Nshapita wa 110

Nkomenu wa mudimu ku ntempelo

YEZU udi umueneka musangu wende wa ndekelu ku ntempelo. Bushuwa, pa kumusha kulumbuluishibua ne kushipibua kuende, mianda yenzeka kunyima kua matuku asatu, udi ukomesha mudimu wende wa patoke pa buloba. Bua mpindieu, utshidi utungunuka ne dikanyina diende dia baskribe ne Bafarizeyi.

Mikuabu misangu isatu, Yezu udi utua tshikemu ne: ‘Nuenu [baskribe, NW] ne Bafarizeyi badingidiji ba malu, diakabi dienu!’ Diambedi, udi ubabikidila diakabi bualu badi bakezula ‘panyima pa dikopo ne dilonga, kadi munda muabi muule tente ne [dipawula ne dibekesha, NW].’ Nunku, udi ubabela bua ‘banji kukezula munda mua dikopo ne mua dilonga, bua panyima paabi palue pakezuke kabidi.’

Pashishe, udi ubikila diakabi pa baskribe ne Bafarizeyi bua bumuntu buabu bubole ne dinyanguka bidibu bateta kusokoka pa kuleja ditshina Nzambi dia ku mêsu. “Nudi bafuanangane ne nkita milaba lupemba”; ke mudiye wamba, “pambelu imueneka mimpe, kadi munda muule tente ne mifuba ya bafue ne bintu bibole bia mishindu yonso.”

Bua kujikija, budingidiji buabu budi bumuenekela ku mitalu yabu bua kuibakila baprofete nkita ne kuyilengeja anu bua kukoka ntema pa bienzedi biabu nkayabu bia luse. Pabi, anu mudi Yezu ubisokolola, badi “bana ba bantu bavua bashipe [baprofete, NW].” Bushuwa, eu yonso udi uleja dikima bua kutandula budingidiji buabu udi udibueja mu njiwu!

Utungunuka, Yezu udi wamba mpindieu mêyi ende mapite bukole masokolodi a tshibawu ne: “Nyoka, ndelu ya ntoka, mmunyi munuanyema dilumbuluisha dia Ngena?” (NW) Ngena ndupongo muvua muimanshibua bukoya buonso bua tshimenga tshia Yeruzaleme. Nunku, Yezu udi wamba ne: bu mudibu bananuke ne nsombelu wabu mubole, baskribe ne Bafarizeyi nebapetangane ne kabutu ka kashidi.

Wakula bua aba badiye utuma bu baleji-mpala bende, Yezu udi wamba ne: “Nenushipe bamue, nubele ku mitshi ya tshibawu, nenutute bakuabo mikaba mu [nsunagoga, NW] yenu, nenubalondakaje ku tshimenga ne ku tshimenga. Nenku mashi onso a bantu bakane adi mapueke pa buloba anupumukile, biangatshile ku mashi a Abele, muntu muakane too ne ku mashi a Zekariya, muana wa Barakiya [udi ubikidibua Yehoyada mu mukanda muibidi wa Kulondolola], unuvua bashipe pankatshi pa [sanktuere, NW] ne tshilambuilu. Bulelela ndi nnuambila ne: Bine bionso abio nebikale pambidi pa bena lelu aba.”

Bualu Zekariya wakatandisha balombodi ba Izalele, “bakamuelela tshifufu ne kumushipa ne mabue mu lubanza lua nzubu wa Yehowa ku dîyi-dituma dia mukalenge.” Kadi, anu mudi Yezu udianjila kumanyisha, Izalele neafute tshibawu bua mashi wonso a bantu bakane mapumuna mushindu’eu. Neatshifute bidimu 37 pashishe, mu 70 B.B., pabutudibua Yeruzaleme kudi biluilu bia bena Roma ne pabutuka bena Yuda bapite pa muliyo.

Padiye utuma lungenyi ku nsombelu eu mukuate buôwa, Yezu udi ubungama bikole. “Yeruzaleme, Yeruzaleme,” ke mudiye umanyisha tshiakabidi, “misangu bungi munyi imvua musue kusangisha bana bebe bu mudi nzolo usangisha bana bende mu mapuapua, kadi nuenu nansha kuanyisha! [Mona! Banulekeledi nzubu wenu, NW].”

Yezu udi usakidila pashishe ne: “Kanuakummona kabidi nansha kakese too ne panuamba ne: ‘Mubeneshibue ng’eu udi ulua mu dîna dia Yehowa!’” (NW) Dituku adi nedivue tshikondo tshia dikalaku dia Kristo padiye uvua mu Bukalenge buende bua mu diulu ne bantu bamumona ne mêsu a ditabuja.

Mpindieu, Yezu udi uya muaba udiye mua kutangila bieledi bia lupetu mu ntempelo ne misumba idi yelamu mfranga. Babanji badi belamu meya a bungi. Kadi mukamba mupele udi ufikilapu ne welamu meya abidi a mushinga mukese.

Ubikila bayidi bende, Yezu udi wamba ne: “Bulelela ndi nnuambila ne: Mukaji mukamba muena dikenga ewu mmuele bipite bia bonso badi bela mu tshibutshilu.” Badi ne bua kudiebeja mushindu udibi mua kuikala nanku. Nunku, Yezu udi umvuija ne: “Bonso mbele biabo bivua bibapite bungi, kadi yeye mmuele biende bionso bia dikenga, bionso bivuaye nabio bua kudidisha.” Yeye mumane kuamba malu aa, Yezu udi umuka ku ntempelo bua musangu wa ndekelu.

Bakatshila bua bunene ne bulengele bua ntempelo, umue wa ku bayidi bende udi utua tshikemu ne: “Mulongeshi, tangila! Mmabue a mushindu kayipu ne mbiibakilu bia mushindu kayipu!” (NW) Bushuwa, anu mudibi biambibua, mabue aa [miibaka] adi ne bule bua metre mapite pa 11, ne butshiama bua metre mapite pa 5 ne butumbuke bua metre mapite pa 3!

“Nudi bamone biibakilu binene ebi anyi?” ke mudi Yezu wandamuna. “Kakuakushala dibue pa mutu pa dibue dikena dibumbula.” (NW)

Mumane kuamba malu aa, Yezu ne bapostolo bende badi basambuka Lupongo lua Kidrone ne babanda ku Mukuna wa Olive. Kumukila pin’apa, badi mua kuela mêsu muinshi ne kubandila bulengele bua ntempelo. Matewuse 23:25–24:3; Markuse 12:41–13:3; Lukase 21:1-6; MMM; 2 Kulondolola 24:20-22, NW.

▪ Ntshinyi tshidi Yezu wenza mu dikumbula diende dia ndekelu ku ntempelo?

▪ Mmunyi mudi budingidiji bua baskribe ne Bafarizeyi bumueneka patoke?

▪ “Dilumbuluisha dia Ngena” didi diumvuija tshinyi?

▪ Bua tshinyi Yezu udi wamba ne: mukaji mukamba mmufile bivule kupita babanji?