Nshapita wa 89

Mu luendu bua kuleja luse mu Yudeya

KUKADI mbingu, mu Difesto dia Dijidila ku Yeruzaleme, bena Yuda bavua bakeba bua kushipa Yezu. Nunku, wakenza luendu mutangile ku nord, mu buloba budi pabuipi ne Mbuu wa Ngalileya, anu mudibi bimueneka.

Matuku mashale uvua mulonde tshiakabidi njila wa ku sud mutangile ku Yeruzaleme, wenda ufila bumanyishi mu misoko ya Pereya, distrike dia ku Est kua Musulu wa Yordane. Padiye ujikija kulonda mufuanu wa mubanji ne Lazare, udi utungunuka pa kulongesha bayidi bende malu akavuaye mulongeshe pavuaye mu Ngalileya.

Tshilejilu, udi wamba ne: bivua kuikala bitambe buimpe bua muntu kampanda “bu dibue dia mpelu mua kukudikibua mu nshingu muende ne kukupibuaye mu mbuu” pamutu pa yeye kulenduisha umue wa ku “bakese” ba Nzambi. (NW) Udi uzangika kabidi dikengedibua dia kubuikidilangana, umvuija ne: “[Muanenu] yeye mukuenzele bibi misangu muanda mutekete ku dituku, mupingane kuudi misangu muanda mutekete, ukuambila ne: ‘ndi ndilengeja’, umufuile luse.” (MMM)

Padi bayidi balomba ne: “Tuvudijile ditabuja,” Yezu udi ubandamuna ne: “Bu nuenu ne ditabuja bunene bu bua katete ka mutarde, nuvua mua kuambila mutshi wa mûriya eu ne: ‘Shimbuka ne udijiike mu mbuu!’ ne uvua mua kunutumikila.” (NW) Nunku, nansha ditabuja dikese didi mua kukumbaja malu manene.

Pashishe, Yezu udi utumika ne muanda wa mu nsombelu bua kuleja tshikadilu tshiakanyine musadidi wa Nzambi Wa-Bukole-Buonso. “Nganyi wa kunudi eku, yeye muikale ne [mupika, NW] udima, nansha ulama bimuna, umuamba ne: ‘Luaku ku mesa lukasa tudie?’ Neamuambile amu ne: ‘Ndongoluele biakudia, udianye mukaba too ne pangikala mudie, munue; kunyima neudie pebe, unue kabidi.’ Udi ne bua [kuleja dianyisha kudi mupika, NW] wende ewu bua padiye muenze tshivuaye mumufundile, ki mmuomo anyi? Ke mudibio ne buenu nuenu kabidi; panuikala benze bionso bidibo banufundile, nuambe ne: ‘Tudi [bapika, NW] ba tshianana, tudi benze amu tshituvua ne bua kuenza.’” Nunku, basadidi ba Nzambi kabena ne bua kumona bu badi benzela Nzambi bualu kampanda buimpe ku budisuile pa kumusadila. Bishilangane, badi ne bua kuvuluka misangu yonso muabi wabo wa kumutendelela bu bena mu nzubu wende ba kueyemenyibua.

Yezu mumane kulonda mufuanu eu, anu mudibi bimueneka, lupolo luipi pashishe mutumibue kampanda udi ufika. Mariya ne Marta, bana babo ne Lazare ba bakaji badi basombele mu Betaniya wa Yudeya, ke bavua bamutume. “Mukelenge, ûdi musue udi usama,” ke mudi mutumibue ulonda.

Yezu udi ukudimuna ne: “Disama edi kadiena ne lufu bu kipatshila, apo mbua butumbi bua Nzambi, bua se: Muana wa Nzambi atumbishibue ku diambuluisha diadi.” (NW) Yeye mumane kushala matuku abidi kuine kudiye eku, Yezu udi wambila bayidi bende: “Tupinganayi mu Yudeya.” (MMM) Kadi, badi bamuvuluija ne: ‘[R]abi, bena Yuda bakakeba kukukuma mabue anu katataka, wewe uyayaku kabidi, anyi?’

“Kudi mêba dikumi ne abidi a munda-munya, ki mmudibi anyi?” Ke mudi Yezu ubebeja bua kubandamuna. “Biendakana muntu mu munya kêna udituta ku tshintu nansha tshimue, bualu udi umona munya wa buloba ebu. Kadi biendakana muntu butuku, udi udituta ku tshintu kampanda, bualu butoke kabuena munda muende.” (NW)

Tshidi Yezu usua kuamba, anu mudibi bimueneka, ntshia se: “mêba a munda-munya,” anyi lupolo luvua Nzambi mujadike bua mudimu wende wa pa buloba, ki nduanji kutua ku tshibungubungu, ne bu mutshidi mêba aa kuoku, muntu nansha umue kêna mua kumuenza bualu bubi. Udi ne bua kutumika menemene ne lupolo luipi elu lua “munda-munya” ludi lumushadile, bualu pashishe “butuku” nebulue, pikala baluishi bende bamushipe.

Yezu udi usakidila ne: “Mulunda wetu Lazare mmulale, kadi ndi nya kuine aku bua kumubiisha ku tulu.” (NW)

Bimueneka bu badi bela meji ne: Lazare udi wikisha pa kulala ne nunku etshi ntshimanyinu tshilenga tshia se: neasanguluke, bayidi badi bandamuna Yezu ne: “Mukelenge, bikalaye mulale tulu, neasangale.”

Ke padi Yezu ubambila patoke ne: “Lazare mmufue. Ndi nsanka buenu nuenu bua pamvua tshiyi muye, bua nuenu kuitaba. Kadi tuyayi kudiye.” (MMM)

Pa kumona ne: Yezu neikale mua kushipibua mu Yudeya, Tomase, ne lungenyi lua kumutua nyama ku mikolo, udi ukankamija binende bayidi ne: “Tuyayi petu, tuye kufua nende.” (MMM) Nunku, babueja mioyo yabu mu njiwu, bayidi badi bafila Yezu mu luendu elu lua diya kuleja luse mu Yudeya. Luka 13:22; 17:1-10; Yone 10:22, 31, 40-42; 11:1-16.

▪ Nkuepi kuvua Yezu mulongeshe matuku mashale?

▪ Mmalongesha kayi adi Yezu wambulula, ne mmuanda kayi wa mu nsombelu udiye umvuija, ne muine eu mbua kuzangika tshinyi?

▪ Ndumu kayi ludi Yezu upeta, ne udi usua kumvuija tshinyi padiye wakula bua “munda-munya” ne “butuku”?

▪ Padiye upatula miaku eyi ‘Tuyayi petu, tuye kufua nende,’ Tomase udi usua kuamba tshinyi?