Nshapita wa 56

Ntshinyi tshidi tshibipisha muntu?

KULUISHIBUA kua Yezu kudi kuenda kukola. Ki ng’anu bavule ba ku bayidi bende badi bumuke kudiye, kadi bena Yuda badi mu Yudeya badi bakeba kumushipa, anu muakenzabo pavuaye mu Yeruzaleme dîba dia Pasaka wa mu 31 B.B.

Mpindieu, ndîba dia Pasaka wa mu 32 B.B. Bidi bimueneka se: mu diumvuangana ne dîyi dia Nzambi dia kuenza difesto edi, Yezu udi uya mu Yeruzaleme bua kudia Pasaka. Kadi, udi wenda mudimuke bualu muoyo wende udi mu njiwu. Pashishe, udi upingana mu Ngalileya.

Yezu udi pamu’apa mu Kapernaume padi Bafarizeyi ne baskribe ba ku Yeruzaleme balua kudiye. Badi bakeba tubingila kampanda bua kumubanda bu mushipi wa mikenji ya ntendelelu. “Bua tshinyi bayidi bebe badi buupula bilele bia kabukulu?” ke mudibo bebeja. “Tshilejilu, kabena buowa mâyi ku bianza kumpala kua kudia biakudia.” Ki mmuanda mulomba kudi Nzambi, kadi Bafarizeyi badi bangata bu tshilema tshinene kubenga kuenza tshilele etshi tshia kabukulu, tshivua tshilomba kuowa mâyi too ne ku lukengîbua.

Pamutu pa kubandamuna ku matumpi abu, Yezu udi ufunkuna muoyo mubi wabu ne kushipa kuabu kua Mikenji ya Nzambi ku budisuile. “Nuenu kabidi nudi nubengela kutumikila muken[j]i wa Nzambi bualu bua bilele bienu tshinyi?” ke mudiye ujinga kumanya. “Nzambi wakamba ne, Unemeke tatu’ebe ne mamu’ebe; yeye wakamba kabidi ne, Udi wamba mei mabi bua tatu’[e]nd[e] anyi mamu’[e]nd[e] afue bi[e]nd[e] bulelela. Kadi nuenu nudi nuamba ne, Muntu yonso udi wambila tatu’[e]nd[e] anyi mamu’[e]nd[e] ne, Tshintu tshiwakadi kuangata tshidi tshipa Nzambi, kena unemeka tatu’[e]nd[e].”

Bushuwa, Bafarizeyi badi balongesha ne: mfranga, tshitupa tshia buloba, anyi tshintu kayi tshionso tshienzela mutshipu bu mulambo wa kufila kudi Nzambi tshidi bua ntempelo ne kabena mua kutumika natshi bua kipatshila kakuabu. Pabi, bushuwa, tshintu etshi tshienzela mutshipu tshidi tshilamibua kudi eu uvua muenze mutshipu bua bualu buatshi. Ku ngenzelu eu, muana kampanda, anu pa kuamba mudi mfranga yende peshi bubanji buende buikale “korban”​—dipa dienzela mutshipu bua kupesha Nzambi anyi kufila ku ntempelo—​udi wepela bujitu buende bua kuambuluisha baledi bende bakulakaje, badi mua kuikala bashikile bikole.

Ne tshiji tshikumbanyine bua dikodiakaja dia Mikenji ya Nzambi kudi Bafarizeyi, Yezu udi wamba ne: “Nuenu nuakuona dî dia Nzambi bualu bua bilele bienu. Nuenu bena lubombo, bulelela, Yeshaya wakamba bualu buenu ne, Bantu aba badi bannemeka ne mishiku yabo, kadi mitshima yabo kayena kundi, idi kule. Badi bantendelela tshianana, [bualu, NW] badi bayisha bantu diyisha dia miken[j]i ya bantu.”

Pamu’apa musumba uvua musemene tshianyima bua Bafarizeyi bamone mua kukonka Yezu. Mpindieu, bu mudi Bafarizeyi bapanga kuandamuna ku ditandula edi dikole dia bilema biabu, Yezu udi ubikila musumba pabuipi nende. “Ntelejayi,” ke mudiye wamba, “ne nujingulule. Kakuena tshintu tshifume pambelu tshidi tshibuela munda mua muntu tshidi mua kumubipisha; kadi bintu bidi bifumina munda mua muntu ke biobi bidi bibipisha muntu.” (NW)

Ku shoo, padibo babuela mu nzubu kampanda, bayidi bende badi bebeja ne: “Kuena mumanye biebe ne, Bafa[rizeyi] bakulenduka, [p]akumvuabo dî edi anyi?”

“Nebajule mutshi wonso udi kaw[uy]i mutentula kudi Tatu wanyi udi mu diulu,” ke mudi Yezu wandamuna. “Nubalekele, badi balombodi bafofo. Bialombola mufofo munga mufofo, bubidi buabo neba[p]one mu dina.”

Yezu udi umueneka ukemeshibua padi, bua bayidi buonso, Petelo umuebeja bua kufila butoke pa tshidi tshibipisha muntu. “Nuenu kanuena banjigulule tô ne katataka anyi?” Ke mudi Yezu wandamuna. “Kanuena bamanye ne, Tshidi tshibuela mukana [tshidi tshipita mu mala ne tshimanshibua mu nkumba, NW] anyi? Kadi bintu bidi bi[p]atuka mukana biakufuma mu mutshima, mbiobi bidi bibi[p]isha muntu. [Tshilejilu, NW] me[j]i mabi ne kushipa kua bantu ne masandi ne tshiendenda ne buibi ne mashimi ne kupenda Nzambi bidi bilu[p]uka mu mutshima. [Bine ebi ke bintu bidi bibipisha, NW] muntu; kadi kudia bidia ne bianza bidi kabî biowa kakuena kubi[p]isha muntu.”

Apa Yezu kêna ukandika bienzedi bikumbanyine bia mankenda to. Kêna usua kuamba ne: kabiena ne dikuatshisha bua muntu kuowa mâyi ku bianza kumpala kua kulamba anyi kudia biakudia to. Apo, Yezu udi upiisha ngikadilu wa mpala ibidi wa bamfumu ba bitendelelu badi bakeba mua kuepuka dinemeka mikenji miakane ya Nzambi pa kushindamena pa bilele bidi kabiyi ne Mifundu bu mpokolo. Eyowa, bienzedi bibi ke bidi bibipisha muntu, ne Yezu udi uleja ne: bine ebi bidi bifumina mu mutshima wa muntu. Yone 7:1; Dutelonome 16:16; Matayo 15:1-20; Mâko 7:1-23; Ekesode 20:12; 21:17; Yeshaya 29:13.

▪ Mbuluishi kayi budi Yezu wakama mpindieu?

▪ Bafarizeyi badi babanda Yezu ne bualu kayi, kadi bua Yezu, mmunyi mudi Bafarizeyi bashipa Mikenji ya Nzambi ku bukole?

▪ Mbintu kayi bidi Yezu usokolola bu bibipishi bia muntu?