu. Kukadi tshidimu ne tshitupa, bamfumu aba bakateta mua kushipa Yezu pakondopaye muntu kampanda dituku dia Nsabatu. Nunku, Yezu udi utandula mpindieu butshimbakane buabu pa kubakonka ne: “Bikala muntu mua kutengudibua dia Nsabatu bua mikenji ya Mozese kayishipibu, mmunyi munudi nunkuatshila tshiji tshikole bua pamvua muondope menemene muntu dia Nsabatu? Lekelayi kulumbuluisha bilondeshile mmuenekelu, kadi lumbuluishayi ne kulumbuluisha kuakane.”

Bena mu Yeruzaleme, bu mudibo bamanye muanda eu, badi bamba mpindieu ne: “Muine eu ki mmuntu udibo bakeba bua kushipa anyi? Kadi, monayi! nyeu wakula patoke, ne kabayi bamuamba bualu nansha bumue. Bamfumu ki mbafike ku dimanya bushuwa se: muine eu ke Kristo anyi?” Bena mu Yeruzaleme aba badi bumvuija bua tshinyi kabena bitabuja Yezu bu Kristo: “Tudi bamanye kùdì muntu eu mufumine; kadi palua Kristo, muntu nansha umue kakumanya kudiye ufumina.”

Yezu udi wandamuna ne: “Nudi bammanye ne bamanye kundi mufume. Kadi, tshiena mulue ku bukole buanyi nkayanyi, apo eu wakuntuma udiku bushuwa, ne kanuena bamumanye. Meme ndi mumumanye, bualu ndi muleji-mpala wende, ne Yeye ke udi muntume.” Padibo bumvua nunku, badi bakeba mua kumukuata, pamu’apa bua kumuela mu buloko peshi kumushipesha. Kadi kabena bafika ku dimutua bianza, bualu dîba dia Yezu kufua ki ndianji kukumbana.

Pabi, bavule badi bitabuja Yezu, bualu badi ne tubingila tuvule. Ee, Yezu uvua muende pa mâyi, mutuuyishe bipepele, mubatamije mbuu muvuanduluke, mudiishe bantu binunu bivule mu tshishima ne mampa ne mishipa bungi bukese, muondope babedi, muendeshe batebuki, mutabeje mêsu a bafofo, muondope bena nsudi, mubiishe too ne bafue. Nunku badi bebeja ne: “Palua Kristo, neenze bimanyinu kupita bidi muntu eu muenze anyi?”

Padi Bafarizeyi bumvua musumba unungana pa malu aa, buobo ne bakuidi banene badi batuma tupita bua kukuata Yezu. Yone 7:11-32, NW.

▪ Ndîba kayi didi Yezu ufika mu difesto, ne bantu badi bamba tshinyi bua bualu buende?

▪ Bua tshinyi bidi bienzeka bua bamue kuamba ne: Yezu udi ne demon?

▪ Bena mu Yeruzaleme badi ne mmuenenu kayi pa bidi bitangila Yezu?

▪ Bua tshinyi bavule badi bitabuja Yezu?