Nshapita wa 105

Ntuadijilu wa dituku dia kudianya mukaba

PADI Yezu umbuka mu Yeruzaleme mu Dimue ku dilolo, udi upingana ku Betaniya, údí pa mupulumuku wa Mukuna wa Olive lua ku Est. Wakumbaji matuku abidi a mudimu wende wa ndekelu mu Yeruzaleme. Kabiyi mpata, Yezu udi upitshisha tshiakabidi butuku ebu kua mulunda wende Lazare. Katshia ufika pa kufumina ku Yeriko mu Ditanu, ebu mbutuku buinayi budiye upitshisha mu Betaniya.

Mpindieu, ne dindadinda mu Dibidi dia 11 Nizan, yeye ne bayidi bende bakadi batue tshiakabidi makasa mu njila. Bidi bimueneka se: nedikale dituku dia kudianya mukaba mu mudimu wa Yezu, diuwule tente menemene ne bia kuenza. Ndituku dia ndekelu didiye umueneka mu ntempelo. Kabidi ndituku dia ndekelu dia mudimu wende wa patoke kumpala kua kulumbuluishibua ne kushipibua kuende.

Yezu ne bayidi bende badi balonda njila umue umue udi upitshila pa Mukuna wa Olive batangile mu Yeruzaleme. Ku muelelu wa njila udi ufumina mu Betaniya, Petelo udi utuisha mêsu ku mutshi uvua Yezu muele mulawu mayipi mu dinda. “Rabbi, tangila!” ke mudiye utua tshikemu, “mfigi uuvua muele mulawu mmufube.” (NW)

Kadi, bua tshinyi Yezu mmufikishe mutshi eu ku difua? Udi ufila kabingila pa kuamba ne: “Bulelela ndi nnuambila ne: Nuenu bikale ne ditaba, kanuyi nuela mpata, nenuenze tshindi muenzele mutshi wa [mfigi, NW] ewu. Kabidi nuenu bambe mukuna wawa [Mukuna wa Olive udibo biimane] ne: ‘Juka, udiele mu [mbuu, NW],’ bidi bienzeka. Bionso binualomba mu disambila, buule ne ditaba, nenubipete.”

Nunku, pa kufikisha mutshi ku difuba, Yezu mmupeshe bayidi bende dilongesha dijalame pa dikengedibua diabu dia kuikala ne ditabuja kudi Nzambi. Anu mudiye umvuija ne: “Tshionso tshinudi nulomba mu disambila, nuitabe ne: nukadi batshipete, nanku nebanupetshio.” Ndilongesha kayipu dia mushinga didibo ne bua kumanya, nangananga pa kulama mu lungenyi mateta makole akadi pa kubafikila mu katupa kîpi emu! Kadi, kudi diumvuangana dikuabu pankatshi pa difuba dia mutshi wa mfigi ne ngikadilu wa ditabuja.

Ditunga dia Izalele, anu bu mfigi, didi ne mmuenekelu wa budingidiji. Nansha mudidio mu malanda a tshiovo ne Nzambi, kabidi dimueneka ku mêsu bu didi ditumikila mêyi-maludiki ende, ndidileje kadiyi ne ditabuja, dipange kukuama bimuma bilenga. Bua kupanga kuadi kua ditabuja, didi mene mu njila wadifikisha ku dibenga nansha Muana wa Nzambi muine! Nunku, padiye ufikisha mfigi eu ukêna ukuama ku difuba, Yezu udi usokolola ku tshilejilu etshi tshia dikema nshikidilu wadituta pa ditunga edi dikêna dikuama bimuma, ditunga dibule ditabuja.

Katupa kîpi pashishe, Yezu ne bayidi bende badi babuela mu Yeruzaleme, ne bu pa tshibidilu, badi baya ku ntempelo, kudi Yezu utuadija kulongesha. Bakuidi bamfumu ne bakulu ba ditunga, kabiyi mpata pa kuvuluka tshivua Yezu muenzele bashintuishi ba mfranga mayipi, badi bamukabula ne: “Udi wenza malu aa ne [bukokeshi, NW] kayi? Udi mukupeshebu nnganyi?”

Yezu udi upindulula pa kuamba ne: “Meme kabidi nenukonke bualu bumue; binuangambila bualu ebu, nenuambile bualu bua bukokeshi bundi ngenza n’abu malu â. Dibatiza dia Yone diakafuma kudi kunyi? Mu diulu, anyi kudi bantu?”

Bakuidi ne bakulu badi batuadija kuebejangana bua kumanya tshia kuandamuna. “Bituamba ne, Mu diulu, yeye neatuebeje ne, Bualu kai kanuakamuitabu[j]a? Kadi bituamba ne, Kudi bantu, tudi [ne bua kutshina, NW] bantu; bualu bua bantu buonso badi bitabu[j]a Yone ne, Udi muprofete.”

Balombodi aba kabena bamanya tshia kuandamuna. Nunku, badi bandamuna Yezu ne: “Katuena bamanye.”

Yezu pende udi ubambila ne: “Meme kabidi tshiena nuambila bualu bua bukokeshi bundi ngenza n’abu malu â.” Matewuse 21:19-27; Markuse 11:19-33, MMM; Luka 20:1-8.

▪ Bua tshinyi Dibidi dia 11 Nizan ndituku dia pa buadi?

▪ Pa kufikisha mfigi ku difuba, mmalongesha kayi adi Yezu ufila?

▪ Mmunyi mudi Yezu wandamuna aba badi bamuebeja kudi kufume bukokeshi budiye wenza nabu malu?