Nshapita wa 73

Muena Samariya wa muoyo muimpe

YEZU udi imue misangu pabuipi ne Betani, musoko udi mutantshi wa kilometre bu isatu ne Yeruzaleme. Muntu kampanda mumanyi mupiluke wa mikenji ya Mozese udi usemena kudiye, umukonka ne: “Mulongeshi, ngenze tshinyi bua meme kupeta muoyo wa kashidi?”

Bu mudiye mumanyi wa Mikenji, Yezu udi ujandula ne: muntu eu kêna umukonka anu bua kumanya, apo udi ujinga kumuteta. Mumanyi eu wa Mikenji udi pamu’apa ne kipatshila ka kufikisha Yezu ku difila diandamuna diatumbula bena Yuda. Nunku, Yezu udi usaka mumanyi wa Mikenji ku didiandamuina nkayende, umuebeja ne: “Tshidibo bafunde mu [Mikenji, NW] ntshinyi? Udi ubalamu tshinyi?”

Ne bujinguludi buinenke, mu diandamuna diende mumanyi wa Mikenji udi utela dîyi didi mu Dutelonome 6:5 ne mu Lewitiki 19:18, wamba ne: “‘Unange [Yehowa Nzambi webe, NW], ne muoyo webe mujima, ne lungenyi luebe luonso, ne bukole buebe buonso, ne meji ebe onso; unange kabidi muntu nebe muudi mudinange wewe muine.’”

“Udi muandamune bilenga,” ke mudi Yezu ukudimuna. “[Tungunuka ne kuenza nanku, neupete muoyo, NW].”

Kadi, mumanyi wa Mikenji ki mmusankishibue to. Buende yeye, diandamuna dia Yezu ki nditambe kusunguluka to. Mmusue kupeta dishindika kudi Yezu dia se: mmuenenu yende mmijalame, ne nanku mmuakane mu malu adiye wenzela bakuabu. Pa nanku, udi webeja ne: “Muntu nanyi nganyi?”

Bena Yuda badi ne ngelelu wa meji wa se: miaku “muntu nanyi” mmilamika anu bena Yuda nabu, anu mudi mêyi a mu Lewitiki 19:18 asua kumvuija. Nunku, nansha mupostolo Petelo pende wakamba pashishe ne: “Nudi bamanye ne: mbakandike bikole bua muena Yuda kumvuanganaye ne muntu wa tshisamba tshikuabo, nansha bua kubuela mu nzubu muende.” Nunku, mumanyi wa Mikenji, ne pamu’apa bayidi ba Yezu pabu, badi bela meji se: mbantu bakane padibu baleja anu bena Yuda nabu buimpe, bualu, bilondeshile wabo ngumvuilu, aba badi kabayi bena Yuda ki mbantu nabu menemene to.

Mmunyi mudi Yezu mua kululamija mmuenenu wabo, eku kayi utumbula bamuteleji? Udi ulonda muyuki kampanda, mushindamene pamu’apa pa muanda kansanga muenzeke. “Muntu kampanda [muena Yuda] uvua ufuma mu Yeruzaleme, upueka mu Yeriko, kumataye munkatshi mua bivi; abo kumunyenga bintu biende, kumututa, kumushiya mufue tshipuuka.”

“[Kadi, ku mpukapuka, NW],” ke mudi Yezu utungunuka, “muakuidi mukuabo uvua upuekela mu njila awu; umumona, kupitaye. Muena Le[w]i mukuabo kufika pende muaba awu, umumona, kupitaye. Kadi muena Samariya kampanda uvua mu luendu, kufikaye pavua muntu awu; umumona, luse kumukuata.”

Bakuidi bavule ne bena Lewi babambuluishi babu mu ntempelo mbasombele mu Yeriko, badi benda kilometre bu 23 pa kulonda njila wa njiwu wa bupulumuke bua metre 900 bua kufika ku Yeruzaleme kudibu basadila mu ntempelo. Muakuidi ne muena Lewi ke bavua bakumbanyine kuambuluisha muena Yuda nabu uvua mu dikenga. Kadi ki ntshidibu benze to. Bishilangane, muena Samariya ke udi wenza nunku. Bena Yuda badi bakina bena Samariya bikole, ke bua tshinyi, kukadi lupolo luîpi, bavua bapende Yezu ne mêyi a kapeja pa kumubikila mudiye “muena Samariya.”

Ntshinyi tshidi muena Samariya wenza bua kuambuluisha muena Yuda? “Kusemenaye,” ke mudi Yezu wamba, “kusuika mputa yende, kuelamu manyi ne mvinyo, kumuteka pa [nyama wende nkayende, NW] kumufila ku nzubu wa tshilala benyi, kumukubaye bimpe. Butshia, kupatulaye [ndenariyo, NW] ibidi (bu difutu dia matuku abidi a mudimu), kupa muena nzubu wa tshilala benyi awu, kumuambila ne: ‘Umukube bimpe, tshionso tshiwatula tshia pa mutu, meme nemfute pangapingana.’”

Padiye ujikija kulonda muyuki, Yezu udi ukonka mumanyi wa Mikenji ne: “Buebe wewe ku basatu aba, nganyi udi muleje muntu uvua mumate mu bianza bia bivi ne mmuntu nende?”

Pa kumvua bimutonda bua kuambika muena Samariya lumu, mumanyi wa Mikenji udi wandamuna patupu ne: “[Ng’eu uvua mudileje muena luse kudiye, NW].”

“Ndaku, wewe pebe wenze muomumue,” ke mudi Yezu ukomesha.

Bu Yezu muambile mumanyi wa Mikenji buludi ne: yonso udi kayi muena Yuda uvua pende muntu nende, ki ng’anu mumanyi wa Mikenji uvua mua kubenga kumuitaba, apo bavule ba ku bateleji bavua mua kutua ku tshiende mu diyukidilangana diende ne Yezu. Kadi, muyuki eu muakanangane ne mianda milelela ya mu nsombelu udi usokolola kakuyi pa kuela mpata ne: muntu netu udi ukongoloja too ne bantu badi kabayi bena dikoba dimue ne ditunga dimue netu. Nndongeshilu kayipu wa mpatshi eu kudi Yezu! Lukase 10:25-37; Malu Menza 10:28, MMM; Yone 4:9; 8:48.

▪ Nnkonko kayi idi mumanyi wa Mikenji wela Yezu, ne kipatshila ka nkonko yende kadi kamueneka kikale tshinyi?

▪ Nnganyi udi bena Yuda bangata bu muntu nabu, ne nkabingila kayi kadi kitabijija ne: bayidi ba Yezu bavua pabu ne mmuenenu wa muomumue?

▪ Mmunyi mudi Yezu usokolola mmuenenu mujalame mushindu udi mumanyi wa Mikenji kayi mua kumutontolola?