Nshapita wa 32

Ntshinyi tshidi tshianyishibue mu Mikenji dia Nsabatu?

DIKUABU dia Nsabatu, Yezu udi ukumbula nsunagoga kampanda udi pabuipi ne Mbuu wa Ngalileya. Kudi muntu kampanda ne tshianza tshia balume tshiume. Baskribe ne Bafarizeyi badi babembela bikole bua kumona bikala Yezu mua kumuondopa. Ndekelu wa bionso badi bamuebeja: “Mbianyishibue mu Mikenji bua kuondopa dia Nsabatu anyi?” (NW)

Bamfumu ba malu a Nzambi bena Yuda badi bitaba ne: kuondopa nkuanyishibue mu Mikenji dia Nsabatu anu padi muoyo mu njiwu ya lufu. Tshilejilu, badi balongesha ne: dia Nsabatu, mbibengangane ne mikenji bua kuakaja mufuba mutshibuke anyi kusuika muaba mutengunuke. Nanku, pa kukonka Yezu, Baskribe ne Bafarizeyi badi ne kipatshila ka kupeta bualu bua kumubanda nabu.

Kadi, Yezu mmumanye ngenyi yabu. Pinapo, udi ujingulula mudibo ne mmuenenu munekesha, mubengangane ne Mifundu pa tshidi bushuwa dishipa dia mukenji udi ukandika mudimu dituku dia Nsabatu. Nunku, Yezu udi wenza bualu kampanda budi bubafikisha ku dituilangana mpala ne mpala pa kutumina muena tshianza tshiume dîyi ne: “Bika, imana munkatshi muabo.”

Mpindieu, ukudimuka kudi baskribe ne Bafarizeyi, Yezu udi wamba ne: “Nganyi wa ku nuenu, muikale ne mukoko wende anu umue, wowo mupone mu [tshiina, NW] dituku dia nsabato, wabenga kuya kuwukuata, e kuwupatulamu?” (Mukenji Mulenga) Bu mudi mukoko umvuija mfranga milamina, kabakuwulekela mu tshiina too ne makelela nansha, bualu njiwu idi mua kuwufikila ne kuwujimijabo. Kabidi, Mifundu idi yamba ne: “Muakane udi utabalela anyima wa tshimuna tshiende.” (NW)

Bua kuleja diumvuangana didiku, Yezu udi utungunuka ne: “Pabi, mmunyipu mudi muntu ne mushinga kutamba mukoko! Nunku, mbianyishibue mu Mikenji bua kuenza bualu bulenga dia Nsabatu.” (NW) Bu mudi bamfumu ba malu a Nzambi kabayi mua kuimansha lungenyi lua meji bu elu, ludi luleja luse, badi bashala bapuwe.

Ne tshiji ne dibungama munda bua tshitshiu tshiabu tshia matshimbu, Yezu udi ubatangila talalaa. Pashishe, udi wambila muntu ne: “Olola tshianza.” Udi utshiolola ne tshianza tshidi tshiondopibua.

Pamutu pa kusanka mudi tshianza tshia muntu tshiakajibue, Bafarizeyi badi bapatuka ne diakamue bela tshifufu ne tshisumbu tshia balondi ba Herodese bua kushipa Yezu. Anu mudibi bimueneka, tshisumbu etshi tshia tshididi tshidi tshikongoloja Basaduseyi bena malu a Nzambi. Pa tshibidilu, tshisumbu etshi tshia tshididi ne Bafarizeyi batu baluishangana munkatshi muabu bikole, kadi bua kuluisha Yezu mbadisuike tshintu tshimue. Matayo 12:9-14; Mâko 3:1-6; Luka 6:6-11; Nsumuinu 12:10; Ekesode 20:8-10.

▪ Ntshinyi tshidi tshifikisha ku dituilangana mpala ne mpala dia Yezu ne bamfumu ba malu a Nzambi bena Yuda?

▪ Nngenyi kayi idi nayi bamfumu ba malu a Nzambi bena Yuda pa diondopangana dia Nsabatu?

▪ Mmufuanu kayi udi Yezu ufila bua kuimansha mmuenenu yabu mibi?