Nshapita wa 107

Mufuanu wa difesto dia dibaka

KU DIAMBULUISHA dia mifuanu ibidi, Yezu uvua mutandule baskribe ne bakuidi banene, ne badi bajinga kumushipa. Kadi, Yezu utshidi kule ne kujikija nabu. Udi utungunuka pa kubalondela mukuabu mufuanu, wamba ne:

“Bukalenge bua Diulu budi bufuanangane ne mfumu uvua mulongoluele muanende didia dinene dia dibaka. Kutumaye [bapika, NW] bende bua kuambila bantu bavuaye mubikile ku didia, kadi bobo nansha [kusua, NW] kufika.”

Yehowa Nzambi ke Mukalenge udi ulongolola difesto dia dibaka bua Muanende, Yezu Kristo. Ndekelu wa bionso, mukaji udi ukonga balondi bela manyi 144 000 neadisange kudi Yezu mu diulu. Bakokeshibue ba Mukalenge ntshisamba tshia Izalele, tshivua, pakabuejibuatshi mu tshiovo tshia Mikenji mu 1513 K.B.B., tshipeshibue muabi wa kulua ‘bukalenge bua bakuidi.’ Nunku, tshikondo atshi, bakatshielela kabobo ka diambedi ka dibikila bua difesto dia dibaka.

Kadi, lubila lua kumpala bua bavua babikidibue kaluakumvuika too ne mu muvu wa bimuma mu 29 B.B., pakatuadija Yezu ne bayidi bende (bapika ba mukalenge) mudimu wabu wa dimanyisha Bukalenge. Kadi, bena Izalele ku mubidi bakumvua lubila elu luela kudi bapika kubangila mu 29 B.B. too ne mu 33 B.B. kabakasua kulua nansha. Nunku, Nzambi wakapesha ditunga edi dia babikidibue muabi mukuabu, anu mudi Yezu ulonda ne:

“Kutumaye [bapika, NW] bakuabo ne diyi ne: ‘Ambilayi babikidibue ne: Nkadi mulongolole bia didia; ndi mushipe ngombe yanyi ne nyama ya manyi [ikadi mikosa muminu, NW], bionso mbimana kuakaja; luayi mu didia dia dibaka.’” Lubila elu luibidi ne lua ndekelu bua bavua babikidibue luakatuadija kuedibua dia Pentekoste wa 33 B.B., pakedibua balondi ba Yezu spiritu munsantu. Lubila elu luakatungunuka too ne mu 36 B.B.

Kadi, musangu eu kabidi bavule ba ku bena Izalele bakapepeja lubila elu. “Babikidibue kabavua bamona bu bualu,” ke mudi Yezu wamba, “kuyabo, ewu ku budimi buende, munga ku bungenda. Bakuabo kukuata [bapika, NW], kubakengesha, kubashipa.” Yezu udi utungunuka ne: “Mfumu kufika munda bikole, kutumaye basolayi bende, kushipabo bashipianganyi abo, kuoshabo ne musoko wabo.” Muanda eu wakenzeka mu 70 B.B., pakashimbudibua Yeruzaleme kudi bena Roma ne bashipianganyi abu kushipibuabu.

Pashishe, Yezu udi umvuija tshiakenzeka mu mutantshi eu: “[Pashishe, mukalenge udi wambila bapika, NW] bende ne: ‘Didia dia dibaka ndimana kulongolola, kadi bantu bamvua mubikile kabena badiakanyine to. Nanku ndayi mu masangu a njila [idi ipatuka pambelu pa tshimenga, NW], nubikile bonso banudi nusangana, balue ku didia.’” Bapika kuenzabu nunku, ne “tshibambalu tshia difesto dia dibaka tshiakuwula tente ne bavua badiadije ku mesa.” (NW)

Mudimu eu wa disangisha benyi basangana mu njila idi ipatuka pambelu pa tshimenga tshia babikidibue wakatuadija mu 36 B.B. Mfumu wa basalayi muena Roma Korneliyo ne dîku diende bavua ba kumpala ba ku bakena bena Yuda bakena batengula bakasangishibua. Disangisha dia bakena bena Yuda aba, buonso bapinganyi pa muaba wa aba bakabenga kuitaba ku lubila lua nzanzanza, diakatungunuka too ne mu siekele eu wa 20.

Mu siekele wa 20 ke mudi tshibambalu tshia difesto dia dibaka tshiuwula tente. Yezu udi ulonda tshidi tshienzeka kunyima: “Mfumu ubuela bua kutangila bavua ku mesa, kumonaye muntu kayi muvuale tshilamba tshia dibaka. Kumukonkaye ne: ‘Mulunda, muudi mubuele munemu kuyi muvuale tshilamba tshia dibaka mmunyi?’ Awu kushala mupuwe. Mfumu kuambila [bapika, NW] ne: ‘Musuikayi makasa ne bianza, numusumbule pambelu mu midima; aye kudidilamu muadi, usumakaja menu.’”

Muntu ukêna ne tshilamba tshia dibaka udi uleja bena nkristo ba dishima bena mu Bukua-buena-nkristo. Nzambi katu muanyishe bine aba nansha kakese bu badi ne tshimanyinu tshisunguluji tshiakanyine bu bena Izalele ba mu nyuma. Nzambi katu mubele nansha kakese manyi a spiritu munsantu bua kuluabu bapianyi ba Bukalenge. Nunku, mbedibue pambelu mu mîdima, muabutudibuabu.

Yezu udi ukomesha mufuanu wende pa kuamba ne: “Bualu babikila mbavule, kadi basungula mbakese.” Eyowa, kuvua babikidibue bavule mu ditunga dia Izalele bua kuluabu bena mu kasumbu ka mukaji wa Kristo, kadi anu bena Izalele wa ku mubidi bakese ke bakasungudibua. Bavule ba ku badiadiji ku mesa 144 000 badi bapeta difutu dia [kuya] mu diulu mbantu bakena bena Izalele ku tshileledi. Matewuse 22:1-14, MMM; Ekesode 19:1-6; Buakabuluibua 14:1-3, NW.

▪ Mbanganyi badi babikidibue diambedi ku difesto dia dibaka, ne bakabelela kabobo ka dibikila edi dîba kayi?

▪ Ndîba kayi diakumvuika diambedi lubila lua dibikila kudi babikidibue, ne bapika batumika nabu bua kuela lubila elu mbanganyi?

▪ Lubila luibidi lua dibikila luakedibua dîba kayi, ne kunyima kualu, mbanganyi bakabikidibua?

▪ Mbanganyi badi balejibue kudi muntu ukena ne tshilamba tshia dibaka?

▪ Mbanganyi badi babikidibue ba bungi, ne basungudibue bakese?