Nshapita wa 85

Mu dikeba badi bajimine

YEZU udi ne dijinga dikole dia kukeba ne kupeta aba badi badiakaje bua kusadila Nzambi ne budipuekeshi. Nunku, udi ukeba miaba yonso ne wakula ne muntu yonso pa Bukalenge, nansha benji ba mpekatu bamanyike. Bantu ba mushindu’eu ke badi basemena mpindieu kudiye bua kumuteleja.

Pa kumona muanda eu, Bafarizeyi ne baskribe badi bajana Yezu bualu udi utantshila bantu badibo bangata bu ba patupu. Badi banungana nunku: “Muntu ewu udi muanyishe benji ba malu mabi, udia kabidi nabo.” Bua didinemesha dikole, buobo bine kabena mua kuenza nunku! Bafarizeyi ne baskribe badi bangata bapuekele bu lupuishi lua muinshi mua makasa abu. Nunku, badi bababikila ne: ‛am ha·’aʹrets, “bantu ba ditunga [buloba],” bua kuleja dibapepeja diabo.

Bishilangane, Yezu udi wangata muntu yonso ne kanemu, uleja bulenga ne luse. Bu tshipeta, bavule ba ku bapuekele, pamue ne bantu badi bamanyike bu benji ba malu mabi, badi bazukila bua kumuteleja. Kadi netuambe tshinyi bua bijanu bia Bafarizeyi kudi Yezu bua madikolela mavule adiye wenza bua kuambuluisha aba badibo bangata bu bantu ba patupu?

Yezu udi wandamuna ku mêyi abu a diambu pa kulonda mufuanu. Udi wangata mmuenenu wa Bafarizeyi bine, bu bantu bakane ne bakubibue kudi Nzambi, bishilangane ne ba-‛am ha·’aʹrets bakumbanyine dipepejibua badi bapambuke ne bajimine. Udi webeja ne:

“Nganyi wa kunudi eku, yeye muikale ne mikoko yende lukama, mujimije mukoko umue, kayi ushiya mikuabo makumi tshitema ne tshitema mu tshipela, uya kukeba udi mujimine awu too ne paupetaye? Yeye mumane kuupeta, udi uuteka pa makaya ende ne usanka. Ne padiye upingana kuende, udi ubikila balunda bende ne bena mutumba, ubambila ne: ‘Sankayi pamue nanyi, bualu ndi mupete mukoko wanyi uvua mujimine.’”

Pashishe, Yezu udi ufila dilongesha dia muyuki wende pa kumvuija ne: “Ndi nnuambila ne: ke muikala disanka dinene mu diulu, padi muenji wa bibi umue [unyingalala, NW]; disanka edi nedipite dikalabo nadio bua bakane makumi tshitema ne tshitema badi kabayi bakengela [dinyingalala, NW].”

Bafarizeyi badi badiangata mudibo bakane, pa nanku kabena bakengela dinyingalala. Kukadi bidimu bibidi, pavua bamue ba kudibo bajana Yezu muvuaye udia ne balambuishi ba bitadi ne bena mpekatu, wakabambila ne: “Ndi mulue bua kubikila, ki mbakane, apo benji ba mpekatu.” (NW) Bafarizeyi badikokodi mudibo bakane badi bapanga kujingulula dikengedibua dia kunyingalala, kabena bapetesha disanka mu diulu. Kadi, didi dipeteshibua bushuwa kudi bena mpekatu banyingaladi.

Bua kukolesha menemene lungenyi lua se: didilengeja dia bena mpekatu bajimine didi mpokolo wa disanka dinene, Yezu udi ulonda mufuanu mukuabu. Udi wamba ne: “Nansha mukaji kayi, yeye muikale ne [drakma, NW] dikumi, mujimije umue, kayi utemesha muendu, ukomba mu nzubu, ukeba bimpe too ne pamupetaye? Yeye mumane kumupeta, udi ubikila balunda bende ne bena mutumba, ubambila ne: ‘Sankayi pamue nanyi, bualu ndi mupete [drakma, NW] wanyi uvua mujimine.’”

Pashishe, Yezu udi ufila dilongesha dia muomumue. Udi utungunuka pa kuamba ne: “[Ndi nnuambila ne: kudi disanka munkatshi mua banjelu ba Nzambi bua muena mpekatu umue udi unyingalala, NW].”

Mmushindu kayipu udi ditabalela edi dia dinanga dia banjelu bua didilengeja dia bena mpekatu bajimine ditamba kukemesha! Tshidi tshipita kulenga mutshima ntshia se: ba-‛am ha·’aʹrets aba bena bupuekele ne bapepejibue badi bababidila muabi wa kulua bena mu Bukalenge bua Nzambi bua mu diulu. Ku muanda eu, badi bapeshibua muanzu munene mu diulu kupita eu wa banjelu bine! Kadi, pamutu pa kuleja lubabu anyi kudiumvua bu bapuekeshibue milongo, ne budipuekeshi banjelu badi baleja dianyisha mudi bantu aba bena mpekatu bakama ne batshimuna nsombelu yabafumba bua kusadila bu bakalenge ne bakuidi ba mu diulu bumvuidianganyi ne bena luse. Lukase 15:1-10, MMM; Matayo 9:13; 1 Kolinto 6:2, 3; Buakabuluibua 20:6.

▪ Bua tshinyi Yezu udi utantshila benji ba mpekatu ba dilambu, ne ebi bidi bimukebela bijanu kayi kudi Bafarizeyi?

▪ Mmunyi mudi Bafarizeyi bangata bantu ba milongo mipuekele?

▪ Mmifuanu kayi idi Yezu utumika nayi, ne ndilongesha kayi ditudi mua kupetelamu?

▪ Bua tshinyi kusanka kua banjelu kudi kukemesha?