Nshapita 6

Muana wa dilaya

PAMUTU pa kupingana ku Nazarete, Yozefe ne Mariya badi bashala mu Beteleme. Padi Yezu ukumbaja matuku muanda-mukulu, badi bamutenguisha, mu diumvuangana ne Mikenji ivua Nzambi mupeshe Mozese. Bidi bimueneka se: bilondeshile tshilele, muana wa katoto wa balume udi widikibua kabidi dîna diende mu dituku dia muanda-mukulu. Nunku, badi bidika muanabo dîna dia Yezu, anu muvua muanjelu Gabriele mubambile kumpala.

Ngondo mujima ne pa mutu wapitshi, Yezu wakumbaji matuku 40. Baledi bende badi baya nende penyi mpindieu? Ku ntempelo mu Yeruzaleme, udi mutantshi wa kilometre mikese ne muaba udibo basombele. Bilondeshile Mikenji mipesha Mozese kudi Nzambi, mukaji yonso udi mulele muana wa balume, udi ne bua kuya ku ntempelo padi matuku 40 akumbana bua kufila mulambu wa dikezudibua.

Ke tshidi Mariya wenza. Bu wende mulambu, udi utuala nyunyu mikese ibidi. Ebi bidi bisokolola nsombelu wa Yozefe ne Mariya pa bidi bitangila bintu bia ku mubidi. Mikenji ya Mozese idi ileja ne: lutumba lua tshimpanga, ludi ne mushinga mukole kupita nyunyu, ludi ne bua kulambudibua. Kadi, pikala mamu kayi mua kululambula, tumande-nkutshi tubidi anyi nkudimba ibidi nebikale mua kujikija bualu.

Mu ntempelo, tatu kampanda mukulakaje udi wangata Yezu mu maboko ende. Dîna diende didi Simeon. Nzambi uvua mumusokoluele ne: kakufua kayi muanji kumona Kristo, peshi Masiya mulaya wa Yehowa. Dituku adi, padi Simeon ufika ku ntempelo, spiritu munsantu udi umulombola too ne kudi muana udibo bambule kudi Yozefe ne Mariya.

Padiye wambula Yezu, Simeon udi wela Nzambi tuasakidila, wamba ne: “Mpindieu, Mukalenge Mudikadile, udi ulekela mupika webe uya mu ditalala bilondeshile dîyi diebe; bualu mêsu anyi amonyi tshiamu tshiebe tshia dipetesha lupandu tshiudi mulongolole ku mêsu kua bisamba bionso, butoke bufundila diumusha tshilamba tshidi pa matunga ne butumbi bua Izalele tshisamba tshiebe.”

Pa kumvua mêyi aa, Yozefe ne Mariya badi bakema. Pashishe, Simeon e kubabenesha ne kuambila Mariya ne: muanende “mmuteka bua kupona ne kubandishibua tshiakabidi kua ba bungi mu Izalele” ne kabidi kanyinganyinga, anu bu muele wa nkanza musakisha, nekasompole anyima wende.

Muprofete mukaji Ana, mukulakaje wa bidimu 84, udiku pende. Bushuwa, katu muanji kupumbisha bua kulua ku ntempelo. Pa dîba adi, udi usemena ne utuadija kuela Nzambi tuasakidila ne wambila yonso udi musue kumuteleja bualu bua Yezu.

Ndisanka kayipu didi nadi Yozefe ne Mariya bua mianda eyi idi mienzeke ku ntempelo! Bushuwa, bionso ebi bidi bibapesha tshijadiki tshia se: muana udi Eu uvua Nzambi mulaye. Luka 2:21-38; Lewitiki 12:1-8, NW.

▪ Bilondeshile tshilele, mbimueneke se: muana wa balume muena Izalele, uvua ne bua kuinyikibua dîna dîba kayi?

▪ Ntshinyi tshivuabu balomba mamu muena Izalele pavua muanende wa balume ukumbaja matuku 40, ne mmunyi mudi dikumbaja dia muanda eu disokolola nsombelu wa Mariya wa bintu bia ku mubidi?

▪ Pa dîba adi, mbanganyi badi bajingulula tshidi Yezu, ne mmunyi mudibu baleja muanda eu patoke?