Nshapita wa 86

Muanu wa muana mujimine

DIAKAMUE padiye ujikija dilondela Bafarizeyi mufuanu wa dimueneka dia mukoko mujimine ne wa drakma mujimine, Yezu udi utungunuka mpindieu pa kulonda mukuabu mufuanu. Muine eu udi wakula bua tatu kampanda wa dinanga ne malu adiye wenzela bana bende ba balume babidi, badi buonso buabu benze bilema binene.

Tshilumbu tshia muakunyi, muena bualu wa kumpala, ke tshidi tshianji kuedibua mu tshialu. Dimu’edi, udi usangisha biende bionso bia bumpianyi, bivua tatuende mumupeshe kakuyi dielakana. Pashishe, udi umuka ku nzubu kua baledi ne uya kudibueja mu nsombelu wa tshiendenda tshipite bubi. Kadi, tuteleje Yezu atulondele muanu wende, ne utete né udi mua kujingulula aba badi bena bualu baleja bushuwa.

“Muntu kampanda,” ke mudi Yezu utuadija, “uvua ne bana ba balume babidi. Muakunyi kuambila tatuende ne: ‘Tatu, umpeshe bianyi biuma bia bumpianyi.’ Tatuabo kubabanyina bintu biende.” Ntshinyi tshidi muana muakunyi eu wenza ne bintu biapetshiyi?

“Kunyima kua matuku makese,” ke mudi Yezu umvuija, “muana muakunyi kusuika biende bionso, kuya ku ditunga dia kule, kubutulaku biuma biende bionso mu buenzavi.” Bua kuamba bulelela, udi utula mfranga yende mu diabanyina bandumba. Pashishe, tshikondo tshia ntatu e kufika, anu mudi Yezu utungunuka ne kulonda ne:

“Yeye mumane kubitula nanku, tshiyole tshia nzala tshikole kubuela mu ditunga adio, kutuadijaye kumvua dikenga. Kuyaye kulomba mudimu kua muntu mukuabo wa mu ditunga amu. Awu kumutuma mu madimi ende bua kulamaye ngulube. Uvua ujinga kudia biakudia bivua ngulube idia, [ne muntu kavuaku mua kumupa kantu, NW].”

Kuenzejibua bua kulama ngulube, nkupuekeshibua milongo kayipu, bualu bilondeshile Mikenji ya Mozese, ngulube nnyama ikena mikezuke! Kadi, tshivua tshitamba kubungamija nsongalume nnzala ivua imuobeka ne imusaka too ne ku dijinga biakudia bivuabo bapesha ngulube. Bua dikenguluka dikole, Yezu udi wamba ne: “kudielaye meji mundamunda.”

Utungunuka ne muanu wende, Yezu udi umvuija ne: “[Kudiambilaye, NW] ne: ‘Bena mudimu ba tatu badi ne biakudia bipite bungi, meme mfua ne nzala kunu. Ndi ngumbuka, mpingane kudi tatu, mmuambile ne: Tatu, ndi muenzele [diulu, NW] bibi ne wewe kabidi. Tshiena muakanyine bua umbikile kabidi muanebe, kadi untangile bu umue wa ku bena mudimu bebe.’ Kumbukaye, kupingana kudi Tatuende.”

Kudi bumue bualu bua kueleela meji: Bu tatuende mumukabule ne mumutayishile tshiji tshiende, pamu’apa muana kavua mua kuelangana meji mushindu’eu pa tshivua tshikengela kuenza. Uvua nansha mua kupangadija bua kupingana mu ditunga dimulela, kadi kuya kukeba mudimu kukuabu, bua kavu kutuilangana ne tatuende. Kadi, lungenyi lua mushindu’eu kaluakamuvuila. Wakajinga bua kupingana kua baledi bende!

Mbidimuenekele, tatu wa mu mufuanu wa Yezu udi uleja Tatuetu wa mu diulu muena dinanga ne muwule tente ne luse, Yehowa Nzambi. Imue misangu, wewe pebe udi mujingulule ne: muana mujimine, peshi muena bitulatula, udi uleja benji ba mpekatu bamanyike. Bafarizeyi badi Yezu ulondela muanda eu bavua bamudiwule matuku mashale bualu uvua udia ne bine bena mpekatu aba. Kadi muan’a bute udi pende uleja nganyi?

Padi muana mujimine umueneka

Mu mufuanu wa Yezu, padi muana mujimine, anyi muena bitulatula, upingana ku nzubu kua tatuende, ndiakidila dia mushindu kayi didiye upetaku? Tuteleje mudi Yezu umvuija:

“Utshivua pa bule, tatuende umumona, luse kumukuatalu; kuyaye lubilu, kumuela maboko ku nshingu, kumupukilaye ne dinanga.” Ntatu kayipu eu muena luse ne muena musangelu, nunku udi bushuwa uleja Tatuetu wa mu diulu, Yehowa!

Tatu eu uvua pamu’apa mumvue lumu lua nsombelu wa tshiendenda uvua nende muanende. Pabi, udi umuakidila ku nzubu kayi windila bua kupeta mumvuija malabale. Yezu udi pende ne tshikadilu tshia diakidilangana tshia muomumue, bualu yeye ng’udi mudianjile kuela tshiidia tshia kutantshila benji ba mpekatu ne balambuishi ba bitadi, badi baleja mu mufuanu bu muana wa bitulatula.

Bushuwa, tatu eu muena busunguluji wa mu mufuanu wa Yezu, kabiyi mpata udi ne lungenyi kampanda pa dinyingalala dia muanende pa kumona kubungama ne kuzengela kuende padiye upingana. Kadi, dinanga didi tatu mudianjile kuleja didi dipepejila muana malu bua kutonda mpekatu yende, anu mudi Yezu ulonda ne: “Muana kumuambila ne: ‘Tatu, ndi muenzele [diulu, NW] bibi ne wewe kabidi, tshiena muakanyine bua umbikile kabidi muanebe. [Ungangate bu umue wa ku bena mudimu bebe, NW].’”

Mêyi mene kaanji kujika mukana mua muana, tatuende udi wenza bualu kampanda, udi utumina bapika bende dîyi ne: “Ndayi lukasa, [nuvue ne muzabi muimpe udiku, NW], numuvuadike; numuele kakanu ku munu ne bisabata ku makasa. Nuvue kabidi ne muana wa ngombe wa manyi, numushipe, tudie, tusanke. Bualu muananyi ewu uvua mufue, mmubike ku lufu; uvua mujimine, mmumueneke!” Ke kubangabo “kusanka.”

Mu lupolo elu, ‘muan’a bute uvua yeye ku budimi.’ Anjibi kuteta né udi mua kujingulula eu udiye ufuanyikija pa kuteleja ndekelu wa muanu. Yezu udi wamba bua muan’a bute ne: “Mu dipingana diende, ufika pepi ne nzubu, kumvuaye bisanji bidila, bantu baja maja. Kubikilaye muena mudimu umue, kumukonka ne: ‘mBualu kayi budi buenzeke aku?’ Awu kumuambila ne: ‘Muanenu mmupingane, tatuebe mmumushipele muana wa ngombe wa manyi, bualu udi mumumone ne bukole bua mubidi.’ Muan’a bute kufika munda, kubengaye kubuela mu nzubu. Tatuende kupatuka bua kumusengelela. Kadi kuandamunaye tatuende ne: ‘Ndi mukukuatshile mudimu bidimu mulongolongo, tshiyi ntupa ku diyi diebe nansha dimue. Katshia, kuena mumpe kana ku mbuji ka meme kusanka nako ne balunda banyi. Kadi muanebe ewu upingana, mubutule bintu biebe ne bakaji, wewe umushipela muana wa ngombe wa manyi!’”

Anu bu muan’a bute, nnganyi uvua mujane dilekelela bilema ne ditabalela bileja bena mpekatu? Ki mbaskribe ne Bafarizeyi anyi? Bu muvuabo bajana Yezu mudiye wakidila bena mpekatu, wakabapindulula pa kufila mufuanu eu, buobo ke badi muan’a bute ne bua kuikala uleja.

Yezu udi ukomesha muanu wende ne mêyi a musengelelu adi tatu wambila muan’a bute wende: “Muananyi, wewe udi nanyi matuku onso, bintu bionso bindi nabi mbiebe. Tuvua ne bua kudia, kusanka, bualu muanenu ewu uvua mufue, mmubike ku lufu; uvua mujimine, mmumueneke!”

Yezu kêna usokolola tshidi muan’a bute uvua kuenza pashishe. Tshidibi, ku shoo, kunyima kua lufu ne dibiishibua bia Yezu, “musumba munene wa bakuidi uvua mutuadije kutumikila ditabuja,” (NW) pamu’apa munkatshi muabo muvua bamue bena mu kasumbu ka “muan’a bute” badi Yezu wakula nabu muaba eu.

Kadi mu tshikondo tshietu etshi, bana babidi aba badi baleja banganyi? Badi anu ne bua kuikala bantu badi ne dimanya dikumbanyine dia malongolola a Yehowa bua kuikalabo ne tshishimikidi tshia kudia nende malanda masheme. Muan’a bute udi uleja bamue bena mu “kasumbu kakese,” peshi “tshisumbu tshia ban’a bute bavua ne mêna abo mafunda mu muulu.” (NW) Buobo aba bakaleja ngikadilu mufuane wa muan’a bute. Kabakasanka bua kuakidila musumba wa pa buloba, “mikoko mikuabu,” bualu bavua badiumvua bu se: musumba eu uvua ubiiba butumbi buabu.

Muana wa bitulatula, ku luende luseke, udi uleja bamue bantu badi bashiya tshisamba tshia Nzambi ne baya kulabula masanka adi bulongolodi ebu bupeteshangana. Kadi, bantu aba badi banyingalala pashishe ne bapingana pa kulua tshiakabidi basadidi ba Nzambi bamuenzedi ba mudimu. Bushuwa, mmushindu kayipu udi Tatu uleja dinanga ne luse kudi aba badi bitaba se: badi bakengela dibabuikidila mpekatu ne bapingana kudiye! Luka 15:11-32, MMM; Lewitiki 11:7, 8; Bienzedi 6:7; Luka 12:32; Ebelu 12:23; Yone 10:16.

▪ Mbanganyi badi Yezu ulondela mufuanu eu, peshi muanu, ne mbua tshinyi?

▪ Nnganyi udi muena bualu wa kumpala mu muanu eu, ne ntshinyi tshidi tshimufikila?

▪ Tatu ne muana muakunyi badi baleja bantu kayi ba mu matuku a Yezu?

▪ Mmunyi mudi Yezu widikija tshilejilu tshia tatu muena luse wa mu mufuanu wende?

▪ Mmuenenu wa muan’a bute pa diakidila dia muanabo udi tshinyi, ne nku tshinyi kudi Bafarizeyi baleja ngikadilu mufuane wa muan’a bute?

▪ Mmunyi mudi dilongesha dia mu mufuanu wa Yezu dipeta dikumbana diadi lelu’eu?