Nshapita wa 9

Nsombelu wa dîku ku buana bua Yezu

TSHIKONDO tshidi Yezu ukola mu Nazarete, bidi’anu tshimenga tshikese katshiyi ne mushinga. Tshidi tshisanganyibua mu tukunakuna tua Ngalileya, pabuipi ne tshibanda tshilengele tshia Jizreele.

Mu diumuka diabo ku Ejipitu padi Yozefe ne Mariya bavua muinemu ne Yezu, udi pamu’apa ne bidimu bibidi, mbimueneke se: utshidi’anu muana umue wa Mariya. Kadi ki mbua musangu mule to. Panyima, Yakobo, Yozefe, Simone ne Yudase badi baledibua, ne Yozefe ne Mariya badi bavua baledi ba bana ba bakaji kabidi. Mbimueneke se: Yezu udi ne bakunyi ba balume ne ba bakaji, bu bungi butambe bukese, mbasambombo.

Yezu udi ne balela bakuabu kabidi. Tukadi bamanye Yone, muana wa mamuende mukuabu, mukulu kudiye, udi musombele mutantshi wa kilometre mivule mu Yudeya. Pabuipi nabu mu Ngalileya, mudi Salomé udi, anu mudibi bimueneka, muanabu ne Mariya wa bakaji. Salomé mmusedibue kudi Zebedeya, nunku bana babo ba balume babidi: Yakobo ne Yone nebikale bana ba mamuende mukuabu. Mu kukola kuende, katuena bamanye bikala Yezu mushale pamue ne bansongalume aba, kadi pashishe badi balua benzejanganyi nende ba mudimu ba pa muoyo.

Yozefe udi ne bua kuenza mudimu mukole bua kukumbaja majinga a dîku diende didi dienda didiunda. Mmuena mudimu wa mabaya. Udi ukolesha Yezu bu muanende mulela; nunku Yezu udi ubikidibua ne: “muana wa muena mudimu wa mabaya.” Yozefe udi ulongesha Yezu mua kuikalaye pende muena mudimu wa mabaya, ne udi uwushindika bimpe. Ke bua tshinyi pashishe bantu badi bamba bua Yezu ne: “Yeye eu mmuena mudimu wa mabaya.”

Nsombelu wa dîku dia Yozefe mmuibakila pa ntendelelu wa Yehowa Nzambi. Pa kulonda Mikenji ya Nzambi, Yozefe ne Mariya badi bapesha bana babu dilongesha dia malu a mu nyuma ‘padibu basombe mu nzubu muabu, padibu benda mu njila, padibo balala panshi ne padibo bajuka.’ Mu Nazarete mudi nsunagoga, ne tudi mua kuikala bashindike se: pa tshibidilu Yozefe udi uyamu ne bena dîku diende bua kutendelela. Kadi, kabiyi mpata, badi balabula disanka dipite bunene musangu wonso udibu benza ngendu bua kuya ku ntempelo wa Yehowa ku Yeruzaleme. Matayo 13:55, 56; 27:56; Mâko 15:40; 6:3; Dutelonome 6:6-9, NW.

▪ Yezu udi ne bakunyi ba balume ne ba bakaji bungi munyi, bu bungi butambe bukese, ne udiku mumanye mêna a bamue ba kudibo anyi?

▪ Bana basatu ba bamamuende mukuabo wa Yezu mbanganyi?

▪ Yezu wakalonga mudimu kayi wa ku mubidi, ne mbua tshinyi?

▪ Ndilongesha kayi dipeteshi dia muoyo didi Yozefe upesha dîku diende?