Nshapita wa 21

Mu nsunagoga wa tshimenga tshiakakolela Yezu

BUSHUWA, disalu dikole didi dienzeka padi Yezu upingana mu Nazarete mudiye mukolele. Kukadi tshidimu ne pa mutu, kumpala kua kuya bua kutambuishibua kudi Yone, Yezu uvua mumanyike bu muena mudimu wa mabaya. Kadi mpindieu, mmumanyike miaba yonso bu muenji wa bishima. Bena mu tshimenga tshiende badi ne mutshima kulukulu bua kumumona wenza imue ya ku midimu eyi ya dikema munkatshi muabu.

Badi batamba kusansakata padi Yezu, bilondeshile tshilele tshiende, uya ku nsunagoga wa muin’emu. Dîba dia dilongesha, udi wimana kuulu bua kubala, ne badi bamupesha muvungu wa muprofete Yeshaya. Udi upetamu muaba udibu bakula bua Kampanda muela manyi a spiritu wa Yehowa, mêyi adi asanganyibua mu Yeshaya nshapita wa 61 mu Bible wetu wa lelu.

Mumane kubala muikala Kampanda eu ne bua kumanyisha dipikudibua dia bena lukanu, dipetulula dia lumonu kudi bafofo, ne tshidimu tshia bulenga bua kudi Yehowa, Yezu udi upingaja muvungu kudi musadidi ne usomba. Mêsu wonso mmamutangile ne ntema. Pashishe, udi utuadija kuakula, imue misangu munkatshi mua lupolo kampanda, umvuija ne: “Lelu’eu, mufundu eu unuafumi ku diumvua wakumbanyi.”

Bantu badi bakema bua “busheme bua mêyi” ende ne bambilangana ne: “Eu mmuana wa Yozefe, ki mmuomu’anyi?” Kadi, bu mudiye mudianjile kumanya ne: mbasue kumona mudiye wenza bishima, Yezu udi utungunuka ne: “Bushuwa, nenungelele lusumuinu elu ne: Munganga, diondapa wewe muine. Bionso bidibo batuambile ne: mbienzeke mu [Kapernaume, NW], ubienze ne munu mu musoko wenu.” (Mukenji Mulenga) Mbimueneke ne: bena muabu ne Yezu ba kale badi bela meji ne: uvua mua kutuadijila ne bishima biende bia luondapu muabu, nunku bena mu tshimenga tshiende bavua kulabula disanka edi diambedi. Nunku badi bamona ne: Yezu mmubapepeje.

Padiye ujingulula ngelelu wabu wa meji, Yezu udi ulonda imue miyuki ne ubalamikayi. Kuvua bakamba bavule mu Izalele mu matuku a Eliya, ke mudiye umvuija, kadi Eliya kakatumibua nansha kudi umue wa kudibu. Apo wakaya kudi mukamba ukena muena Izalele wa mu Sidona, ne wakamupandisha ku nsombelu mukole mu tshishima. Ne mu matuku a Elisha kuvua bena nsudi ba bungi, kadi Elisha wakakezula anu Naamana muena Syria.

Pa kukuata tshiji bua miyuki ya dielekeja eyi ikena milengele kudibo idi itandula budinangi buabu ne dipanga diabu dia ditabuja, aba badi mu nsunagoga badi bajukila kuulu ne bakoka Yezu too ne pambelu pa tshimenga. Kuineku, pa mupulumuku wa mukuna padi Nazarete muibakila, badi bateta kumukupa muinshi. Kadi Yezu udi ubadiopoka ne umuka kayi mujiwuke. Luka 4:16-30, NW; 1 Bakelenge 17:8-16; 2 Bakelenge 5:8-14.

▪ Bua tshinyi kudi disalu dikole mu Nazarete?

▪ Bantu badi bela meji kayi bua muyuki wa Yezu, kadi ntshinyi tshidi tshibafikisha munda pashishe?

▪ Ntshinyi tshidi bantu bateta bua kuenzela Yezu?