Nshapita 3

Mulongolodi wa njila udi uledibua

ELIZABETE ukadi pa kulela muanende. Mu ngondo eyi isatu yafumi ku dipita, Mariya uvua nende pabuipi. Kadi mpindieu, tshikondo tshiakumbanyi bua Mariya kulaya ne kuenza luendu lule bua kupingana kuabu ku Nazarete. Panyima pa ngondo bu isambombo nealele pende.

Matuku makese panyima pa diumuka dia Mariya, Elizabete udi ulela. Ndisanka kayipu bu mudi kulela kuenzeke bimpe, kabidi Elizabete ne muana bikale ne makanda a mubidi! Padi Elizabete uleja muana mutekete kudi bena mutumba ne balela bende, buonso badi basanka nende pamue.

Bilondeshile Mikenji ya Nzambi, mu Izalele, muana wa balume udi ne bua kutengudibua dituku dia muanda-mukulu kunyima kua diledibua diende. Bua muanda eu, balunda ne balela badi bavua kutangila muana. Badi bamba bua muana kuidikibua dîna dia tatuende, Zekaya. Kadi Elizabete udi upindulula. “Tòo, nansha kakese!” ke mudiye wamba, “kadi neabikidibue ne: Yone.” Vuluka se: ndîna divua muanjelu Gabriele muambe bua kupeshabo muana.

Kadi, balunda babu badi batontolola ne: “Kakuena muntu nansha umue munkatshi mua balela bebe udi ubikidibua ku dîna edi.” Pashishe, pa kuleja ne bianza badi bakonka tatuende dîna didiye musue kupesha muana. Ulombesha kabaya ka kufundila, bualu budi bukemesha bantu buonso, Zekaya udi ufunda ne: “Yone, ke dîna diende.”

Ku muanda eu, Zekaya udi upetulula muakulu mu tshishima. Udiku mua kuvuluka se: wakajimija muakulu wende pakabengaye kuitaba dimanyisha dia muanjelu dia se: Elizabete nealele muana. Nunku, padi Zekaya upetulula muakulu, bena mutumba buonso badi bakatshila ne bebejangana ne: “Muana eu mutekete neikale muntu wa mushindu kayi menemene?”

Mpindieu, Zekaya mmuwujibue tente ne spiritu munsantu, ne disanka dikole, udi wamba ne: “Yehowa, Nzambi wa Izalele abeneshibue, bualu walukiji ntema ne kuvuija disungidibua bua tshisamba tshiende. Ne watupatuidi lusengu lua lupandu bualu buetu mu nzubu wa Davidi musadidi wende.” Bushuwa, “lusengu elu lua lupandu” mMukalenge Yezu, ukadi pa kuledibua. Ku butuangaji buende, ke mudi Zekaya wamba, Nzambi “neatupeshe, tuetu bamane kusungidibua mu bianza bia bena lukuna betu, disanka dia kumusadila ne mudimu munsantu kakuyi ditshina, ne bulamatshi ku mikenji ne buakane kumpala kuende matuku etu wonso.”

Pashishe, Zekaya udi udianjila kumanyisha malu adi atangila muanende, Yone: “Kadi wewe, muana mutekete, nebakubikile muprofete wa Mutambe-Kutumbuka, bualu neudianjile kuenda kumpala kua Yehowa bua kulongolola njila yende, bua kupesha tshisamba tshiende dimanya dia lupandu ku dibuikidila dia mpekatu yabo, bua luse luengeleki lua Nzambi wetu. Ne luse elu, kabundubundu kafume muulu nekatukumbule, bua kufila butoke kudi badi basombe mu mîdima ne mu dileji dia lufu, bua kuludika makasa etu ne kulubuluka mu njila wa ditalala.”

Mu tshine tshikondo etshi, Mariya udi kayi muanji kusedibua, anu mudibi bimueneka, ukadi mufike kuabu ku Nazarete. Ntshinyi tshiamuenzekela patuadija dîmi diende kumueneka? Luka 1:56-80, NW; Lewitiki 12:2, 3.

▪ Yone mmukulu wa Yezu ne ngondo bungi munyi?

▪ Ntshinyi tshidi tshienzeka padi Yone ukumbaja matuku muanda-mukulu?

▪ Mmunyi mudi Nzambi mualukije ntema yende kudi tshisamba tshiende?

▪ Mmudimu kayi mudianjila kumanyisha wakumbaja Yone?