Nshapita 2

Muambika lumu kumpala kua kuledibua

PADI muanjelu Gabriele ujikija kuambila nsongakaji Mariya ne: nealele muana wa balume wavua mukalenge wa kashidi, Mariya udi webeja ne: “Abi nebienzeke munyi, bualu tshiena mmanyangana ne mulume?”

“Spiritu munsantu neakutulukile,” ke mudi Gabriele umvuija, “ne bukole bua Mutambe-Kutumbuka nebukubuikile ne mundidimbi wabo. Bua kabingila aku kabidi, tshialedibua netshibikidibue ne: tshinsantu, Muana wa Nzambi.”

Bua kuambuluisha Mariya bua kuitaba mukenji wende, Gabriele udi usakidila ne: “Ne, tangila! Elizabete mulela webe mmuimite pende muana wa balume, ku bukulakaje buende, ne ngondo eu ng’wende muisambombo, yeye uvua ubikidibua ne: nkumba; bualu, kudi Nzambi dîyi nansha dimue kadiena mua kupanga kukumbana.”

Mariya udi witaba dîyi dia Gabriele. Ne ndiandamuna kayi didiye ufila? “Tangila! Nsongakaji mupika wa Yehowa!” ke mudiye utua tshikemu. “Bingenzekele anu bilondeshile mêyi ebe.”

Lupolo luipi pashishe padi Gabriele umushiya, Mariya udi udilongolola ne uya kukumbula Elizabete, udi musombe ne bayende, Zekaya, mu buloba bua mikuna bua Yudeya. Bu mudi Mariya musombele ku Nazarete, n’luendu lule lua matuku bu asatu anyi anayi.

Ndekelu wa bionso padi Mariya ufika kua Zekaya, udi ubuela mu nzubu ne wela muoyo. Diakamue, Elizabete udi uwujibua tente ne spiritu munsantu, ne udi wambila Mariya ne: “Udi mubeneshibue munkatshi mua bakaji, ne tshimuma tshia mu lukùtù luebe ntshibeneshibue! Ndisanka kayipu edi buanyi meme, dia kumona mamuende wa Mukalenge wanyi ulua kundi? Bualu, tangila! Anu padi dîyi dia kuela kuebe kua muoyo dituta ku matshi, muana mukese udi mu lukùtù luanyi wakatamuki ne disanka divule.”

Padiye umvua mêyi aa, Mariya udi wandamuna ne disakidila difume mu mutshima ne: “Anyima wanyi udi utenda Yehowa, ne lungenyi luanyi kaluena mua kudikanda bua kuzawuka ne disanka bua Nzambi, Mupandishi wanyi; bualu watangidi nsombelu wa bupuekele wa nsongakaji mupika wende. Bualu, tangila! Biangatshile ku mpindieu, bipungu bionso nebingambe ne: ng’wa diakalenga; bualu, tangila! Muena Bukole mmungenzele malu manene.” Pabi, nansha mudibo babaleje bulenga, Mariya udi upingajila Nzambi lumu luonso. “Dîna diende ndinsanto,” ke mudiye wamba, “ne bipungu ku bipungu luse luende ludi pa aba badi bamutshina.”

Mariya udi utungunuka ne kusamuna Nzambi mu musambu wa mulayi mufundisha ku spiritu, wamba ne: “Wenji malu a bukole ne diboko diende, e kutangalaja badibandishi mu dijinga dia mitshima yabu. Watonkodi ba-nkole pa mioba yabu ne kubandisha badipuekeshi; ukutshishi tente bena nzala ne bintu bilenga ne kualukija bianza bitupu aba badi ne bubanji. Watuadi diambuluisha bua Izalele musadidi wende, bua kuvuluka luse luende, anu muvuaye mudianjile kuambila bankambua betu, Abrahama ne dimiinu diende, bua kashidi.”

Mariya udi ushala kua Elizabete ngondo bu isatu, ne kakuyi mpata, udi diambuluisha dinene bua Elizabete ukadi mufike mu mbingu ya ndekelu ya dîmi diende. Mbimpe bitambe bushuwa bua bakaji aba babidi bena lulamatu kushalabu pamue mu tshikondo etshi tshibenesha tshia muoyo wabu bu mudi yonso wa kudibo ne muana mu difu ku diambuluisha dia Nzambi!

Udiku pebe mutabalele lumu luvua luambika Yezu kumpala mene kua kuledibua kuende anyi? Elizabete wakamubikila ne: “Mukalenge wanyi,” ke muana utshivua munda muende e kukatamuka ne disanka pakamueneka Mariya musangu wa kumpala. Panyima, ku lukuabu luseke bantu bakuabu nebaleje anu kanemu kakese bua Mariya ne bua muanende wavua kuledibua, anu mutuavua kubimona. Luka 1:26-56, NW.

▪ Bua kuambuluisha Mariya bua kujingulula mushindu wimitaye, Gabriele udi wamba tshinyi?

▪ Mmunyi muvuabo bambike Yezu lumu kumpala kua kuledibuaye?

▪ Ntshinyi tshidi Mariya wamba mu musambu wa mulayi bua kusamuna Nzambi?

▪ Mariya udi ushala kua Elizabete tshikondo bule kayi, ne bua tshinyi mbikumbanyine bua Mariya kushala kua Elizabete mu tshikondo etshi?