Nshapita wa 124

Mufidibue ne muya nende

DÎBA didi Pilato, mulengibue mutshima pa kumona budinemeki buinenke bua Yezu mu diakama disubishibua, uteta tshiakabidi bua kumulekela, bakuidi bamfumu badi bafika munda bikole. Mbapangadike bua tshintu nansha tshimue katshibapumbishi bua kukumbaja tshipatshila tshiabu tshibiatshibi. Nunku, badi batuadija kuelulula mbila ne: “Umupopele pa mutshi! Umupopele pa mutshi!”

“Muangatayi nuenu, numupopele pa mutshi,” ke mudi Pilato wandamuna. (Bishilangane ne mêyi abu a kumpala, bena Yuda badi mua kuikala ne bukokeshi bua kushipa muena tshibawu udi muenze tshilema tshinene mu mianda ya ditendelela.) Pashishe, bua musangu bu muitanu, Pilato udi ujadika se: Yezu kêna ne bualu, pa kuamba ne: “Tshiena mumusangane ne bualu nansha.”

Padi bena Yuda bamona ne: matumpi abu a tshididi apangi kupatula bipeta bia nsongo, badi banyemena ku ditumpi dia mianda ya ditendelela dia disendeka Nzambi divuabu batele kukadi mêba makese pavua Yezu ulumbuluishibua kumpala kua Sanhedrin. “Tudi ne mukenji,” ke mudibu bamba, “ne bilondeshile mukenji eu, udi ne bua kufua, bualu mmudienze Muana wa Nzambi.” (NW)

Edi nditumpi dipiadipia bua Pilato, ne didi dimufikisha ku ditamba kutshina. Mpindieu, udi ujingulula ne: Yezu ki mmuntu bu bantu buonso, anu mudi tshilota tshia mukajende ne bukole bukemeshi bua bumuntu bua Yezu bileja. Kadi, udi “Muana wa Nzambi” anyi? Pilato mmumanye ne: Yezu mmufumine mu Ngalileya. Nansha nanku, kavuaku mua kuikala ne muoyo diambedi anyi? Umubueja tshiakabidi mu dibalasa, Pilato udi umuebeja ne: “Udi mufume penyi?” (NW)

Yezu udi ushala mupue. Kukadi lupolo luîpi uvua muambile Pilato ne: udi mukalenge, kadi Bukalenge buende kabuena bua mu bulongolodi ebu. Kufila makuabu mumvuija mpindieu kakuvua mua kuambuluisha [bua kukumbaja] tshipatshila tshimpe nansha tshimue. Kadi, dibenga kuandamuna edi didi ditumbula Pilato mu kudisua kuende, ne udi ukabula Yezu ne miaku eyi ne: ‘Kuena musue kungambila bualu? Kuena mumanye ne: ndi ne bukokeshi bua kukulekela nansha bua kukupopela pa mutshi anyi?’

‘Kuvua mua kuikala ne bukokeshi bua kungenzela bualu, bu kabayi bakupeshebu kuulu,’ ke mudi Yezu wandamuna ne kanemu kuonso. Mmutume lungenyi ku bukokeshi budi Nzambi upetesha bamfumu ba pa buloba bua kulombola mianda ya pa buloba. Yezu udi usakidila ne: “Ke bua tshinyi muntu udi mumfile mu bianza biebe udi ne mpekatu mutambe bunene.” (NW) Bushuwa, muakuidi munene Kayifase ne bena diende pamue ne Yudase Iskaryote, buonso buabu badi ne bujitu bunene kutamba Pilato bua kukengeshibua kua Yezu kapayi bualu.

Mukemeshibue tshiakabidi kudi Yezu eku muikale utshina se: Yezu udi mua kuikala mufume kua Nzambi, Pilato udi wenza madikolela makuabu bua kumulekela. Kadi, bena Yuda badi babenga kuteleja Pilato. Badi bambulula matumpi abu a tshididi, basakidila ne budimu ne: “Wewe mulekela muntu eu, kuena mulunda wa Kezare to. Muntu yonso udi udienza mukalenge udi utombokela Kezare.” (NW)

Nansha mudibu bamusonguela ne malu makole, Pilato udi utuala Yezu pambelu tshiakabidi. “Tangilayi! Ke mukalenge wenu eu!” (NW) Ke mudiye wakula kabidi musuminyine.

“Umumbushe! Umumbushe! Umupopele pa mutshi!” (NW)

“Nempopele mukalenge wenu pa mutshi anyi?” (NW) Ke mudi Pilato webeja katshiyi ne ditekemena.

Bukokeshi bua bena Roma bukadi butonde bena Yuda. Bushuwa, badi bapepeja bukokeshi bua Roma! Pabi, bakuidi bamfumu badi bamba ne kudingidija ne: ‘Katuena ne mukalenge mukuabu to, amu Kezare.’

Pa kutshina bua muanzu wende wa tshididi ne lumu luende, ndekelu wa bionso Pilato udi upuekesha maboko kumpala kua dilomba dikole dia bena Yuda. Udi ufila Yezu. Basalayi badi bamuvula tshinkutu tshikunzubile ne bamuvuadika bilamba biende bia pa mutu. Padibu baya ne Yezu bua kumupopela pa mutshi, badi bamuenzeja bua kudiambuila mutshi wende wa tshinyongopelu.

Tudi mpindieu pankatshi pa mêba a dinda mu Ditanu dia 14 Nizan; imue misangu dîba dia mujalamu dikadi pa kukumbana. Yezu udi’anu muimane kuulu katshia mu Dinayi pa lunkelu, ne mmupetangane ne makenga masumpakaji malondangane. Mu mushindu mumvuike, katshiena ne makanda bua kutuala bujitu bua mutshi. Nunku badi batshintshimika muntu kampanda mupitakanyi, Simone wa ku Cyrene mu Afrike, bua kumuambuilawu. Padibo benda baya, bantu bavule, pamue ne bakaji, badi balonda, badituta pa tshiadi bua kanyinganyinga ne badila bua Yezu.

Ukudimuka kudi bakaji, Yezu udi wamba ne: “Bana bakaji ba mu Yeruzaleme, kanudidi bualu buanyi, nudile anu buenu nuenu ne bua bana benu! Bualu matuku neavue ikalabo bamba ne: Ba diakalenga mbankumba, bena mafu adi kaayi malele, ne mabele adi kaayi mamushe. . . . Bualu [pikalabo benza malu aa patshidi mutshi mubishi, ntshinyi tshienzeka padiwu uuma, NW]?”

Yezu mmutume lungenyi ku mutshi, udi uleja ditunga dia bena Yuda, utshidi ne tshitalela tshikese tshia muoyo bua dikalaku dia Yezu ne dia bashadile badi bamuitabuja. Kadi pumushibua bine aba mu ditunga edi, anu mutshi mufue mu nyuma ke washala, ee, bulongolodi bua ditunga bûme. Eyii, nebikale muanda kayipu wa diela muadi pabutudibua ditunga dia Yuda kudi biluilu bia bena Roma bitumika nabi kudi Nzambi bu mukumbaji wende wa dilumbuluisha! Yowanese 19:6-17; 18:31; Lukase 23:24-31; Matewuse 27:31, 32; Markuse 15:20, 21, MMM.

▪ Mmuanda kayi udi bamfumu ba bitendelelu basonguela nawu Yezu padi matumpi abu a tshididi apanga kupatula bipeta bia nsongo?

▪ Bua tshinyi Pilato udi utamba kutshina?

▪ Mbanganyi badi ne mpekatu mutambe bunene bua bionso bidi bienzekele Yezu?

▪ Ndekelu wa bionso, mmunyi mudi bakuidi batekesha Pilato bua kufila Yezu bua kushipibuaye?

▪ Ntshinyi tshidi Yezu wambila bakaji badi badila buende, ne udi usua kumvuija tshinyi padiye wakula bua mutshi “mubishi” udi pashishe “ûma”?