Nshapita 4

Muimite pende kayi musedibue

EU NNGONDO muisatu katshia Mariya wimita. Vuluka se: matuku a ntuadijilu wa dîmi diende uvua muye kukumbula Elizabete, kadi mpindieu, ukadi mupingane kuabo ku Nazarete. Kuimita kuende nekumanyike mu matuku makese mu tshimenga tshimulela. Bushuwa, udi mu nsombelu wa dibungama dikole!

Tshidi tshitamba kukoleshisha muanda eu ntshia se: Mariya mmubangila kudi Yozefe, muena mudimu wa mabaya. Ne Mariya mmumanye se: bilondeshile Mikenji ivua Nzambi mupeshe Izalele, bikala nsongakaji udi mubangila kudi mulume mumanyangane ne mulume mukuabu ku budisuile, udi ne bua kushipibua ne mabue. Mmunyi mumvuijaye Yozefe bualu bua kuimita kuende?

Bu muvua Mariya muenze ngondo isatu ku luendu, tudi mua kushindika se: Yozefe udi ne mutshima kulukulu bua kumumona. Padibo bapetangana, mbimueneke ne: Mariya udi umumanyisha lumu elu. Udi mua kuenza muende muonso bua kumumvuija ne: mmuimite ku bukole bua spiritu munsantu wa Nzambi. Kadi, anu muudi mua kutshinka, mbikole bua Yozefe kuitaba muanda bu nunku.

Yozefe mmumanye mudi Mariya muende lumu bu mukaji wa tshitembu. Ne bidi bimueneka se: mmumunange bikole. Pabi, nansha biamumvuijaye mushindu kayi, bushuwa mbimuenek’amu ne: mmuimitshisha kudi mulume kampanda. Nansha nanku, Yozefe ki mmusue bua bamushipe ne mabue peshi afuishibue bundu ku mêsu kua bantu nansha. Nunku, udi upangadija bua kumupidia mu musokoko. Mu matuku au, babangidianganyi bavua bangatshibua bu baselangane, nunku, bivua bikengela mukanda wa dishipa dia dibaka bua kukosa malanda a dibangidilangana.

Panyima, Yozefe udi uya kulala, wend’anu welangana meji pa bualu ebu. Ke muanjelu wa Yehowa kumumuenekela mu tshilota, ne kumuambila se: “Kutshinyi bua kuangata mukajebe Mariya kuebe, bualu tshidi tshiledibue munda muende ntshifume kudi spiritu munsantu. Yeye nealele muana wa balume, ne udi ne bua kumuidika dîna ne: Yezu, bualu neapandishe tshisamba tshiende ku mpekatu yabu.”

Padiye ujuuka ku tulu, ndianyisha kayipu didi nadi Yozefe! Kayi mua kujingakana, udi wenz’amu tshivua muanjelu mumuambile. Udi uvua ne Mariya kuende. Bushuwa, muanda eu muenza patoke udi ne mushinga wa muomumue ne difesto dia dibaka, bualu udi ujadika se: Yozefe ne Mariya mbaselangane mpindieu bilondeshile mikenji. Kadi, Yozefe kêna umanyangana ne Mariya mu lupolo luonso ludiye ne Yezu munda muende.

Tangila! Mariya ukadi mupungile ne dîmi, pabi Yozefe mmumubandishe pa mpunda. Mbaya penyi, ne bua tshinyi badi benza luendu Mariya pende ukadi pa kulela? Luka 1:39-41, 56; Matayo 1:18-25, NW; Dutelonome 22:23, 24.

▪ Yozefe udi wela meji kayi padiye umanya se: Mariya mmuimite, ne mbua tshinyi?

▪ Mmunyi mudi Yozefe mua kupidiangana ne Mariya pabo kabayi banji kuselangana?

▪ Mmuanda kayi wa patoke udi ne mushinga wa difesto dia dibaka udi ukumbajibua bua Yozefe ne Mariya?