Nshapita wa 10

Ngendu ku Yeruzaleme

TUDI mu muvu wa disampila. Ke tshikondo tshidi dîku dia Yozefe, balela ne balunda ne bua kuenza luendu luabu lua ku tshidimu ku tshidimu mu muvu wa disampila batangile ku Yeruzaleme bua kuenza difesto dia Pasaka. Anu musombele mukitshi wa luendu wenzeka, musumbasumba wa bantu udi uditua mu njila bua kuenza luendu lua kilometre mitue ku 100. Yezu udi mpindieu ne bidimu 12, ne mmutume lungenyi ku difesto ne ntema ya pa buayi.

Bua Yezu ne dîku diabu, Pasaka ki mmuanda wa dituku anu dimue to. Badi bashala mu Yeruzaleme bua Difesto dia Mampa akena luevene dia matuku muanda-mutekete didi dienzeka pashishe, dine didibu basuikakaja ku tshikondo tshia Pasaka. Pa nanku, luendu luabu, kubangila ku diumuka too ne ku dipingana ku Nazarete, kusangisha dishala ku Yeruzaleme, ludi lunenga mbingu bu ibidi. Kadi tshidimu etshi, nelunenge kupita, bua muanda kampanda wenzekela Yezu.

Lutatu ludi lumueneka mu dialukila ku Yeruzaleme. Yozefe ne Mariya badi bela meji ne: Yezu udi mu musumba wa balela ne balunda badibu nabu mu luendu. Kadi, padibu batuula panshi bu mukadi butuku buila, Yezu kêna umueneka, nunku baledi bende badi batuadija kumukeba munkatshi mua bena luendu nabu. Kabena bamumona muaba nansha umue. Yozefe ne Mariya badi balukila too ne ku Yeruzaleme, bua kumukeba.

Munkatshi mua dituku dijima badi bamukeba, kadi kayi umueneka. Bia muomumue dituku dibidi. Ndekelu wa bionso, dituku disatu badi baya mu ntempelo. Muinemu, ke mudibo bamona Yezu mu tshimue tshia ku bibambalu, musombe munkatshi mua balongeshi bena Yuda, ubateleja ne ubela nkonko.

“Muana wetu, bua tshinyi watuenzedi nunku?” ke mudi Mariya webeja. “Mona mutudi tuenda tukukeba, tatuebe ne meme, ne dilubakana dikole mu lungenyi.”

Yezu udi ukema bua muvuabu kabayi bamanye muaba wa kumusangana. Kubebejaye ne: “Bua tshinyi nuvua ne bua kunkeba? Kanuvua bamanye se: ndi ne bua kuikala mu nzubu wa Tatuanyi anyi?”

Yezu kêna ujingulula bua tshinyi baledi bende kabavua mua kumanya muanda bu nunku. Pa nanku, Yezu udi upingana ku nzubu ne baledi bende ne utungunuka ne kubakokela. Udi wenda udiunda mu meji ne mu dikola dia ku mubidi ne mu dianyishibua kudi Nzambi ne kudi bantu. Eyowa, kubangila ku buana buende, Yezu udi ufila tshilejilu tshimpe, kabiyi anu pa kudifila mu malu a mu nyuma, kadi, pa kuleja kabidi kanemu kudi baledi bende. Luka 2:40-52, NW; 22:7.

▪ Mu muvu wa disampila, Yezu udi pa tshibidilu wenza luendu kayi pamue ne dîku diabu, ne ludi lunenga matuku bungi munyi?

▪ Ntshinyi tshidi tshienzeka mu luendu ludibu benza pakadi Yezu ne bidimu 12?

▪ Ntshilejilu kayi tshidi Yezu ufila bua bansonga lelu’eu?